Płany pa rekanstrukcyi kaścioła na Kalvaryjskich mohiłkach u Minsku pamianiali nie ŭ lepšy bok
Rekanstrukcyja kaścioła Uzvyšeńnia Śviatoha Kryža, šaści kaplic-pachavalniaŭ i centralnaj uvachodnaj bramy na terytoryi Kalvaryjskich mohiłak u Minsku zaciahvajecca. A Čyrvonaha kaścioła, zakrytaha bolš za dva hady tamu, u płanach pa rekanstrukcyi abjektaŭ u 2025 hodzie ŭvohule niama, piša Katolik.life.
Kaścioł na Kalvaryjskich mohiłkach u Minsku
Hod tamu była infarmacyja, pra toje, što zhodna ź Inviestycyjnaj prahramaj Minska na 2024 hod asnoŭnyja raboty pa rekanstrukcyi kaścioła na Kalvaryjskich mohiłkach pavinny pravieści i skončyć u 2025 hodzie.
Adnak śviežyja danyja śviedčać, što płany źmianilisia. Heta vynikaje z apublikavanaha pieraliku abjektaŭ, prajektavańnie, budaŭnictva i rekanstrukcyju jakich u 2025 hodzie płanujecca rabić za košt srodkaŭ biudžetu Minska i inšych krynic finansavańnia ——dadatku da inviestycyjnaj prahramy Minska na 2025 hod.
Zhodna z dakumientam, termin rekanstrukcyi kaścioła i inšych abjektaŭ na Kalvaryjskich mohiłkach raściahnuli na 2025-2026 hady.
Choć raboty ŭsio ž płanujuć pačać sioleta. Pry hetym suma, jakaja pavinna być vydzielenaja z haradskoha biudžetu i asvojenaja, padzielena amal roŭnymi dolami na dva hady. Heta moža śviedčyć pra toje što abjomy rabot u 2025 i 2026 hadach pavinny być prykładna adnolkavymi.
Terminam uvodu abjektu ŭ ekspłuatacyju taksama paznačany 2026 hod zamiest 2025-ha, jak płanavałasia raniej. Ci budzie kaścioł na hety pieryjad zakryty, pa-raniejšamu nie paviedamlajecca.
Zakazčykam prajekta źjaŭlajecca dziaržaŭnaje pradpryjemstva «Minskaja spadčyna», na bałansie jakoha taksama znachodzicca zakryty bolš za dva hady tamu Čyrvony kaścioł — nibyta z pryčyny patreby ŭ jahonaj rekanstrukcyi.
Pry hetym u Inviestycyjnaj prahramie ŭ pieraliku abjektaŭ, rekanstrukcyju jakich u 2025 hodzie płanujecca rabić za košt srodkaŭ biudžetu Minska i inšych krynic finansavańnia, Čyrvonaha kaścioła znoŭ niama.
Kamientary