Biełaruska raskazała pra svaju pracu ŭ anłajn– i zvyčajnym kazino

Hościem novaha vypusku jutub-kanała «Maksimalna» stała biełaruska Stefa, jakaja maje vopyt pracy jak u zvyčajnym kazino ŭ Minsku, tak i ŭ anłajn-kazino za miažoj.

Dziaŭčyna zhadvaje, što ŭ zvyčajnym kazino jana pracavała słot-apierataram.

«Ja pracavała čałaviekam, jaki dapamahaŭ raźbiracca sa słotami — na jakija knopački naciskać, raskazvać praviły. Paŭśmichacca, pasłuchać žarty, paśmiajacca. (…) Prynosić lod, kali [klijentu] treba, popielnicu pamianiać, skazać barmienu, kab heta zrabiŭ», — raskazvaje Stefa.

Pa słovach dziaŭčyny, hałoŭnym patrabavańniem da supracoŭnic źjaŭlajecca źniešni vyhlad.

«Ty abaviazkova pavinien być z makijažam, ź jarka-čyrvonymi vusnami, jarka-čyrvonym manikiuram», — pieraličvaje Stefa i dadaje, što ŭsie dziaŭčaty pavinny nasić abutak na abcasach minimum 8 santymietraŭ.

«U ciabie forma, kožny dzień ciabie farbuje vizažyst, robić tabie pryčosku, dušyć, praviaraje. (…) Prychodzić administratar na źmienu, ty ruki i vusny napierad vyciahvaješ. Jana ŭzdoŭž prachodzić i hladzić usich, (…) ci dastatkova vy ŭsie tavarnaha vyhladu, kab vas vypuskać u zału. Kali ŭ kaho niešta nie tak, to ty siońnia na źmienu nie vychodziš. I hety štraf z tvajho kašalka dastanuć».

U zvyčajnym kazino Stefa adpracavała tolki try dni. Hetaha času joj chapiła, kab acanić usie mahčymyja nastupstvy dla zdaroŭja ad pracy ŭ takim miescy.

«Dziaŭčaty zachodziać paśla źmieny ŭ prybiralniu. Pačynajuć ścirać vusny, a potym prosta rukami zdymajuć kavałački skury, tamu što ad vielmi ščylnaj pamady ŭ ciabie pačynajucca razdražnieńni, i prosta vusny litaralna abłaziać», — dzielicca ŭspaminami Stefa.

Akramia hetaha, drennaje ŭździejańnie na zdaroŭje akazvaje zakrytaje, biez naturalnaha aśviatleńnia pamiaškańnie, dym ad cyharet, jakija kurać klijenty.

Vynikam pracy ŭ takich umovach, jak raskazvaje Stefa sa spasyłkaj na tych, chto doŭha pracavaŭ u hetaj śfiery, stanoviacca prablemy ź lohkimi i pazvanočnikam. U vyniku ŭsie zaroblenyja hrošy mohuć być vydatkavany na daktaroŭ.

Pavialičyć

Čamu rekłama anłajn-kazino takaja ahresiŭnaja

Ciapier dziaŭčyna pracuje raspracoŭščycaj u anłajn-kazino i pahadžajecca, što rekłama takich miescaŭ vielmi ahresiŭnaja.

Jak tłumačyć Stefa, asnoŭnaja častka aŭdytoryi kazino — mužčyny. Tamu «ŭsio zroblena dla taho, kab mužčyny akramia taho, što jany pahulajuć, atrymali jašče vizualnaje zadavalnieńnie. Tamu ŭsia rekłama budujecca na niejkaj vialikaj ahresii. Ty hladziš film, a potym u ciabie 1chVJeT na ŭsiu kvateru. U ciabie mikrainsult, i ty takoje nikoli ŭžo nie zabudzieš. Heta ahresiŭna, ale jano pracuje. (…)

U markietynhu niama zadačy, kab heta spadabałasia. Jość ideja, kab heta zapomniłasia. I kali ciabie zusim pryciśnie, ty taki: «1chVJeT, ja dakładna viedaju». Nabiraješ, traplaješ na sajt — i ty ŭžo hulaješ. A da hetaha ty tydzień nazad svaryŭsia, što ŭ ciabie mikrainsult zdaryŭsia ad ich rekłamy. Jany, atrymlivajecca, vykanali svaju kančatkovuju metu, jany ciabie pryciahnuli jak karystalnika».

