Vada sa stoli kapała miesiac, ale ŭ kvateru źvierchu było nie patrapić — tam nichto nie žyŭ hod. Voś jak rašyli prablemu

Usio pačałosia jašče 21 maja, kali Nastaśsi patelefanavali kvataranty: sa stoli ŭ vannym pakoi kapaje vada, piša SlutskGorod. 

— Maja kvatera znachodzicca ŭ 17-m domie pa vulicy Zialonaj. Častku žylla tut nabyli maładyja siemji, častku addali pad sacyjalnaje žyllo. Adna z apošnich znachodzicca prama nad majoj kvateraj, — raskazvaje Nastaśsia. — U toj dzień ja pryjechała i padniałasia na pavierch vyšej, ale mnie nichto nie adčyniŭ. Susied pa tambury paviedamiŭ, što haspadar kvatery nie žyvie [ŭ kvatery] sa žniŭnia minułaha hoda. Ale čałavieka treba było terminova šukać, bo kapała mocna.

Prablema była jašče ŭ tym, što pad naciažnoj stollu ŭ vannym pakoi znachodziłasia pravodka, i vada mahła spravakavać karotkaje zamykańnie. 

— Na nastupnuju ranicu ja źviarnułasia ŭ słužbu «115», i praź niekalki hadzin pryjechaŭ majstar. Jon abśledavaŭ pakoj i padniaŭsia da susieda. A kali zrazumieŭ, što ŭ jahonuju kvateru nie patrapić, staŭ telefanavać načalstvu, šukać varyjanty rašeńnia.

Pa zakonie adčynić kvateru nichto nie maje prava navat u takoj niaprostaj situacyi. Ale jość dva šlachi vyrašeńnia prablemy: albo znajści zakonnaha ŭładalnika, albo atrymać dazvoł praz orhany ŭłady. 

Pavodle vydańnia, uvieś hety čas milicyja viała pošuki ŭładalnika kvatery, i Nastaśsia taksama pačała jaho šukać pa svaich kanałach. Tolki ŭsie jahonyja kantakty byli nieaktyŭnyja, u milicyi skazali, što susied Nastaśsi nidzie nie fiksavaŭsia jak pravaparušalnik, i kancoŭ tak i nie znajšli. Mahčyma, čałaviek źjechaŭ z krainy.

Pakul miascovyja struktury i słužby šukali šlachi vyrašeńnia prablemy, vada ŭ vannym pakoi kvatery Nastaśsi bieśpierapynna kapała. Naciažnaja stol nie vytrymała nahruzki i pravisła, a śviacilnia pačała mocna «karacić». 

— Ja źviarnułasia ŭ strachavuju kampaniju, pryjechaŭ śpiecyjalist, spuściŭ vadu, źniaŭ stol, adklučyŭ śviacilniu. Vidać, ciakło tam daŭno, bo pad pakryćciom usio było čornym ad vilhaci. Paźniej, u apošnija dni maja, z ŽEU-5 prychodzili śpiecyjalisty i ja padpisała try akty na adkryćcio kvatery. Jaho musili pravieści praktyčna adrazu, ale hetaha čamuści nie zrabili. Ja znoŭ pačała telefanavać va ŭsie słužby, i mnie kazali, što nad pošukam varyjantaŭ rašeńnia prablemy pracujuć jurysty. 

Pra svaju prablemu Nastaśsia raspaviała staršyni miascovaha savieta deputataŭ Natalli Aŭsiańnikavaj padčas sustrečy z pracoŭnym kalektyvam pradpryjemstva, dzie pracuje dziaŭčyna.

— Natalla Alaksandraŭna abiacała ŭziać maju prablemu pad svoj kantrol, zapisała maje danyja. A ŭ čaćvier ranicaj (29 červienia — zaŭv. red.) jana patelefanavała mnie i skazała, što ŭ najbližejšy čas pryjduć rabočyja i adčyniać dźviery toj kvatery, — raspaviadaje surazmoŭnica.

U piatnicu, 30 červienia, Nastaśsia paviedamlała, što ŭ 11:00 da jaje pryjechali kamisija z rajvykankama i rabotnik kamunalnaj słužby. Zhodna z pastanovaj i z pryčyny adsutnaści žycharoŭ abiedźviuch kvater kamisija adčyniła ahulny tambur i ŭvachodnyja dźviery złaščasnaj kvatery.

— Toje, što my ŭbačyli ŭnutry, prosta nie ŭkładvałasia ŭ hałavie. Pamiaškańnie ŭ zaniadbanym stanie, paŭsiul śmiećcie, brud, piasok, pustyja butelki, — raskazvaje słuččanka. 

— Kali santechnik pravieryŭ ličylnik, sam byŭ u šoku: tolki chałodnaj vady pa pakazańniach zafiksavana 1600 kuboŭ! U vannym pakoi i tualecie było mokra, z-za pałomki vada sačyłasia na padłohu i da nas u kvateru. Kamisija praviała ahlad, padpisała akt i spuściłasia ŭ maju kvateru. Jak vyśvietliłasia, u nas nie tolki vanny pakoj paciarpieŭ: ścieny ŭ tualecie abkładzienyja plitkaj, a pad joj usio čornaje ad vilhaci. Jak doŭha sačyłasia vada, zastajecca tolki zdahadvacca, — skazała dziaŭčyna.

Nastaśsia zadavolenaja vynikam i čakaje zaklučeńnia kamisii. Straty joj pavinna kampiensavać strachavaja kampanija. Što z adamknionaj kvateraj, nieviadoma. 

• 6
• 0
• 5
• 17
• 16
• 7
• 5
• 0