«Польшча тоне». Масква арганізавала новую аперацыю па дэзынфармацыі, беларускія сілавікі на падхваце
Каналы сілавых ведамстваў Беларусі зноў паслухмяна распаўсюдзілі дэзынфармацыю па камандзе Масквы.
«Польшчы забракавала грошай на будаўніцтва інфраструктуры для барацьбы з паводкай, бо Варшава патраціла значныя сродкі на ўзбраенне Украіны», — напісала ТАСС на мінулым тыдні.
У сваім паведамленні агенцтва спаслалася на польскага публіцыста Аркадыюша Мікса (Arkadiusz Miksa). Гэты журналіст апублікаваў сваю аўтарскую калонку ў выданні Myśl Polska, матэрыялы якога вызначаюцца прарасійскім і антыўкраінскім зместам. На яго старонках друкуюць таксама опусы крамлёўскага ідэолага Аляксандра Дугіна.
У гэтым выданні працавала і Агнешка Півар — польская журналістка, якую з вялікай пашанай прымалі мясцовыя ўлады, а польская Gazeta Wyborcza аднесла да ліку «пуцінскіх агентаў хаосу», якія «атручваюць інфармацыйную прастору Польшчы».
У хуткім часе паведамленне ТАСС цалкам перадрукавала «Беларусь сегодня». Не засталіся збоку і тэлеграм-каналы.
«Польшча тоне. На дамбы грошай няма — усё патрацілі на Украіну» — піша тэлеграм-канал заходняга аператыўнага камандавання Узброеных сілаў Беларусі «На западном рубеже».
Насамрэч, Польшча даволі добра дала рады стыхіі. Паводкі ў перадгорных раёнах краіны здараюцца перыядычна. Гэтая стала наймацнейшай з 1997 года, аднак не выклікала значных разбурэнняў. Супрацьпаводкавыя збудаванні ў цэлым вытрымалі ўдар, а Еўрасаюз дапамагае Польшчы, як дапамагаў бы і любой краіне звязу ў экстрэмальнай сітуацыі.
Аднак Масква выкарыстоўвае любую нагоду, каб настроіць еўрапейскія грамадствы супраць салідарнасці з украінскім народам. І беларускія сілавікі рупяцца дзеля таго ж.
«Ужо больш за два гады краіна траціць вялізныя грошы на падтрыманне ўкраінскага канфлікту, у выніку чаго сама засталася з пустымі кішэнямі. Грошай на вадасховішчы і дамбы ў казне няма, аднак яны знайшліся на «дапамогу» УСУ», — пішуць у канале заходняга аператыўнага камандавання.
Некаторыя каналы пайшлі ў сваіх фантазіях далей. Так, «Белорусский фронт», які вядуць, імаверна, ідэолагі беларускіх сілаў спецаперацый, спасылаючыся на неназваныя «мясцовыя тэлеграм-чаты», напісаў, што польскія «вайскоўцы скардзяцца на недахоп тэхнікі, якая была раней перададзена Украіне», а «дзеянні польскага ўрада выклікаюць усё большую незадаволенасць сярод насельніцтва».
У іншым матэрыяле той жа тэлеграм-канал паведамляе аб тым, што «ЕС «кінуў» Польшчу дзеля Украіны». Чаму? Бо збіраецца выдзеліць краіне на дапамогу ў барацьбе з наступствамі паводкі 5 мільярдаў еўра. У той жа час Украіна атрымае 35 мільярдаў.
На кампанію дэзынфармацыі Расіі на фоне наваднення ў Еўропе звярнулі ўвагу польскія вайскоўцы.
Uważaj na dezinformację!
W związku z występującą na terenie południowo-zachodniej Polski sytuacją powodziową, mamy do czynienia z operacją informacyjno-psychologiczną atrybuowaną do Federacji Rosyjskiej. Aparat wpływu stosuje w cyberprzestrzeni technikę selektywnego… pic.twitter.com/r8gqJWMl3B
«У сувязі з сітуацыяй з паводкай, якая адбылася на паўднёвым захадзе Польшчы, мы маем справу з інфармацыйна-псіхалагічнай аперацыяй, якую прыпісваюць Расійскай Федэрацыі. Апарат уздзеяння выкарыстоўвае тэхніку селектыўнага адбору інфармацыі ў віртуальнай прасторы і імкнецца выклікаць у яе атрымальнікаў эмоцыі страху і бездапаможнасці. Адным з элементаў аперацыі з'яўляецца спроба падрыву даверу да органаў дзяржбяспекі», — папярэдзілі ў сваім канале ў Х (Twitter) спецыяльнае падраздзяленне — «Войскі аховы кіберпрасторы».
Каналы беларускіх сілавікоў таксама сталі інструментам расійскай ІПСА.
«Няма ніякай надзеі, што дождж спыніцца». Цэнтральная Еўропа пайшла пад ваду
«Людзі рынуліся ў крамы па ваду, у выніку быў часовы яе дэфіцыт». Беларусы расказваюць пра тое, як польскія ўлады змагаюцца з паводкай
Хто такая польская журналістка Агнешка Півар, перад якой выбачаецца кіраўніца «Белсата» і якой шле паштоўкі Лукашэнка
Рэсурсы Мінабароны РБ распаўсюдзілі новы брудны фэйк пра Украіну
Алексін і Тапузідзіс скончылі вайну за тытунёвы рынак Беларусі. Абодва прайгралі. А вось хто, здаецца, перамог10
Каментары