«Upaŭ u rajonie rajvykankama, kuču milicyi nahnali, u tym liku AMAP». U Chojnikach upaŭ rasijski dron
Žychary rajonnaha centra Chojniki Homielskaj vobłaści raskazali «Fłahštoku» ab padzieńni ŭ centry horada rasijskaha ŭdarnaha bieśpiłotnika 9 lutaha.
Pa słovach adnaho ź vidavočcaŭ, dron «pryziamliŭsia» ŭ rajonie rajvykankama prykładna ŭ 3:30 nočy i ledź nie trapiŭ u 5-paviarchovy žyły dom №3 pa zavułku Katoŭskaha:
«Lacieŭ niedzie z boku paŭnočnaha ŭschodu. Upaŭ amal u 5-paviarchovik. Uvieś dom evakuiravali, zasialili ŭ hatel. Bližejšyja mahaziny dniom zakryli. Paśla abiedu dron vyvieźli i ŭzarvali. Uvieś horad na vušach. Kuču milicyi nahnali, u tym liku AMAP».
Inšaja krynica paćvierdziła infarmacyju:
«Z ranicy ŭsio było ačeplena, bieśpiłotnik upaŭ pobač z vykankamam, byli sapiory, MNS i milicyja».
Takim čynam, BPŁA ŭpaŭ u Chojnikach biez detanacyi. Jaho dakładnaja madel nieviadoma, vierahodna, heta była najbolš raspaŭsiudžanaja madel, jakuju Rasijskaja Fiederacyja prymianiaje dla ŭdaraŭ pa Ukrainie — dron typu Shahed-136 (Hierań-2).
Taksama nielha vyklučać, što ŭ Biełaruś zalacieŭ rasijski dron-padmanka Hierbiera, jaki słužyć dla pierahruzki ŭkrainskaha SPA i nie ŭtrymlivaje vybuchovaha rečyva.
Pobač ź miescam padzieńnia bieśpiłotnika taksama znachodzicca muzyčnaja škoła. Tudy patelefanavaŭ «Fłahštok» ad imia baćki i spytaŭ, ci biaśpiečna siońnia adpraŭlać dzicia na zaniatki:
«Viadoma, učora ŭžo ŭsio prybrali, usio dobra», — paćvierdzili ŭ škole.
Ułady i śpiecsłužby vyrašyli schavać infarmacyju ab padzieńni bieśpiłotnika ŭ centry Chojnikaŭ. Niama nivodnaj publikacyi pra hetaje zdareńnie.
Unačy 9 lutaha Rasija masava atakavała Ukrainu ŭdarnymi bieśpiłotnikami. Častka dronaŭ zalacieła na terytoryju Biełarusi.
Pa aficyjnaj infarmacyi Pavietranych sił Ukrainy, nočču 9 lutaha Rasija zapuściła pa Ukrainie 151 «šachied». Paćvierdžana źbićcio 70 BPŁA. 74 BPŁA-imitatary — łakacyjna stračanyja.
Raniej žychary Chojnickaha rajona, jaki miažuje z Ukrainaj i dzie ŭžo fiksavalisia zaloty rasijskich dronaŭ, prasili pra abaronu navučalnych ustanoŭ ad BPŁA. Svaju prośbu miascovyja žychary tłumačyli tryvohaj za biaśpieku dziaciej. Adnak kiraŭnictva abłvykankama pieranakiravała zvarot u hałoŭnaje ŭpraŭleńnie adukacyi «z prośbaj paviedamić padpisantam i abłvykankamu ab pryniatym rašeńni». Bolš ničoha nie paviedamlałasia. A elektronny servis, na jakim była apublikavanaja hetaja pietycyja, abviaścili ekstremisckim.
«Vy pavinny skazać, jaki drenny Sańnikaŭ». Šarenda-Panasiuk — pra toje, jak prapahandysty z BT zapisvali film pra jaje16
Kamientary