«Prykryvaŭ adychod paranienaha kamandzira». Jak zahinuŭ biełaruski dobraachvotnik Eduard Łobaŭ

Łobaŭ byŭ dobraachvotnikam ź leta 2015. U 2017-m va Ukrainie vyjšaŭ zakon, što ź niehramadzianami Ukrainy možna zaklučać kantrakt dla słužby ŭ vojsku. Eduard skončyŭ čarhovyja kursy i padpisaŭ na try hady kantrakt u bryhadzie śpiecyjalnaha pryznačeńnia ŭ Chmialnickim. Byŭ u vyviedrocie, potym miedykam. 

Letam 2020 hoda chłopiec padpisaŭ kantrakt u 72-j miechanizavanaj bryhadzie «Čornyja zaparožcy», dzie słužyŭ Saša Małčanaŭ (były palitźniavoleny z Barysava).

U 2021-m Łobaŭ atrymaŭ Kazacki Kryž 3-j stupieni.

Jan Mielnikaŭ (sa ściaham), Eduard Łobaŭ (druhi sprava, trymaje płakat). Lvoŭ, 2015 hod

Paralelna vučyŭsia zavočna na psichołaha ŭ instytucie.

Pierad samaj vajnoj Eduard terminova pajšoŭ na čarhovyja kursy, zasvojvaŭ hranatamioty, NLAW, «Džavieliny».

Uznaharoda Eduarda Łobava, padpisanaja Valeryjem Załužnym, hałoŭnakamandujučym ukrainskim vojskam

Eduard braŭ udzieł u abaronie Kijeva. Atrymaŭ za heta 4 maja 2022 hoda ŭznaharodu «Za ŭzornaść u vajskovaj słužbie» 3-j stupieni. Vyzvalaŭ Čarnobyl.

«Paźniej jaho pierakinuli ŭ samaje piekła — pad Vuhladar. Syn byŭ vielmi stomleny. Pisaŭ, što nie było dzie vyspacca narmalna, niemahčyma adpačyć. Zdavaŭsia mnie vielmi zmučanym. Nikoli nie pisaŭ raniej, što ciažka, a tut napisaŭ, što ŭmovy składanyja… — zhadvaje maci Maryna Łobava. 

— 24 studzienia jon vychodziŭ u internet. 25-ha ja zapytałasia, ci jość źmieny da lepšaha. Jon nie adkazaŭ užo… A 26-ha Edzika zabili.

Tolki ŭčora ja daviedałasia, što jon saboj prykryvaŭ adychod paranienaha kamandzira. Taki moj Edzik: jon nie kinie nikoha ŭ biadzie, sam nie adydzie ŭbok. Jon zaŭsiody byŭ adkaznym. Kali jon skazaŭ, što budzie tak rabić, to i zrobić…»

Raniej siabar Łobava Alaksandr Małčanaŭ raskazvaŭ, što Eduard ź inšymi vajarami palavaŭ na tanki z «Džavielinam». Paśla ŭ bližnim bai asabista źniščyŭ niekalki bajcoŭ praciŭnika. Łobaŭ atrymaŭ askołačnaje ranieńnie, jakoje stała śmiarotnym.

Eduarda źbirajucca pachavać u Varšavie, ale kali — pakul nie viadoma. Cieła vajara jašče znachodzicca ŭ zonie bajavych dziejańniaŭ.

«Andruś Cianiuta inicyjavaŭ zbor podpisaŭ za nadańnie Eduardu zvańnia Hieroja Ukrainy. Źviazaŭsia z kamandziram, jakoha Edzik vyratavaŭ. Buduć składać pietycyju i źbirać podpisy», — padzialiłasia maci dobraachvotnika.

• 9
• 0
• 4
• 2
• 0
• 44
• 2
• 0