Samy papularny sabaka ŭ Biełarusi. Historyja «toj samaj Žužy z zapraŭki»
U sacyjalnych sietkach virusna raźlatajucca roliki z Žužaj — miłaj ukormlenaj dvarniažkaj, jakaja žyvie na adnoj ź biełaruskich zapravačnych stancyj. U sabački jość firmovyja ruchi, jakija tak palubilisia aŭdytoryi: Žuža padaje łapku, schiliŭšy hałavu ŭ procilehły bok, a jašče «parkujecca» bokam da ludziej, prapanujučy takim čynam siabie pahładzić. Onliner.by znajšoŭ Žužu i pahutaryŭ z rabotnikami AZS.
Ź jakoha kankretna rolika pačałosia ŭsieahulnaje «pałomnictva» na hetuju AZS, zrazumieć niemahčyma. Pa tehu #Žuža TikTok vydaje niekalki dziasiatkaŭ videa sa śmiešnym sabačkam. Prahlady niekatorych ź ich pieravalili za miljon.
Karystalniki, jakija ŭžo pabyvali ŭ haściach u Žužy, staranna chavajuć jaje adras. Mnohija bajacca, što chtości moža naškodzić zorcy internetu. Tym nie mienš udałosia vyličyć jaje miescaznachodžańnie, i žurnalisty nakiravalisia prosta na zapraŭku la adnoj z tras.
Supracoŭniki AZS nie nadta suprać ahučvańnia adrasa, ale žurnalisty taksama vyrašyli ŭstrymacca ad jaho publikacyi dziela biaśpieki.
— Vy ŭžo piatyja ci šostyja, chto siońnia pytajecca pra Žužu! — adkazvaje dziaŭčyna na kasy. — Tak, vy pa adrasie.
— Žuža! — kryknuli žurnalisty, nie paśpieŭšy dajści da draŭlanaj chatki, jak ź jaje vyskačyŭ chvościk. Litaralna na siekundu sabačka zatrymaŭsia la noh, daŭšy siabie pačasać, i radasna rynuŭsia da supracoŭnicy zapraŭki.
Adrazu Žuža stała demanstravać usie svaje ŭmieńni: i bačkom pryparkavałasia, i łapku, schiliŭšy hałavu na bok, dała, i puzikam dahary pierakuliłasia. U hałavie zajhrała taja samaja miełodyja z TikTok.
— Žuža žyvie ŭ nas z 2019 hoda. Na toj momant joj było hady 4—5 (vałancior sprabavała vyznačyć uzrost pa zubach), — raspaviadaje adna z supracoŭnic AZS.
— Jaje niechta vykinuŭ?
— Nie, jana ź miascovymi paśviła karoŭ — tut niedaloka jość paša. Kažuć, jaje tam kryŭdzili. Bo, kali da nas zachodziać miascovyja žychary, jana ich usich abłajvaje.
— My pabudavali dla jaje budku, ale voś u budynak AZS, na žal, puskać nie majem prava. Da Žužy, darečy, u nas žyła lisa! Žuža advajavała sabie terytoryju.
— Sapraŭdnaja lisa, ź lesu?
— Tak, prychodziła na zapraŭku, my jaje z ruk karmili. Heta taksama miascovy cud, ź joj usie fatahrafavalisia. Jana navat maršrutki sustrakała.
Da sterylizacyi, raskazvajuć na zapraŭcy, Žuža rehularna prynosiła svaich ščaniukoŭ: «3—4 razy na hod pa 5 puchnatych kamiačkoŭ». Raźbirali ich, kažuć, achvotna. Tym nie mienš supracoŭniki AZS vyrašyli advieźci sabačku na sterylizacyju, sabraŭšy hrošy i źviazaŭšysia z vałanciorami. A jašče apracavali Žužu ad klaščoŭ i inšych parazitaŭ, nadzieli ašyjnik, kab, barani boža, nie pryniali za badziažnuju.
— Rašeńnie ab sterylizacyi my pryniali ŭ 2022 hodzie, kali 25 studzienia, u lutyja marazy, jana pryniesła 8 ščaniukoŭ. Dobra, što budka jość! Ciapier vałancior pryjazdžaje dva razy na hod: dajom Žužy leki ad hlistoŭ, apracoŭvajem ad klaščoŭ.
Mienavita paśla sterylizacyi, uzhadvajuć na zapraŭcy, chudzieńkaja elehantnaja dama pieratvaryłasia va ŭkormlenuju sałodkuju bułačku.
— Ludzi pry hetym praciahvali zajazdžać i pytacca: «A vaša dvarniažka jašče źbirajecca ščanicca?» Nie dziŭna: ščaniuki byli nievierahodna pryhožyja! I voś Žuža pačała sama da ŭsich padychodzić: u nas tut pastajanny patok ludziej, nichto jaje nie kryŭdzić.
Kali miłaja dvarniažka pačała chajpavać? Supracoŭniki AZS dakładna adkazać nie mohuć. Kažuć, što słava raznosiłasia pastupova. Zdajecca, pierałomnym momantam stała videa dziaŭčyny-błohierki ź Piciera, źniataje vosieńniu.
— Jak vam zdajecca: Žužy padabajecca słava ci jana ŭžo stamiłasia ad uvahi?
— Kali b jana stamiłasia ad uvahi, to prosta sychodziła b ad ludziej! Voś tolki dziaciej jana nie lubić — u niejki momant pierastała da ich padychodzić.
Čym dapamahčy Žužy?
A ciapier da samaha važnaha pytańnia: što jeść Žuža? Pavodle supracoŭnikaŭ AZS, z čužych ruk jana korm biare nieachvotna. «Svaje» štodnia varać joj kašu z tušonkaj, dajuć małako i suchi korm.
— Kali dajom kaŭbasku, jaje abaviazkova treba drobna parezać. Jana ŭ nas takaja dama!
— Mnohija ŭ TikTok zaklikajuć znajści Žužy dom. Što dumajecie z hetaj nahody?
— Ja sumniavajusia, što jana adsiul sydzie. Adzin naš supracoŭnik zabiraŭ jaje dadomu na dzień. Jana skuhatała, płakała… Žuža — svabodnaja dama, joj patrebna svaboda. Tut jana robić, što choča. Zachacieła pahaniać kata — pajšła pahaniała! Na svaju terytoryju jana naohuł nikoha čužoha nie puskaje. Da inšych sabačak stavicca nie vielmi dobra.
— Čym možna dapamahčy Žužy?
— Chiba što tolki kormam. Prychodźcie, hładźcie — a bolš ničoha asablivaha i nie treba. U jaje ŭsiaho dastatkova.
Za ŭdzieł u pratestach buduć sudzić zornuju fitnes-instruktarku Natallu Navažyłavu13
Kamientary
Sabaku niechta źvioz da zapraŭki, ad pastucha, ci ad kaho inšaha, bo kali ja spyniaŭsia tam upieršyniu, piersanał AZS tak adkazaŭ na majo pytańnie. Niechta zapraviŭ mašynu i ź`iechaŭ, a sabaku kinuŭ.