«Rasija rychtujecca da doŭhaj vajny»: pra što śviedčyć pryznačeńnie Biełavusava
Vajna va Ukrainie vyjaviła, što rasijskaja zbroja vyrazna sastupaje zachodniaj, a armija niazdolnaja pieramahčy ŭkrainskuju. «Pryznačeńnie Biełavusava aznačaje, što ŭ asnovu stavicca ekanomika supraćstajańnia, to-bok vajna — heta nadoŭha i ŭsurjoz, hałoŭny raźlik na vymučvańnie i źniakroŭlivańnie supiernika».
Kreml patłumačyŭ pryznačeńnie ministram abarony pieršaha vice-premjera pa ekanomicy Andreja Biełavusava žadańniem pierabudavać ekanomiku na vajennyja rejki.
Pres-sakratar prezidenta Dźmitryj Piaskoŭ skazaŭ, što prychod Andreja Biełavusava źviazany z pracesami, jakija adbyvajucca ŭ rasijskaj ekanomicy.
«Vielmi važna ŭpisać ekanomiku siłavoha błoka ŭ ekanomiku krainy. Upisać z tym, kab jana adpaviadała dynamicy ciapierašniaha momantu», — skazaŭ Piaskoŭ.
Pavodle słoŭ Piaskova, biudžet Ministerstva abarony RF i siłavoha błoka dasiahnuŭ 6,7% ad vałavoha ŭnutranaha praduktu.
Heta bolš, čym u luboj inšaj jeŭrapiejskaj krainie, akramia vajujučaj Ukrainy.
Ciažka skazać, ci heta praŭda, ci realnyja vydatki na vajnu ŭ Rasii jašče bolšyja. Jeŭrazijskaja impieryja słavicca svajoj zakrytaściu.
«Heta pakul nie krytyčnaja ličba», «ale my pastupova nabližajemsia ŭ siłu viadomych pryčyn, u siłu viadomych hieapalityčnych abstavinaŭ vakoł nas, da situacyi siaredziny 80-ch hadoŭ, kali dola vydatkaŭ na siłavy błok u ekanomicy była 7,4%», — dadaŭ Piaskoŭ.
Prazrysty namiok na toje, što Pucin choča nie paŭtaryć pamyłak svaich savieckich papiarednikaŭ. SSSR razvaliŭsia, bo jaho ekanamičnaja madel nie vytrymała honki ŭzbrajeńniaŭ.
Maskva zajaŭlała, što jaje armija druhaja pa mocy ŭ śviecie, a dziaržaŭnaja prapahanda doŭhija hady nastrojvała hramadzian u šavinistyčnym i impieryjalistyčnym duchu. Adnak vajna va Ukrainie, jakuju Pucin bačyŭ svaim tryumfam, stała pravałam. Rasijskaja armija straciła bolš za 75 tysiač zabitymi i dziasiatki tysiač adzinak techniki, u tym liku tysiačy tankaŭ.
Vajennyja dziejańni va Ukrainie vyjaviła, što rasijskaja zbroja vyrazna sastupaje zachodniaj, a armija niazdolnaja pieramahčy ŭkrainskuju, nie kažučy pra błok NATA.
Kali stała jasna, što blickryh va Ukrainie nie ŭdaŭsia, Kreml pačaŭ pierabudoŭvańnie ekanomiki na vajennyja rejki.
Mienavita z hetym možna źviazać i pryznačeńnie ministram abarony ekanamista-nacyjanalista, jaki raniej zajmaŭsia refarmavańniem rasijskaj ekanomiki z metaj dasiahnieńnia joju samadastatkovaści.
«Pryznačeńnie Biełavusava aznačaje, što ŭ asnovu stavicca ekanomika supraćstajańnia, to-bok vajna — heta nadoŭha i ŭsurjoz, hałoŭny raźlik na vymučvańnie i źniakroŭlivańnie supiernika, stomlenaść i ŭnutrany razdraj u jaho sajuźnikaŭ», — napisaŭ rasijski palitołah Kanstancin Kałačoŭ.
U toj ža čas jak hetaje pryznačeńnie, tak i skład urada ŭ cełym śviedčać, što Pucinu kamfortna pracavać ź ludźmi svajho pakaleńnia. 64-hadovy Biełavusaŭ budzie adnym z najmaładziejšych u hetaj kamandzie. Ministru zamiežnych spraŭ Siarhieju Łaŭrovu — 74 hady, kiraŭniku Fiederalnaj słužby biaśpieki Alaksandru Bortnikavu — 72, a Siarhieju Šajhu, jaki pierasieŭ u kresła kiraŭnika Rady biaśpieki, za vosiem dzion spoŭnicca 69. Rasijskaja viarchuška pa svaim uzroście nahadvaje brežnieŭskuju pad kaniec 1970-ch.
72-hadovy šavinist Mikałaj Patrušaŭ, były kiraŭnik FSB, a paśla — Rady biaśpieki, «pierachodzić na inšuju pracu», jakuju pakul nieviadoma.
68-hadovy načalnik Hienieralnaha štaba Valeryj Hierasimaŭ praciahnie słužbu na hetaj pasadzie, paviedamiŭ Piaskoŭ. «Źmianieńniaŭ pakul u ciapierašni čas nie praduhledžvajecca», — skazaŭ pres-sakratar prezidenta.
«Kali Zachad choča vyrašać ukrainski kanflikt na poli boju, to budzie na poli boju», — zajaviŭ ministr zamiežnych spraŭ Rasii Siarhiej Łaŭroŭ u Radzie Fiederacyi 13 maja.
U Minsku źnik viadomy prarasijski błohier i hość łukašenkaŭskaj prapahandy5
Kamientary