Ministr finansaŭ ZŠA pryvioz u Kijeŭ prajekt pahadnieńnia pa pryrodnych resursach

Zialenski zajaviŭ, što pravioŭ praduktyŭnyja i kanstruktyŭnyja pieramovy ź ministram finansaŭ ZŠA Skotam Biesentam i atrymaŭ pieršy prajekt patencyjnaha pahadnieńnia ab pryrodnych resursach.

«Ja viedaju, što našaj kamandzie pieradali pieršy prajekt pahadnieńnia ad Złučanych Štataŭ ab partniorstvie pamiž našymi krainami. Ja vielmi chaču, kab naša kamanda vyvučyła hety dakumient, i my zrobim usio, kab jak maha chutčej vyvučyć i padpisać hety dakumient», — raskazaŭ Zialenski.

Jon dadaŭ, što pahadnieńnie moža być dasiahnutaje na Miunchienskaj kanfierencyi, jakaja adbudziecca na hetym tydni.

«Złučanyja Štaty — heta našy hałoŭnyja partniory. My zrobim usio, kab vyvučyć usie detali dakumienta i paśpieć na Miunchienskuju kanfierencyju, tamu što nie chočacca hublać čas», — adznačyŭ Zialenski.

Pry hetym, pavodle słoŭ prezidenta Ukrainy, jany nie abmiarkoŭvali pryrodnyja resursy, jakija znachodziacca na akupavanaj Rasijaj ukrainskaj terytoryi.

Skot Biesent raskazaŭ pra vyniki sustrečy tak:

«Ja prybyŭ va Ukrainu, kab sustrecca ŭ prezidentam, ubačyć ludziej, a taksama pieradać prapanovy ad prezidenta Trampa. Jon choča zaviaršyć hetuju trahiedyju, vielmi vialikuju trahiedyju. I jon pracuje z abodvuma bakami. I prezident Zialenski praviadzie sustreču ź vice-prezidentam i ministram zamiežnych spraŭ u Miunchienie. A tym časam urad razhledzić hety dakumient.

My ličym, hety dakumient vielmi važny, i Złučanyja Štaty dy Ukraina majuć ahulnyja kaštoŭnaści — biaśpieku. I my chacieli b u dalejšym źviazać ahulnyja aśpiekty ekanomiki. I my ličym, što heta važny sihnał śvietu, kiraŭnictvu Rasii, što my staim razam u płanie pavieličeńnia ekanamičnych suviaziaŭ, partniorskich uzajemaadnosin z uradam i nasielnictvam Ukrainy. Paśla zaviaršeńnia hetaha kanfliktu heta dazvolić zabiaśpiečyć doŭhaterminovy ščyt biaśpieki dla ŭsich ukraincaŭ», — zajaviŭ jon.

Jak raniej pisaŭ New York Post, Ukraina «pa sutnaści pahadziłasia» dać ZŠA redkaziamielnyja mietały na sumu 500 młrd dalaraŭ u jakaści apłaty za vajskovuju dapamohu, jakuju Vašynhton nadaŭ Kijevu.

Pry hetym, pa słovach Zialenskaha, terytoryi Ukrainy važna abaranić ad rasijan nie tolki z punktu hledžańnia biaśpieki, ale i ŭ finansavym płanie. U advarotnym vypadku važnyja vykapni, u pryvatnaści «redkaziemy», dastanucca rasijanam zadarma.

• 0
• 0
• 0
• 0
• 0
• 0
• 0
• 0