«Sama jurystka, i dzielicca viedami z novymi siabroŭkami». Alena Hnaŭk u kałonii starajecca nie sumavać
U raniejšaj kałonii Alena Hnaŭk časta traplała ŭ štrafny izalatar.
Palitźniavolenaja Alena Hnaŭk ciapier adbyvaje pakarańnie ŭ kałonii № 24 u Rečyckim rajonie, dzie ŭtrymlivajuć tych, chto maje bolš za adnu sudzimaść, piša Radyjo Svaboda.
Alena Hnaŭk padčas śledstva trymała haładoŭku, šmat dzion praviała ŭ karcary i ŠIZA, ad čaho zajmieła prablemy sa zdaroŭjem. Pavodle krynicy, jakaja viedaje jaje stanovišča, Alena Hnaŭk na ŭmovy ŭ novaj dla siabie kałonii nie narakaje.
«Pieraviali jaje ŭ Rečycki rajon, u PK-24, niadaŭna. Bo nad joj byŭ sud, na jakim dadali dadatkovy termin. Tamu jak asobu, što maje niekalki sudzimaściaŭ, jaje pieraviali siudy. Joj tam našmat lepš, čym u Homieli, dzie jana siadzieła raniej. Bo jana ŭ Homieli nie vychodziła z ŠYZA, a tut da jaje adnosiny bolš-mienš narmalnyja.
Ahułam usio dobra, jana tam nie sumuje. Šmat čytaje knih, piša listy. Jana ŭžo piensijnaha ŭzrostu, na pracu nie chodzić, ale šmat cikavicca jurydyčnaj litaraturaj, bo sama jurystka, i dzielicca viedami z novymi siabroŭkami.
Joj dazvolenyja telefanavańni, a ŭ Homieli ŭvohule ŭsio było zabaroniena. Jana pa-raniejšamu aktyŭnaja, niazłomnaja. Pieradaje vitańni tym, chto na voli», — raskazała pra Alenu Hnaŭk daśviedčanaja krynica.
U 2020 hodzie Alena Hnaŭk žyła ŭ Pružanach, adkul pryjazdžała na akcyi pratestu ŭ Bieraście. U 2021 hodzie žančynu asudzili na 2 hady «chatniaj chimii» ŭ viadomaj spravie ab «karahodzie» — akcyi pratestu suprać falšavańnia prezidenckich vybaraŭ, jakaja prajšła ŭ abłasnym centry 13 vieraśnia i ŭpieršyniu ŭ Biełarusi była razahnanaja z vykarystańniem vadamiota.
Padčas adbyćcia «chatniaj chimii» Alenu Hnaŭk znoŭ aryštavali i sudzili paŭtorna pavodle artykułaŭ ab paklopie na Łukašenku (art. 367 KK) i dyskredytacyi Biełarusi (art. 369-1 KK). Heta sud ubačyŭ u pastach Aleny Hnaŭk u sacyjalnych sietkach, dzie pravaabaronca raskazała pra składanaje stanovišča ŭ Biełarusi emihrantaŭ ź Blizkaha Uschodu.
Za svaje słovy Alena Hnaŭk atrymała 3 hady źniavoleńnia, adbyvać pakarańnie jaje nakiravali ŭ žanočuju kałoniju ŭ Homieli. Tam Alena Hnaŭk šmat dzion praviała ŭ ŠYZA i ŭ vyniku była asudžanaja jašče na 1 hod kałonii pavodle 411 artykułu KK, za «złosnaje niepadparadkavańnie patrabavańniam administracyi papraŭčaj ustanovy».
«Sa zdaroŭjem u jaje lepš, bo žyćcio stała spakajniejšaje», — raskazaŭ pra Alenu Hnaŭk daśviedčany čałaviek.
Biełaruskija pravaabaroncy pryznali Alenu Hnaŭk palityčnaj źniavolenaj. Usiaho 66-hadovaj piensijaniercy daviadziecca adsiedzieć za kratami 4,5 hoda.
Apošniaje miesca pracy danosčycy Bondaravaj — kruhłasutačnaja saŭna. Ale pasada nieviadomaja10
Kamientary