Biełarusaŭ z druhim hramadzianstvam pierastali prapuskać u krainu pa zamiežnych dakumientach
Biełarusy, jakija majuć dva hramadzianstvy, mahli vybirać, pa jakim pašparcie ŭjazdžać u Biełaruś. Prynamsi tak było da niadaŭniaha času. Ciapier praktyka źmianiłasia.
Navošta biełarusam pryjazdžać jak zamiežnikam?
Mahčymaściu pryjazdžać u Biełaruś u jakaści zamiežnika biełarusy, jak praviła, karystalisia dziela taho, kab pierasiekčy miažu na mašynie, zarehistravanaj u trecich krainach. Asabliva paśla taho, jak 19 lipienia byŭ uviedzieny biaźviz dla hramadzian 35 krain Jeŭropy.
Dziakujučy biaźvizu i druhomu hramadzianstvu biełarusy pryjazdžali ŭ Biełaruś na svaich mašynach ź jeŭrapiejskaj rehistracyjaj i afarmlali na ich časovy ŭvoz, jak i inšyja zamiežniki.
Adzinym istotnym minusam takich pajezdak byŭ toj fakt, što biez afarmleńnia časovaj rehistracyi možna znachodzicca ŭ Biełarusi nie bolš za 10 sutak.
Tym nie mienš, heta było zručna, pakolki pry ŭjeździe na aŭto, zarehistravanym u ES, pa biełaruskim pašparcie, davodziłasia b pakidać finansavuju harantyju, jakaja składaje 100% ad sumy razmytnieńnia aŭto pry jaho imparcie ŭ Biełaruś.
A heta tysiačy jeŭra, asabliva kali havorka idzie pra mašyny, maładziejšyja za try hady abo starejšyja za piać hadoŭ. Naprykład, kab hramadzianinu Biełarusi ŭjechać na 10-hadovym VW Passat z 2-litrovym ruchavikom, u jakaści finansavaj harantyi treba pakinuć sumu, ekvivalentnuju 9600 jeŭra.
Finansavuju harantyju ad hramadzian Biełarusi biaruć u biełaruskich rublach. Kali za čas pajezdki kurs rubla padaje, sumu, stračanuju na abmienie valut, viadoma, nie kampiensujuć.
Jakoje jość vyjście?
Pakidać finansavuju harantyju abaviazany nie ŭsie hramadzianie Biełarusi. Ad hetaha vyzvaleny tyja, chto maje pašpart sieryi RR (admysłovaja sieryja pašpartoŭ, jakija vydavalisia biełarusam, što aficyjna źjechali na PMŽ u inšuju krainu), abo tyja, u čyim pašparcie staić adznaka pra pastanoŭku na konsulski ŭlik za miažoj.
Takuju praceduru prachodziać niamnohija, bo jana davoli składanaja. U tym liku taki čałaviek nie maje biełaruskaj prapiski. Uładalniki takich pašpartoŭ nie ličacca rezidentami Biełarusi, tamu nie majuć prava na biaspłatnaje miedycynskaje absłuhoŭvańnie.
Tamu pryjezd u Biełaruś pa zamiežnym pašparcie staŭ zručnaj i davoli papularnaj praktykaj. Ale, jak stała viadoma «Našaj Nivie», kala miesiaca tamu pamiežnikam razasłali instrukcyju dla ŭnutranaha karystańnia, u jakoj zabaranili prapuskać ludziej, jakija majuć biełaruskaje hramadzianstva, pa inšym pašparcie, aproč biełaruskaha.
Roźnica ŭ napisańni imia i proźvišča ŭ zamiežnym i biełaruskim pašparcie nie dapamahaje paźbiahać identyfikacyi.
Ludzi, jakija sutyknulisia z takoj prablemaj, śćviardžajuć, što nijakich źmienaŭ u zakanadaŭstvie nie adbyłosia, i sami pamiežniki nikoli nie pakazvajuć dakumient, na padstavie jakoha admaŭlajuć va ŭjeździe pa zamiežnych dakumientach.
Dovady, što raniej čałaviek užo nieadnarazova zajazdžaŭ i vyjazdžaŭ ź Biełarusi pa jeŭrapiejskim pašparcie, taksama nie spracoŭvajuć.
Niekatorym padarožnikam pamiežniki pryznavalisia, što heta niehałosnaje rasparadžeńnie, spuščanaje źvierchu, a nie aficyjnyja źmieny ŭ zakanadaŭstvie.
Što kažuć u Pahrankamitecie?
Pazicyja davoli sprečnaja. Z adnaho boku, na infalinii adrazu adznačajuć, što hramadzianie Biełarusi pavinny pierasiakać dziaržaŭnuju miažu pa biełaruskim pašparcie, bo naša kraina nie pryznaje padvojnaha hramadzianstva. Adnačasova z hetym Biełaruś nie zabaraniaje svaim hramadzianam atrymlivać inšaje hramadzianstva (u adroźnieńnie ad Ukrainy i Litvy).
Tym nie mienš, dla Biełarusi taki čałaviek pierš za ŭsio zastajecca hramadzianinam krainy, tamu jon abaviazany pierasiakać miažu ź biełaruskim pašpartam.
Ź inšaha boku, na infalinii nie admaŭlajuć, što prapuskajuć ludziej pa dakumiencie, jaki padarožnik padaje na kantroli.
Ludzi, jakija da niadaŭniaha času jeździli ŭ Biełaruś jak zamiežniki, śćviardžajuć, što pierad takoj pajezdkaj udakładniali na miažy ŭ pamiežnikaŭ, ci možna tak rabić, i atrymlivali stanoŭčy adkaz.
Toje, što zakanadaŭstva nie źmianiłasia, taksama paćviardžajuć na infalinii. Tamu vyhladaje, što ciapier prosta źmianiłasia praktyka prymianieńnia zakanadaŭstva. Kali jašče letaś čałavieka prapuskali pa tym dakumiencie, jaki jon padavaŭ, to ciapier, vidać, praviarajuć pa bazach, ci maje jon biełaruskaje hramadzianstva. Kali takoje hramadzianstva jość, to takoha čałavieka jak zamiežnika nie prapuskajuć i prapanujuć ujazdžać u krainu jak hramadzianinu Biełarusi.
Apošniaje miesca pracy danosčycy Bondaravaj — kruhłasutačnaja saŭna. Ale pasada nieviadomaja10
Kamientary