Eks-futbalist zbornaj Biełarusi paśla komy znoŭ trapiŭ u reanimacyju. Na poli jaho čakać nie varta

Pra toje, što ŭ Saroki surjoznyja miedyčnyja prablemy, paviedamlałasia ŭ pačatku traŭnia 2024 hoda. Tady eks-forvard trapiŭ u reanimacyju praz pankreatyt i z ułasnaj zhody byŭ uviedzieny ŭ miedykamientoznuju komu — tak było praściej vydalać vadkaść, što zapoŭniła lohkija. Praz paru tydniaŭ spartsmiena vypisali.

U žniŭni 2024-ha krynicy raspaviadali, što jon uziaŭsia za zdaroŭje, trymaŭsia dyjety i pryvodziŭ siabie ŭ formu — chadziŭ u basiejn i siłoŭniu. Navat spadziavaŭsia viarnucca ŭ vialiki futboł — na suviaź ź im vychodzili pradstaŭniki niekalkich prafiesijnych kamand i amatary z «miedyjalihi». Ale sportu zaminała staraja traŭma kalena. U vyniku ŭsio abmiažoŭvałasia samastojnymi zaniatkami, a volny čas Saroka pryśviačaŭ žoncy, synu Jarasłavu i plamieńnicy Mii.

I voś na minułym tydni Jaromka raspavioŭ, što Saroka znoŭ pabyvaŭ u reanimacyi.

Pa źviestkach «Trybuny», čarhovyja niepryjemnaści z 32-hadovym Sarokam adbylisia ŭ pačatku vosieni-2024. Futbalist tolki pieršy čas paśla vypiski byŭ prychilnikam zdarovaha ładu žyćcia, ale ŭ niejki momant iznoŭ pačaŭ užyvać ałkahol, i heta ledź nie pryviało da sumnych nastupstvaŭ.

Saroka trapiŭ u reanimacyju ŭ ciažkim stanie, daktary realna zmahalisia za jaho žyćcio. Na ščaście, eks-hulca zbornaj zmahli vyciahnuć z taho śvietu. U balnicy Saroka pravioŭ kala miesiaca.

Tym časam siabry i kalehi sabrali, jak raspavioŭ Jaromka, hrošy na reabilitacyju — atrymałasia prystojnaja suma, jakuju pieradali žoncy.

Paśla vypiski Saroka pačuvaŭsia niadrenna, hołas u słuchaŭcy byŭ badziorym i žyćciaradasnym, što ŭsialała nadzieju na lepšaje. Adnak paśla čarhovaha zajezdu ŭ reanimacyju eks-futbalist akazaŭsia pad pastajannym nahladam daktaroŭ. I znoŭ viarnuŭsia da zdarovaha ładu žyćcia i pravilnaha charčavańnia. Kalehi spadziajucca, što Saroka zrabiŭ vysnovy i bolš «nie budzie padviarhać svoj arhanizm nieapraŭdanaj ryzycy».

Jaromka kaža, što viartańnie Saroki ŭ vialiki sport u jakaści hulca ŭžo niemahčymaje. Jak udałosia daviedacca, toj paśla vypiski zakinuŭ samastojnyja treninhi i nie padtrymlivaje formu ni ŭ zali, ni ŭ basiejnie.

Saroka choča zastacca ŭ futbole i navat pastupiŭ na niejkija trenierskija kursy, ale hruntoŭna zajmacca tam pieraškadžajuć prablemy sa zdaroŭjem.

U vyniku siońnia eks-forvard zbornaj iznoŭ zasiarodžany na siamji: nidzie nie pracuje i ŭvieś svoj čas pryśviačaje synu i žoncy. I, jak kažuć našy surazmoŭcy, «nikudy asabliva nie chodzić, ni z kim nie sustrakajecca».

• 0
• 0
• 0
• 0
• 0
• 3
• 0
• 0