Małako značna pavialičvaje ryzyku raku prastaty. A kiefir i niekatoryja inšyja małočnyja pradukty — nie

Isnuje vialikaja kolkaść navukovych daśledavańniaŭ, jakija śviedčać ab karyści małaka ŭ prafiłaktycy šerahu zachvorvańniaŭ. Siarod ich išemičnaja chvaroba serca, insult i rak toŭstaj kiški. Razam z hetym jano moža i narabić škody zdaroŭju mužčyn.

Jak piša FitBook.de, daśledavańnie, praviedzienaje amierykanskimi vučonymi z Univiersiteta Łoma Linda ŭ Kalifornii, vyvučała suviaź pamiž spažyvańniem małočnych praduktaŭ i ryzykaj raźvićcia raku prastaty. Aŭtary źviarnuli ŭvahu, što krainy z vysokim uzroŭniem spažyvańnia małaka časta majuć bolš vysokija pakazčyki hetaha zachvorvańnia.

Daśledavańniem było achoplena bolš za 28 tysiač mužčyn u ZŠA, u jakich na pačatku pieryjadu nazirańnia nie byŭ dyjahnastavany rak prastaty. Na praciahu vaśmi hadoŭ, pakul jano praciahvałasia, hetaje zachvorvańnie było vyjaŭlena ŭ 1254 čałaviek.

Charčovyja zvyčki ŭdzielnikaŭ rehistravalisia z dapamohaj apytalnikaŭ. Navukoŭcy padzialili spažyvańnie kalcyju z małočnych i niemałočnych praduktaŭ, kab lepš zrazumieć jak roznyja krynicy kalcyju mohuć upłyvać na zdaroŭje. Taksama ŭličvalisia takija faktary, jak uzrost, siamiejnaja historyja, indeks masy cieła, ałkahol, fizičnaja aktyŭnaść i skryninhi na rak prastaty.

Daśledavańnie pakazała, što mužčyny, jakija rehularna spažyvajuć šmat małaka, značna bolš ryzykujuć złavić rak prastaty. Tak, tyja, chto vypivaŭ štodnia 430 hramaŭ małaka, mieli na 25% vyšejšuju imaviernaść zachvareć, čym tyja, chto ŭžyvaŭ usiaho 20 hramaŭ.

Aŭtary adznačajuć, što ryzyka nie rasła liniejna. Jaje imklivy rost naziraŭsia da toj pary, pakul kolkaść spažytaha małaka nie pieravyšała 150 mililitraŭ u dzień. Zatym rost zapavolvaŭsia. Navukoŭcy nie znajšli značnych adroźnieńniaŭ pamiž zvyčajnym małakom, małakom z panižanym utrymańniem tłušču i abiastłuščanym małakom.

Vučonyja rajać mužčynam spažyvać małako ŭ nievialikich dozach — da 20 mililitraŭ u dzień. Kali ž u ich siamji byli vypadki zachvorvańniaŭ na rak prastaty, to lepš budzie całkam vyklučyć hety pradukt z svajho racyjonu.

Jak vyśvietlili aŭtary, pryčyna pavyšanaj ryzyki raźvićcia raku prastaty z-za spažyvańnia małaka — nie ŭ kalcyi, jaki jano ŭtrymlivaje. Pa ich słovach, adnoj z mahčymych pryčyn moža być najaŭnaść u im pałavych harmonaŭ.

Pavodle statystyki, prykładna 75% karoŭ u pieryjad łaktacyi mohuć być ciažarnymi. U vyniku hetaha ich małako moža ŭtrymlivać pavyšany ŭzrovień niekatorych harmonaŭ, jakija mohuć sadziejničać rostu harmonazaležnych puchlin, takich, jak rak prastaty. Isnuje taksama hipoteza, što małočnyja białki mohuć pavysić uzrovień insulinapadobnaha faktaru rostu (IGF-1), jaki źjaŭlajecca adnym z faktaraŭ, źviazanych z pavyšanaj ryzykaj raźvićcia raku.

Pavialičyć

Jość i dobryja naviny: daśledčyki nie znajšli suviazi pamiž ryzykaj raku prastaty i ŭžyvańniem takich małočnych praduktaŭ, jak kiefir, johurt i tvaroh. Jak jany tłumačać, škodnyja harmony rasščaplajuć bakteryi, što ŭtrymlivajucca ŭ fiermientavanych małočnych praduktach.

Jak adznačajuć aŭtary artykuła, daśledavańnie amierykanskich vučonych zasnavana na vialikaj i raznastajnaj hrupie ŭdzielnikaŭ, što robić vyniki bolš nadziejnymi. Adnak pa mietodycy praviadzieńnia jano naziralnaje, tamu nie moža dakazać pryčynna-vynikovyja suviazi. Zastajecca nie vyśvietlenym, ci mahli inšyja nieviadomyja faktary paŭpłyvać na vyniki.

Jašče adzin mahčymy niedachop — vykarystańnie ankiet dla zboru źviestak ab charčavańni. Hety mietad pavyšaje ryzyku niedakładnaściej, bo ŭdzielniki mohuć nie pamiatać, što jany jeli.

Taksama zastajecca nieviadomym, jak u cełym charčavańnie ŭpłyvaje na ryzyku raku prastaty, i ci moža, naprykład, dyjeta z vysokim utrymańniem klatčatki niejtralizavać umieranaje spažyvańnie małaka.

Tak, vyniki daśledavańnia, praviedzienaha ŭ 2024 hodzie, pakazali, što racyjon z akcentam na pradukty z vysokim utrymańniem klatčatki (takija, jak celnaziernievyja, sadavina i harodnina) pry abmiežavańni spažyvańnia małaka i małočnych praduktaŭ moža źnizić ryzyku raku.

Navukoŭcy padkreślivajuć, što nieabchodna pravieści dadatkovyja daśledavańni, kab dakładna vyznačyć rolu małočnych praduktaŭ u ahulnaj ryzycy raźvićcia raku.

• 6
• 2
• 2
• 6
• 4
• 0
• 0
• 0