Minpadatkaŭ raskazała pra novaje ŭ dekłaracyjach, dachody z-za miažy i žyćcio nie pa srodkach

Kamu treba płacić padatak na zvyšdachody

Havorka idzie pra dachody, atrymanyja z krynic u Biełarusi pa troch padstavach:

• dachody pa pracoŭnych damovach;
• dachody ŭ vyhladzie dyvidendaŭ;
• dachody pa hramadzianska-pravavych damovach, pradmietam jakich źjaŭlajecca vykanańnie rabot, akazańnie pasłuh, stvareńnie abjektaŭ intelektualnaj ułasnaści.

Hetyja try vidy dachodaŭ sumirujucca, i suma, jakaja pieravyšaje 200 tysiač rubloŭ, abkładajecca padatkam pa staŭcy 25%.

Pry hetym uličvajucca padatki, jakija byli na praciahu hoda ŭtrymany z dachodaŭ, što pieravyšajuć 200 tysiač.

— Naprykład, čałaviek za hod atrymaŭ zarobak i dyvidendy na 300 tysiač rubloŭ. Adpaviedna, jon pavinien padać dekłaracyju, a padatak budzie pieraraźličany z roźnicy (300—200) — sa 100 tysiač rubloŭ, — rastłumačyŭ Andrej Kavaleŭski.

Pry hetym uličvajucca tolki tyja dachody, jakija abkładajucca zhodna z p. 1 art. 214 Padatkovaha kodeksa pa staŭcy 13%. Kali na praciahu hoda dachody abkładalisia inšymi staŭkami, jany nie ŭklučajucca ŭ padlik 200 tysiač rubloŭ.

— Naprykład, heta mohuć być staŭki 0% abo 6% pa dyvidendach. Heta moža być staŭka 9% pa pracoŭnych damovach dla rezidentaŭ industryjalnaha parku «Vialiki Kamień». Heta moža być navat staŭka 13%, praduhledžanaja art. 214 Padatkovaha kodeksa, a inšym zakonam u dačynieńni da pracoŭnych dachodaŭ rezidentaŭ Parka vysokich technałohij, — udakładniŭ Kavaleŭski.

Pavodle raźlikaŭ MPZ, u 2023 hodzie płacielščykami padatku na zvyšdachody mahli b stać kala 10 tysiač čałaviek. Ale ŭ 2025 hodzie kolkaść takich ludziej moža źmianicca, bo mnohija mahli raźmierkavać dyvidendy jašče ŭ 2023 hodzie, viedajučy pra ŭviadzieńnie novaha padatku ŭ 2024-m.

Chto jašče pavinien padać dekłaracyju

Jak adznačyli ŭ MPZ, štohod dekłaracyi pa padachodnym padatku padajuć kala 40 tysiač čałaviek.

Pavodle statystyki minułaha hoda, 68% dekłaracyj byli padadzienyja ŭ suviazi z atrymańniem dachodaŭ z-za miažy. Dekłaravać nieabchodna dachody, jakija atrymany za miažoj abo z-za miažy.

Kala 20% dekłaracyj padajuć tyja, chto atrymaŭ dachody ad prodažu majomaści. Biez dekłaracyi možna na praciahu piaci hadoŭ pradać adnu kvateru, adzin žyły dom, adzin ziamielny ŭčastak, adzin haraž i adnu mašynu. Kali ž za piać hadoŭ pradać dźvie i bolš kvatery, dva i bolš žyłyja damy, to za druhuju i nastupnyja prodažy treba padavać padatkovuju dekłaracyju.

Jašče adna katehoryja, jakaja pavinna zapaŭniać dekłaracyju, — asoby, jakija atrymali padarunki. Kali ich ahulnaja suma za 2024 hod pieravysiła 10 431 biełaruski rubiel, nieabchodna padać spravazdaču ŭ padatkovuju. Padarunki ad blizkich svajakoŭ na lubuju sumu padatkam nie abkładajucca.

Dekłaracyi treba padać da 31 sakavika, a termin apłaty padachodnaha padatku ŭ hetym hodzie — da 2 červienia.

U kaho pravierać dachody i vydatki

U Andreja Kavaleŭskaha taksama spytali, u kolkich biełarusaŭ u 2024 hodzie vyjavili pieravyšeńnie vydatkaŭ nad aficyjnymi dachodami. Statystyku jon nie ahučyŭ, ale rastłumačyŭ, kaho praviarajuć u pieršuju čarhu.

— Hetyja pravierki padatkovyja orhany pravodziać vybaračna, analizujučy vialiki masiŭ infarmacyi pra vydatki. Ale ŭsio ž my nie idziem z pravierkami da kožnaha biełarusa, bo heta, napeŭna, było b niapravilna, — adznačyŭ pradstaŭnik padatkovaj.

Pavodle jaho słoŭ, padatkovyja orhany ŭ pieršuju čarhu pracujuć z pradstaŭnikami biznesu, jakich padazrajuć va ŭtojvańni dachodaŭ i minimizacyi padatkovych abaviazacielstvaŭ.

— Ujavicie sabie kamiercyjnaje pradpryjemstva, jakoje paśpiachova pracuje, ale jaho supracoŭniki atrymlivajuć minimalnuju zarpłatu. Uźnikaje pytańnie: jak tak i što heta za zarobki takija? Pry hetym jaho ŭładalniki i top-mieniedžmient nabyvajuć darahija aŭtamabili i nieruchomaść. Mienavita da takich asob u padatkovych orhanaŭ uźnikajuć pytańni ŭ pieršuju čarhu, — rastłumačyŭ Andrej Kavaleŭski.

• 0
• 0
• 0
• 0
• 0
• 0
• 1
• 0