Расія сёлета паспрабуе ўцягнуць Беларусь у вайну? Як успрымаць заяву Зяленскага
Днямі падчас размовы з журналістамі Уладзімір Зяленскі заявіў, што летам ці восенню 2025 года Расія будзе спрабаваць непасрэдна ўцягнуць Беларусь у вайну. «Наша Ніва» спытала ў аналітыка Аляксандра Фрыдмана, наколькі рэалістычны такі сцэнар.
«Гэта, уласна, і ёсць аналіз таго, што адбываецца ў Беларусі»
Аляксандр Фрыдман заўважае: сцэнары, што на тэрыторыі Беларусі могуць быць размешчаныя расійскія войскі, напрыклад, для правакацый супраць Захаду, не новыя. Такая інфармацыя яшчэ летась публікавалася ў розных аналітычных выданнях. Акрамя таго, сам Лукашэнка дае падставы так меркаваць, калі робіць заявы адносна «Арэшніка» і расійскай ядзернай зброі.
«Гэта цалкам лагічны крок для расійскага боку»
«Наша Ніва»: У прамове Зяленскага прагучалі даволі кароткія тэрміны — што нібыта Беларусь можа быць уцягнутая ў вайну ўжо гэтай вясной, летам або восенню. Ці не падобна гэта проста на спробу прыцягнуць больш увагі да праблемы?
Аляксандр Фрыдман: Мне такія паводзіны Зяленскага падаюцца цалкам лагічнымі незалежна ад таго, ці адбудуцца нейкія дамоўленасці паміж расіянамі і амерыканцамі, ці не.
Калі дамоўленасці не будзе і стасункі яшчэ больш пагоршацца, то падняць стаўкі і выкарыстаць Беларусь — гэта цалкам лагічны крок для расійскага боку. Нагнятаць абстаноўку можна нават падчас перамоў, каб паказаць: калі мы зараз не дамовімся, то вайна распаўсюдзіцца на іншыя краіны.
Але нават калі і дамовяцца, ніякага грунтоўнага паляпшэння ў стасунках не адбудзецца. Яны застануцца вельмі напружанымі, і ў гэты момант Расія можа быць зацікаўленая ў тым, каб зацэментаваць свой кантроль над тэрыторыяй Беларусі і накіраваць туды свае войскі, каб Літва, Латвія і Польшча жылі з разуменнем, што на іх межах з Беларуссю стаяць расійскія вайскоўцы.
«НН»: Але ці магчыма ажыццявіць такі сцэнар у агучаныя прэзідэнтам Украіны тэрміны?
АФ: Калі мы паглядзім на 2022 год, то вынікае, што падрыхтавацца да падобнай аперацыі можна даволі хутка. Пакуль ніякіх такіх радыкальных крокаў няма, але гэта не адмяняе таго, што Расія здольная на такое, а Лукашэнка не будзе супрацьстаяць.
Зяленскаму гэта і патрэбна. Ён жа таксама імкнецца ўзмацніць ціск на Захад. Маўляў, глядзіце, калі вы нас зараз кінеце і пойдзеце на нейкія сур’ёзныя кампрамісы за кошт Украіны, то вам гэта адгукнецца.
«НН»: То-бок Зяленскаму выгадна, каб гэта адбылося, ці проста выгадна казаць, што ёсць такая рызыка?
АФ: У цяперашніх умовах яму (Зяленскаму. — «НН») выгадна, каб нешта такое адбылося, бо гэта ўзмацніць падтрымку Украіны. Зяленскаму таксама трэба даказваць на будучыню, што, калі будуць ісці перамовы і будзе ўздымацца пытанне прысутнасці замежных вайскоўцаў, з боку Беларусі таксама можа ісці небяспека, таму мяжу з Беларуссю трэба будзе ахоўваць.
Бо нельга будзе казаць, што лінія фронту з РФ небяспечная, а на беларускім кірунку ўсё добра. Вось ён і імкнецца даказаць, што гэта не так, што Беларусь цалкам знаходзіцца пад расійскім кантролем і можа быць выкарыстана ёю ў сваіх мэтах.
«Расіяне не разлічваюць на працяглую вайну з НАТА»
«НН»: Армія РФ мае даволі сціплыя поспехі на фронце, ужо больш за паўгода яна не можа цалкам аднавіць кантроль над часткай Курскай вобласці. Але пры гэтым з Захаду часта гучыць, што нібыта РФ будзе гатовая праз 4—5 гадоў уступіць у прамы канфлікт з краінамі НАТА.
На які поспех можа разлічваць Расія ў выпадку нападу на адну з краін НАТА, у тым ліку з тэрыторыі Беларусі і нават з выкарыстаннем яе арміі?
АФ: Я мяркую, што з самага пачатку ў Расіі іншы разлік.
Яны не збіраюцца весці нейкую канвенцыйную вайну з НАТА. Яны разлічваюць на тое, што будзе капітуляцыя, што ўлада хутка пасыплецца і ніхто не будзе змагацца. Гэтак жа яны разлічвалі ў выпадку з Украінай.
Што датычыцца Эстоніі, Латвіі і Літвы, то гэта хутчэй менавіта тое, пра што сцвярджае ў сваіх публікацыях дарадца Пуціна Сяргей Караганаў: маўляў, мы можам такое зрабіць, таму нас трэба ўспрымаць усур’ёз. Каб яны там, на Захадзе, пабачылі: альбо яны з намі дамовяцца і будуць улічваць нашы інтарэсы, альбо мы будзем пагражаць ім ядзернай вайной і знішчэннем.
Расіяне не разлічваюць на працяглую вайну з НАТА, бо гэта будзе самагубствам. У выпадку з краінамі Балтыі яны разлічваюць на бліцкрыг.
Такім чынам, яны могуць паспрабаваць згуляць ва-банк. Напрыклад, ты захапіў Эстонію, а пасля кажаш: так, вы моцныя і можаце мяне адсюль выкінуць, але ж вы павінны разумець, што калі вы паспрабуеце гэта зрабіць, я ўжыву ядзерную зброю.
Напэўна, такі ў іх разлік: у пэўны момант у НАТА паглядзяць і падумаюць, а ці варта нам рызыкаваць ядзернай вайной, напрыклад, дзеля Эстоніі? Таму, у выпадку чаго, галоўным аргументам Расіі застанецца ядзерная зброя.
У РФ гатовыя гуляць у рызыкоўныя гульні, а вось на Захадзе такой гатоўнасці няма. Тым больш што бліжэйшым часам Захад не будзе выглядаць маналітным.
«Наша Нiва» — бастыён беларушчыны
ПАДТРЫМАЦЬУ які дзень у 2020-м маглі здарыцца перамены? Польскі дыпламат выдаў кнігу аб працы ў Беларусі і даў адказ на гэта пытанне2
Каментары
З боку рф, для іх рб гэта ціхая гавань, месца дзе заводы, якія працуюць на рас впк, не бомбяцца і выконваюць замовы. Я ўжо не кажу пра павальныя антываенныя настроі ў нас. Сістэма дасць такую трэшчыну, што ініцыятары такой затэі вельмі пашкадуюць, што ўцягнулі рб.
Вось вам маё экспертнае меркаванне.