Brytaniec, dziaŭčyna jakoha vykinuła ŭ śmietnicu dysk ź bitkojnami na $700 miljonaŭ, choča kupić uvieś śmietnik
Džejms Chaŭełs chacieŭ pravieści raskopki na śmietniku, ale ŭłady horada jamu admovili. Ciapier u prahramista źjaviłasia novaja ideja. Času ŭ jaho mała — na miescy śmietnika źbirajucca pabudavać elektrastancyju.
Kampjutarny śpiecyjalist z valijskaha Ńjuporta Džejms Chaŭełs užo dziesiać hadoŭ sprabuje znajści svoj ćviordy dysk ź bitkojnami na sumu ŭ 700 miljonaŭ dalaraŭ. Pavodle jaho słoŭ, u 2013 hodzie jahonaja dziaŭčyna vypadkova vykinuła pakiet ź vinčestaram u śmietnicu. Z tych časoŭ Chaŭełs zmahajecca z uładami za prava pravieści raskopki na haradskim śmietniku.
U minułym miesiacy Džejms prajhraŭ čarhovy sud za prava pravieści pošukavuju apieracyju na śmietniku. Paśla suda haradskaja rada abviaściła pra płany zakryć i rekultyvavać palihon, što amal dakładna pastavić kryž na apošnich nadziejach Chaŭełsa viarnuć svaje bitkojny. Ułady ŭžo atrymali dazvoł na budaŭnictva soniečnaj elektrastancyi na častcy hetaj terytoryi, paviedamlaje The Guardian.
39-hadovy Chaŭełs u paniadziełak zajaviŭ, što pastanova ab zakryćci stała dla jaho «sapraŭdnym siurpryzam». Adnak u jaho ŭźnikła novaja ideja: kupić śmietnik u horada.
«Rada zajaŭlała ŭ Vysokim sudzie, što zakryćcio śmietnika dla praviadzieńnia pošukaŭ naniasie vielizarnuju škodu žycharam Ńjuporta, a ciapier jany sami płanujuć jaho zakryć.
Ja čakaŭ, što śmietnik zakryjuć u najbližejšyja hady, bo jon zapoŭnieny na 80-90%, ale nie dumaŭ, što heta adbudziecca tak chutka. Kali haradskaja rada Ńjuporta budzie zacikaŭlenaja, ja, mahčyma, razhledžu mahčymaść kupli śmietnika ŭ jaho ciapierašnim stanie. Ja ŭžo abmiarkoŭvaŭ hety varyjant ź inviestycyjnymi partniorami, i hetaje pytańnie zastajecca na paradku dnia», — adznačyŭ Chaŭełs.
U sudzie Chaŭełs raskazaŭ, što letam 2013 hoda jon vypadkova pakłaŭ ćviordy dysk z kašalkom bitkojnaŭ u čorny śmiećcievy pakiet padčas prybirańnia ŭ ofisie i pakinuŭ jaho ŭ kalidory doma. Jahonaja tahačasnaja dziaŭčyna, jak śćviardžajecca, pryniała pakiet za śmiećcie i vykinuła jaho na śmietnik, dzie dysk byŭ niezvarotna zhubleny.
Chaŭełs chutka zrazumieŭ svaju pamyłku i z tych časoŭ nieadnarazova prasiŭ haradskuju radu dapamahčy jamu viarnuć ćviordy dysk, navat prapanoŭvajučy padzialicca znojdzienymi srodkami, ale jahonyja prośby zastavalisia biez adkazu.
Rada Ńjuporta ćviorda admaŭlałasia dazvolić Chaŭełsu vieści pošuki, zajaŭlajučy, što, jak tolki ćviordy dysk apynuŭsia na śmietniku, jon staŭ ułasnaściu municypaliteta.
Kamientary