U rasijskaj handlovaj sietki «Śviatłafor» prablemy. Ci zakranuć jany biełaruskija kramy?
Rasijskaja sietka dyskaŭntaraŭ «Śviatłafor» za apošnija niekalki tydniaŭ sutyknułasia z prablemami. Spačatku Rasspažyŭnahlad praz sud pačaŭ zakryvać jaje kramy, ciapier ža Fiederalnaja padatkovaja słužba ŭvohule choča prymusova likvidavać adzin ź jaje chołdynhaŭ. U Biełarusi hetaja sietka dyskaŭntaraŭ taksama pracuje. Vydańnie Office Life pasprabavała vyśvietlić, ci zakranuć rasiejskija prablemy biełaruskuju sietku.
Ź siaredziny studzienia Rasspažyŭnahlad pačaŭ płanavyja pravierki sietki «Śviatłafor» pa daručeńni pieršaha vice-premjera Rasii Dzianisa Mantarova. I heta pry tym, što z 2020 hoda ŭ krainie dziejničaje maratoryj na płanavyja pravierki, u tym liku roźničnaha biznesu. Vyklučeńni — šmatlikija skarhi albo pahroza zdaroŭju hramadzian.
Paśla hetaha z kanca studzienia 2025 hoda sudy pačali zakryvać kramy sietki «Śviatłafor» pa pazovach Rasspažyŭnahladu. Viedamstva znajšło ŭ ich pracy parušeńni sanitarna-epidemijałahičnych normaŭ. Naprykład, u pamiaškańni adnoj z kramaŭ znachodziłasia 165 kh praterminavanaj pradukcyi, a ŭ pamiaškańni inšaj byli ŭvohule prusaki, muchi i charčovaja mol.
Na hetym tydni stała viadoma, što Fiederalnaja padatkovaja słužba Rasii pačała likvidacyju chołdynhu «Inviest standart», jakomu naležyć častka handlovych punktaŭ «Śviatłafora» ŭ Centralnaj i Paŭnočna-Zachodniaj fiederalnych akruhach Rasii. Pryčyna — niedakładnyja źviestki pra jurydyčny adras, jakija kampanija paznačała pry rehistracyi. Takija spravy, praŭda, redka dachodziać da realnaj likvidacyi jurydyčnych asob, adnak źjaŭleńnie padobnaj infarmacyi moža niehatyŭna adbicca na finansavym stanoviščy biznesu.
Na biełaruski rynak sietka «Śviatłafor» vyjšła ŭ 2017 hodzie. Pavodle danych handlovaha rejestra, siońnia pad hetym brendam pracujuć bolš za 200 kram pa ŭsioj krainie. Ich apieratarami vystupajuć čatyry kampanii: «LenPraduktServis», «MasPraduktSiervis«, «ViciebskPraduktServis» i «HomielPraduktServis».
U pres-słužbie biełaruskaj sietki raskazali Office Life, što, niahledziačy na situacyju vakoł časovaha zakryćcia častki kramaŭ «Śviatłafor» u Rasii, u Biełarusi ŭsie kramy sietki pracujuć u štatnym režymie i situacyja ŭ susiedniaj krainie nijak nie paŭpłyvaje na biełaruski biznes kampanii.
«My pracujem na terytoryi Respubliki Biełaruś, pavodle zakanadaŭstva Respubliki Biełaruś», — adznačyli ŭ kampanii.
Bolš taho, sietka navat płanuje adkryć u Biełarusi niekalki novych kram.
U Minsku źnik viadomy prarasijski błohier i hość łukašenkaŭskaj prapahandy9
U Minsku źnik viadomy prarasijski błohier i hość łukašenkaŭskaj prapahandy
Łuhansk, Sierhijeŭ Pasad, Maskva — teatrały ŭ šoku ad sioletniaj prahramy mižnarodnaha fiestyvalu «[email protected]»22
Kamientary