Adnosna taho fakta, što rekłama anłajn kazino vyhladaje dastatkova tanna, Stefa zaŭvažaje, što asnoŭnuju aŭdytoryju takich miescaŭ składajuć ludzi, jakija sami schilnyja iści za svaimi žadańniami i nie vystaŭlajuć vysokich patrabavańniaŭ da jakaści rekłamy.

«Ich nie treba mocna ciahnuć za ŭsie vypukłyja častki cieła, kab jany patrapili ŭ kazino, tamu što jany ŭžo adnoj nahoj i tak tam. Im treba prosta dać niejki spuskavy kručok, kab jany pa vyniku tam apynulisia. Jany nie buduć pierabirać 13 sajtaŭ (…)

Pieršy sajt, kudy patrapiŭ, znajšoŭ bolš-mienš pryvabny słot — i pahnali. Niavažna, jakaja tvaja lubimaja hulnia, žanr hulniaŭ. Tut časta niama darahoha pradakšnu dla taho, kab maksimizavać prybytak. Usio, što treba zrabić — padkinuć ideju ab tym, što ty chočaš pahulać i atrymać svoj karotki dafamin».

Kolki možna vyjhrać u kazino

«Sistema pavinna być u bałansie», — zaŭvažaje Stefa i raskazvaje pra historyju adnaho vyjhryšu.

«Miesiacaŭ šeść tamu była historyja, kali chłopiec, zdajecca, z Uhandy, vyjhraŭ 500 tysiač dalaraŭ. (…) Takija historyi byvajuć, ale jany nastolki raźlatajucca. (…) Jaje chočuć padśviacić usiudy, kab ludzi prosta viedali, što chacia b časam, zredku takija historyi zdarajucca».

Dziaŭčyna raskazvaje, što ŭ anłajn-kazino pakazčyk RTP (Return to Player) składaje 93-97%. Heta značyć, što kazino abaviazujecca viarnuć usim hulcam minimum 93-97 rubloŭ ad pastaŭlenych 100. U redkich vypadkach pracent moža skłaści 103-106%. Heta moža adbycca, kali zdarajecca pierarazdača vyjhryšaŭ. U takim vypadku kazino časova traplaje ŭ minus.

Pierarazdača vyjhryšaŭ (časam nazyvajuć «avierpej») — heta situacyja, kali suma vyjhryšaŭ, vypłačanych hulcam za peŭny pieryjad, pieravyšaje sumu stavak, zroblenych u kazino. Takoje byvaje, naprykład, kali hulnia zaprahramavana z časova padvyšanym RTP (vyšej 100%) abo kali niekalki hulcoŭ zapar vyjhrajuć bujnyja sumy. Heta časovaja źjava, tamu što ŭ doŭhaterminovaj pierśpiektyvie kazino zaŭsiody raźličvaje viarnuć tolki tuju častku stavak, jakaja adpaviadaje ŭstalavanamu RTP.

Niahledziačy na toje, što prybytak kazino składaje niekalki pracentaŭ, sumy vielmi istotnyja. Jak zaŭvažaje Stefa, siarod hulcoŭ vydzialajucca chajrolery ci kity, kolkaść jakich składaje 2-4 pracenty ad ahulnaj kolkaści. Ale mienavita jany prynosiać kazino asnoŭnuju častku zaroblenych hrošaj.

Jak śviaty i kryzisy ŭpłyvajuć na hulcoŭ

Pa słovach Stefy, u śviaty nazirajecca rost prybytku anłajn-kazino:

«Ludziam vielmi mocna patrebny toj samy kaladny cud. (..) Zabaŭna, ale navat va ŭmoŭny Vialikdzień ludzi robiać staŭki. Tamu što, mahčyma, Boh z taboju, i siońnia ty možaš zarabić trochi bolš, čym zvyčajna. Usio ž vielikodny cud pavinna być niejki».

Supracoŭnica anłajn-kazino zaŭvažaje, što kryzisy i niestabilnaść, taksama spryjajuć pavieličeńniu trat u industryi anłajn-kazino. U pieryjady vałacilnaści ludzi adčuvajuć stres, panikujuć, ale šukajuć sposaby chutka atrymać zadavalnieńnie i abstrahavacca. Kazino daje takuju ​​mahčymaść, dazvalajučy paradavacca, nie vychodziačy z domu.

«Chtości pakutuje ad kryzisu, ale da nas heta nie adnosicca. Tamu što my tut na varcie radaści, ščaścia i ŭtulnaści, kali tak možna skazać», — zaŭvažaje Stefa.

• 0
• 3
• 3
• 4
• 1
• 0
• 0
• 0