«Kolki palitviaźniaŭ vyzvaliŭ Mašenski?!» Piatruchin biŭsia suprać usioj Kaardynacyjnaj rady, ale pieramohu tak i nie zdabyŭ
Błohier Siarhiej Piatruchin patrabuje ŭvodzić sankcyi suprać miljaniera Alaksandra Mašenskaha, ale jaho ideja zusim nie vyklikała entuzijazmu ŭ inšych delehataŭ Kaardynacyjnaj rady.
Uviečary 11 lutaha 2025 hoda delehaty Kaardynacyjnyj rady sabralisia ŭ zumie, kab błohier Siarhiej Piatruchin uźniaŭ nabalełaje jamu pytańnie — jak zmahacca ź biznesmienam Alaksandram Mašenskim. Eks-palitviazień patrabuje ŭviadzieńnia piersanalnych sankcyj suprać miljaniera i jaho biznes-struktur.
Uvohule Piatruchin źbiraŭsia vystupić na hetu temu jašče tydzień nazad. Ale tady pabačyŭ, što da pasiadžeńnia dałučylisia tolki 12 z 80 delehataŭ i vyrašyŭ nie marnavać na ich svaje siły.
Kolki čałaviek słuchali jaho pałymiany vystup ciapier, niezrazumieła. Dla hledačoŭ tranślacyi na jutub-kanale Kaardynacyjnaj rady pakazvałasia ŭsiaho niekalki ŭdzielnikaŭ. Pryčym z uklučanym videa pastajanna siadzieła śpikierka Anžalika Mielnikava. Astatnija vystupoŭcy ŭklučali karcinku tolki padčas svaich karotkich zvarotaŭ. A voś Siarhiej Piatruchin tak i nie pakazaŭ siabie. Zrešty, pa rašučych intanacyjach adrazu było zrazumieła, što za mikrafonam mienavita jon.
Błohieru dali 10 chvilin na prezientacyju prapanovy. Jon raskazaŭ pra toje, što ličyć Mašenskaha kašalkom Łukašenki, a jašče i datyčnym da vykarystańnia rabskaj siły palitviaźniaŭ. Majecca na ŭvazie, što «chimiki» ŭ Bresckaj vobłaści pracujuć u kałhasie, a małako z hetaha kałhasa ŭrešcie traplaje na pierapracoŭku ŭ biznes-impieryju Mašenskaha.
«Mašenski aktyŭna budavaŭ režym razam z Łukašenkam. Za svaju łajalnaść jon uvieś čas maje lhoty ad režymu, uvieś čas «Santa-Bremar» nie płacić padatak na prybytak, kali pradaje svaju pradukcyju na ekspart», — viaščaŭ Piatruchin.
Što jašče aburaje błohiera, dyk heta toje, što biznesmien nijak nie vykazaŭsia nakont situacyi ŭ krainie: «Kolki palitviaźniaŭ vyzvaliŭ Mašenski? Dzie znajści jaho publičnuju pazicyju?»
Z krytyki Mašenskaha Piatruchin pieraklučyŭsia na kaleh pa Kaardynacyjnaj radzie, jakija nie vykazvali entuziazmu nakont jaho baraćby:
«Hledziačy na pavodziny niekatorych delehataŭ KR, ja zadajusia pytańniem, a my sapraŭdy zmahajemsia z režymam Łukašenki ci tolki stvarajem bačańnie?»
Heta zaŭvaha aburyła Jurasia Hubareviča, jaki nastojliva pacikaviŭsia ŭ Piatruchina, chto ž kankretna ŭ KR «nie zmahajecca z režymam Łukašenki».
Piatruchin z hatoŭnaściu pierajšoŭ na piersanalii:
«Naprykład, Alaksandr Knyrovič. Ja zadavaŭ naŭprostavyja pytańni Paŭłu Łatušku, Anžalicy Mielnikavaj. Jany ničoha nie adkazali mnie. Vam uvohule nie soramna, siabry? Što ja tut pavinien dakazvać naohuł, kali ŭsio dakazana!» — zapeŭniŭ jon.
Adnak inšyja delehaty Kaardynacyjnyj rady, miarkujučy pa ŭsim, zusim nie ŭpeŭnienyja, što «ŭsio dakazana».
Michaił Kiryluk źviarnuŭ uvahu na jurydyčnyja momanty. Naprykład, toje, što sankcyi ŭvodziacca za datyčnaść da represij i da vajny va Ukrainie. A dokazaŭ datyčnaści Mašenskaha da hetaha niama.
Alaksandr Knyrovič vykazaŭ mierkavańnie, što Mašenski kuplaŭ biarozaŭskaha vytvorcu małaka pa rynkavym košcie, a nie za biascenak.
Vadzim Prakopjeŭ sprabavaŭ pieravieści temu na abmierkavańnie losu aryštavanaha vajara Vasila Vieramiejčyka, a kali nie atrymałasia, to daŭ ekśpiertnaje zaklučeńnie — apazicyi nie treba zmahacca z pryvatnym biznesam. Ni z Mašenskim, ni z Alaksiejem Žukavym z «Alutecha», ni z Arkadziem Dobkinym z EPAM.
A voś hałasoŭ ad salidarnych ź Piatruchinym tak i nie prahučała. Papiarednie ŭ čacie jaho padtrymała niejkaja hrupa tavaryšaŭ, ale nichto ź ich nie rašyŭsia ŭstupić u pałkuju dyskusiju.
Urešcie śpikierka KR Anžalika Mielnikava prapanavała Piatruchinu skłaści dakumient z dokazami, kab usie delehaty mahli aznajomicca ź im.
Heta biurakratyčnaja znachodka daviała Piatruchina da šalenstva — jon-ta byŭ upeŭnieny, što hałasavańnie adbudziecca tut i ciapier. Pryčym pajmiennaje, jak jon patrabavaŭ.
«Davajcie zaraz hałasavać, i ŭsio!» — zaklikaŭ jon, ale marna.
Mielnikava jašče niekalki razoŭ patłumačyła Piatruchinu, što budzie čakać ad jaho piśmovy dakumient, a paśla paprasiła vyklučyć mikrafon raźjušanamu błohieru. Siońniašniuju bitvu jon prajhraŭ.
Alaksandr Mašenski — biznesmen, uładalnik hrupy kampanij «Santa». Najbolš viadomyja jaho kampanii — «Santa Bremar», «Savuškaŭ», «Santa Rytejł».
Mašenski ŭvachodzić u Radu pa raźvićci pradprymalnictva. U 2010 hodzie byŭ davieranaj asobaj Alaksandra Łukašenki na prezidenckich vybarach.
«Luby bolš ci mienš razvažlivy čałaviek budzie rabić vysnovy». Błohier Piatruchin raskazvaje palakam pra biełarusaŭ i adukoŭvaje jabaciek
Siarhiej Piatruchin raskazaŭ, jak u SIZA jaho sprabavali pieravieści ŭ «nizki status». Daviałosia ŭskryvać vieny
Nazvanyja 80 asobaŭ, jakija buduć zasiadać u novaj Kaardynacyjnaj radzie
«Kolki palitviaźniaŭ vyzvaliŭ Mašenski?!» Piatruchin biŭsia suprać usioj Kaardynacyjnaj rady, ale pieramohu tak i nie zdabyŭ16
Kamientary