Marka adzieńnia Conte raźmiaściła rekłamu z aktrysaj Sašaj Borcič, ale nieŭzabavie vydaliła. Što zdaryłasia?
Fatahrafii viadomaj artystki pravisieli ŭ instahramie brenda mienš za sutki.
16 žniŭnia ŭ instahram-akaŭncie vytvorcy adzieńnia Conte źjaviłasia fatahrafija z papularnaj aktrysaj rodam ź Biełarusi Sašaj Borcič. U paście Alaksandra rekłamavała džynsy brenda.
Ale mienš čym praz sutki post byŭ vydaleny. U akaŭncie Borcič infarmacyja ab kałabaracyi taksama adsutničaje. My adpravili zapyt u markietynhavuju słužbu Conte, čamu źnikła hetaje fota, ale pakul nie atrymali adkazu.
Mahčyma, reč u kamientarach prychilnikaŭ dziejnaj ułady, jakija pasypalisia pad pastom. Jany pryhadali, što ŭ 2020-m Borcič padtrymała pratest, a ŭ 2022-m asudziła vajnu, i pačali napadać na brend.
«Vam hańba! Bečebešnica i nievajniaška stała vašym fejsam, vy kaho padtrymlivajecie? Ci zabyli, u jakoj krainie biznes u vas? Vy choć za 2020 hod znajdzicie ŭ huhle, za što tapiła dadzienaja asoba», — napisaŭ chtości.
Byli i inšyja kamientary ŭ padobnym duchu.
Nahadajem, što da niadaŭniaha času tvaram brenda była biełaruskaja madel, pieramožca konkursu «Mis Biełaruś — 2008», udzielnica mižnarodnaha konkursu «Mis Śvietu» Volha Chižynkova.
Zrešty, heta nie adzinaja hučnaja rekłamnaja kampanija ŭ śviecie biełaruskaj mody. Niezadoŭha da publikacyi Conte inšy biełaruski brend, Mark Formelle, raźmiaściŭ na svaich staronkach fatahrafii televiadučaj i žonki rasijskaha komika Paŭła Voli Lajsan Uciašavaj. Byłaja himnastka z aŭdytoryjaj u 5 młn padpisčykaŭ u instahram pradstaŭlaje minimalistyčny drop čornaha koleru.
Adznačajecca, što Lajsan udzielničała ŭ raspracoŭcy kapsuły, a sama kałabaracyja ŭ sacyjalnych sietkach pazicyjanujecca jak «Manifiest lubovi da siabie».
Acanić kałabaracyju «Mark Formelle plus Uciašava» možna ŭ instahram.
Amierykancy zabrali ź biełaruskaj turmy žurnalista Andreja Kuźniečyka i jašče dvuch palitźniavolenych17
Amierykancy zabrali ź biełaruskaj turmy žurnalista Andreja Kuźniečyka i jašče dvuch palitźniavolenych
Łuhansk, Sierhijeŭ Pasad, Maskva — teatrały ŭ šoku ad sioletniaj prahramy mižnarodnaha fiestyvalu «[email protected]»66
Kamientary