Viciebski ideołah u prapahandysckim zapale zastupiŭsia za simvał, za jaki nie ideołahaŭ surova pieraśledujuć
U čarhovym vypusku prapahandysckaha videabłoha «Viesti nie mołčat» hałoŭny śpiecyjalist ideałahičnaj raboty i pa spravach moładzi Viciebskaha abłvykankama Śviatasłaŭ Michajłaŭ uziaŭsia krytykavać pašpart Novaj Biełarusi i dziela hetaj «śviatoj spravy» navat pazityŭna vykazaŭsia pra nacyjanalny simvał, za simpatyi da jakoha zvyčajnych ludziej stroha karajuć, zaŭvažyła «Viciebskaja viasna».
Michajłaŭ u svaim śpičy papraknuŭ deputataŭ litoŭskaha Siejma za žadańnie ich «prysvoić» simvał «Pahoni». Maŭlaŭ, heta niesumniennaja histaryčnaja kaštoŭnaść dla Biełarusi.
U jakaści prykładu ideołah pryhadaŭ, što vyjava pahoni jość na ściahu Viciebskaj vobłaści i na hierbach mnohich haradoŭ Viciebščyny.
«Dyk, moža, litoŭskija palityki i nam pretenzii pradjaviać, što my ichni hierb vykarystoŭvajem?», — hrozna zapytaŭsia Śviatasłaŭ Michajłaŭ.
Ale pakul da hetaha dabralisia litoŭskija palityki, za vykarystańnie hierba «Pahoni» ŭ Biełarusi daŭno nie na słovach, a na spravie pieraśledujuć ludziej łukašenkaŭskija siłaviki. Vypadkaŭ, kali adnym z punktaŭ ci navat adzinym punktam abvinavačańnia źjaŭlałasia vykarystańnie «Pahoni», było tak šmat, što siońnia ludzi ŭnutry krainy bajacca nie tolki adkryta demanstravać staražytny hierb, ale i trymać jaho na adkrytym miescy doma ci navat u telefonie.
Tak, naprykład, pinskaha pravaabaroncu Alesia Ramanoviča ŭ svoj čas aštrafavali za značok z «Pahoniaj» na 3840 rubloŭ. Pry hetym, jak jon sam raskazvaŭ:
«Ja prynios na sud skrynšoty, ksierakopii, jakija paćviardžali, što hierb Pahonia — historyka-kulturnaja kaštoŭnaść. A ŭ adkaz sudździa zapytałasia: «A vy viedali, što Pahonia vykarystoŭvajecca jak simvał pratestu?»
I ničoha dakazać u takich vypadkach niemahčyma. Adnak ža prapahandysty pry hetym časam, kali heta im pa niejkich pryčynach vyhadna, mohuć kryvadušna parazvažać pra «Pahoniu» jak histaryčny simvał — prykład Śviatasłava Michajłava daloka nie pieršy.
Viciebski ideołah Śviatasłaŭ Michajłaŭ staŭ videabłohieram uvosień minułaha hoda: jon stvaryŭ svoj videabłoh, nazvaŭšy jaho davoli niaŭciamna — «Śviata miesto». Ale praz paru miesiacaŭ svoj kanał na videachostynhu YouTube jamu dała abłasnaja hazieta «Vitiebskije viesti», i z taho času videakanał Śviatasłava Michajłava nazyvajecca «Viesti nie mołčat». U im jon sprabuje pierakonvać svaich hledačoŭ u tym, što biełarusam u Jeŭropie žyviecca kiepska, što demakratyčnyja lidary ich padmanvajuć, a sapraŭdny raj na ziamli — u ciapierašniaj Biełarusi.
Kamientary