«Niemahčyma navat vyklikać chutkuju»: častka Novaj Baravoj zastałasia biez suviazi
Prablemy z mabilnym internetam i suviaźziu ŭ niadaŭna zasielenych kvartałach doŭžacca amal hod: žychary paraŭnoŭvajuć ułasnyja kvatery z bunkieram, piša «Točka».
Ciapier kvadratny mietr u Novaj Baravoj moža kaštavać kala $2900 na pieršasnym rynku. Svajoj infrastrukturaj i źniešnim vyhladam rajon zavajavaŭ sercy mnohich biełarusaŭ.
I zavajuje jašče stolki ž, bo ŭźviadzieńnie novych damoŭ nie spyniajecca: płany zabudoŭščyka raśpisany až da 2030 hoda. Tady nasielnictva rajona składzie kala 40 tysiač čałaviek.
Za apošni hod novabudoŭli zdali ŭ dvarach kvartała «Centralny park».
Ale radaść navasiołaŭ azmročyła adna detal — u kvaterach nie łović ni internet, ni sotavaja suviaź.
Ci pazbavicca modny rajon ź vialikaj kolkaściu «dystancyjnikaŭ» vyhod XXI stahodździa?
Fota adpraŭlajecca pa 10-15 chvilin
Kaniec 2024-ha dla Maksima byŭ pa-sapraŭdnamu radasnym: pryniaŭ ułasnuju kvateru ŭ kvartale «Centralny park» Novaj Baravoj.
Tolki razam z afarmleńniem dakumientaŭ mužčynu davodzicca raźbiracca ŭ niuansach telefanii. Sprava ŭ tym, što ŭ kvatery nie łović ni suviaź, ni mabilny internet.
«Maje vokny vychodziać na abodva baki doma. I ŭ zaležnaści ad miescaznachodžańnia internet moža jak całkam nie łavić, tak i krychu pieradavać dadzienyja. Naprykład, kab adpravić fota, treba 10-15 chvilin, niedastupnyja videazvanki, a źmiena miesiendžera ničoha nie daje», — padzialiŭsia Maksim.
Daŭnija žychary Novaj Baravoj zaŭvažyli: časta mabilny internet pačynaje «advalvacca» ŭ rajonie supiermarkieta na Avijacyjnaj, 33. A la doma na Piłotnaj, 8 situacyja abvastrajecca, zaŭvažyŭ Maksim.
Niadaŭna mužčyna pravioŭ optavałakonny internet ad «Biełtelekama». Toj pracuje spraŭna i pakul słužyć adzinym sposabam suviazi z navakolnym śvietam.
Złavić suviaź možna ŭ kutku bałkona
Hanna zasialiłasia ŭ novabudoŭlu za tydzień da razmovy. U śniežni i studzieni pryjazdžała na pryjomki kvatery — i ŭžo tady zaŭvažyła prablemy ź internetam.
«U momant zaklučeńnia damovy ŭ ofisie navat dumki nie było ŭdakładnić pra internet. Tamu što raniej nie sutykałasia ź situacyjaj, kab nie było suviazi», — raspaviała Hanna.
U kvatery surazmoŭnicy nie łović nivodny pravajder: ni MTS, ni A1. Słaby internet źjaŭlajecca tolki ŭ adnoj kropcy: jaho možna złavić, vyjšaŭšy na bałkon i prycisnuŭšysia da bakavoj ściany.
Adzinaje vyjście ź situacyi Hanna bačyć u padklučeńni stacyjanarnaha internetu. Zajaŭku na jaho praviadzieńnie dziaŭčyna padała.
«Zvyčajnyja zvanki nie prachodziać. Šaniec jość tolki ŭ tym ža kutku bałkona. U samim domie i kvatery suviazi niama. Niemahčyma vyklikać navat ekstranyja słužby: chutkuju, MNS abo milicyju», — adznačyła subiasiednica.
Pablizu niama bazavych stancyj
Žyły rajon Novaj Baravoj pakul ličać novym. Kompleksy budujucca na małaasvojenych terytoryjach, i pytańnie bazavych stancyj dla ich pakul adkrytaje.
«U dadzieny momant «A-100 Deviełapmient» viadzie aktyŭnyja pieramovy z pravajderami suviazi dla bolš chutkaha vyrašeńnia pytańnia», — zajavili ŭ pres-słužbie kampanii.
Śpiecyjalisty adznačyli, što dla budaŭnictva bazavaj stancyi treba padabrać prydatnaje miesca, aformić dakumienty i atrymać zhodu bolšaści ŭłaśnikaŭ.
Raźmiaščać stancyi ŭ zasielenych rajonach
Pa zakonie apieratar moža raźmiaščać bazavyja stancyi tolki na pabudavanych i ŭviedzienych u ekspłuatacyju budynkach, adznačyli ŭ MTS.
Prydatnymi placoŭkami dla ich ustaloŭki zvyčajna ličać parkinhi, apory aśviatleńnia i padobnaje. U bolšaści vypadkaŭ hetyja zbudavańni ŭvodziać u ekspłuatacyju ŭžo paśla zasialeńnia žycharoŭ.
«MTS u 2024 hodzie pačaŭ prajektavańnie šaści placovak dla raźmiaščeńnia 12 bazavych stancyj u dyjapazonach UMTS-900 i UMTS-2100. Praces budaŭnictva zajmaje ad 10 da 18 miesiacaŭ u zaležnaści ad składanaści rabot i nieabchodnaści padklučeńnia dadatkovych kamunikacyj. Kampanija prykładzie ŭsie namahańni dla zapusku novych bazavych stancyj u rehłamientnyja terminy pa miery hatoŭnaści nieabchodnaj dla hetaha infrastruktury», — adznačyli ŭ pres-słužbie MTS.
Tam padzialilisia: kampanija abmiarkoŭvaje z zabudoŭščykam varyjanty, kab u budučyni harantavać žycharam jakasnuju suviaź adrazu paśla zasialeńnia.
Apošniaje miesca pracy danosčycy Bondaravaj — kruhłasutačnaja saŭna. Ale pasada nieviadomaja10
Kamientary