Dva hady niama viestak ad palitviaźniaŭ Mikoły Statkieviča i Maksima Znaka
Z 9 lutaha 2023 hodu palitźniavolenych Mikałaja Statkieviča i Maksima Znaka ŭtrymlivajuć biez suviazi z rodnymi i vonkavym śvietam — u tak zvanym režymie inkamunikada, piša «Svaboda».
Palitźniavolenaha staršyniu źlikvidavanaj uładami Biełaruskaj sacyjał-demakratyčnaj partyi «Narodnaja Hramada» Mikałaja Statkieviča zatrymali 31 traŭnia 2020 hodu ŭ Miensku pa darozie na Kamaroŭski rynak, dzie jon źbiraŭsia naviedać pieradvybarčy pikiet Śviatłany Cichanoŭskaj. Dva razy zapar jaho aryštoŭvali na 15 dzion, ale i paśla na volu jon nia vyjšaŭ.
U kancy červienia 2020 hodu Statkieviča pieraviali ŭ SIZA i vystavili abvinavačańni pavodle kryminalnaha artykułu 342 («Arhanizacyja ci ŭdzieł u hrupavych dziejańniach, jakija hruba parušajuć hramadzki paradak»), potym dadali 293-y artykuł («Padrychtoŭka da ŭdziełu ŭ masavych biesparadkach»). 14 śniežnia 2021 hodu na zakrytym pracesie sudździa Mikałaj Dola vynies Statkieviču prysud: 14 hadoŭ źniavoleńnia ŭ kalonii asablivaha režymu. Statkievič u zali sudu hučna vykryknuŭ: «Žyvie Biełaruś!»
20 červienia 2022 hodu Statkieviča pieraviali z Homielskaha SIZA № 3 u papraŭčuju kaloniju № 13 u Hłybokim, jakaja ličycca adnoj z samych surovych u krainie. Administracyja kalonii pastaviła jaho na ŭlik jak «schilnaha da ekstremizmu», u žniŭni źmiaściła na paŭhoda ŭ adzinočnuju kameru, u vieraśni — u štrafny izalatar. Ahułam ź lipienia 2022 hodu Statkievič u kalonii atrymaŭ dziasiatki spahnańniaŭ.
Ź lutaha 2023 hodu Statkieviča ŭtrymlivajuć biaz suviazi z rodnymi i źniešnim śvietam. Pavodle krynic, jaho pa čarzie trymajuć to ŭ adzinočnaj kamery PKT, to ŭ kamery štrafnoha izalataru, a taksama pazbavili prava na zvanki i adzinaj na hod pieradačy i spatkańnia.
30 studzienia stała viadoma, što Mikałaja Statkieviča vyłučyli na Nobeleŭskuju premiju miru.
Palitviazień, kandydat techničnych navuk, padpałkoŭnik Mikałaj Statkievič jašče da 2020 hodu pravioŭ u turmie i na «chimii» amal 8 hadoŭ — heta svojeasablivy rekord u palityčnych prysudach.
Z kanca 1990-ch jon jak staršynia Biełaruskaj sacyjał-demakratyčnaj partyi (Narodnaja Hramada) byŭ arhanizataram šmatlikich akcyj pratestu, za što mieŭ dziasiatki administracyjnych aryštaŭ.
U 2005 hodzie jaho asudzili na 3 hady abmiežavańnia voli za arhanizacyju vuličnaj akcyi suprać aficyjnych vynikaŭ parlamenckich vybaraŭ i referendumu.
U 2010 hodzie staŭ kandydatam u prezydenty na vybarach 2010 hodu. U dzień vybaraŭ 19 śniežnia jaho razam ź inšymi kandydatami zatrymali adrazu paśla Płoščy i paźniej asudzili na 6 hadoŭ kalonii ŭzmocnienaha režymu. Adbyvaŭ pakarańnie ŭ samych surovych miescach źniavoleńnia — u Škłoŭskaj kalonii i Mahiloŭskaj krytaj turmie. Vyzvaleny 22 žniŭnia 2015 hodu praz pamiłavańnie, chacia sam prašeńnia nie pisaŭ.
Z taho času Statkieviča šmat razoŭ «vykradali», preventyŭna zatrymlivali pierad usimi śviatami i masavymi akcyjami i sadžali na «sutki».
Juryst Maksim Znak taksama znachodzicca ŭ režymie inkamunikada ź 9 lutaha 2023 hodu.
Maksim Znak — advakat, byŭ pradstaŭnikom štabu eks-bankira Viktara Babaryki, jaki pretendavaŭ na pasadu prezydenta, a taksama siabram pieršaha składu Kaardynacyjnaj rady pa ŭrehulavańni palityčnaha kryzisu ŭ Biełarusi i jaje prezydyjumu. Byŭ zatrymany 9 vieraśnia 2020 hodu.
6 vieraśnia 2021 hodu Maksima Znaka asudzili na 10 hadoŭ pazbaŭleńnia voli pavodle art. 361 («Zakliki da dziejańniaŭ, nakiravanych na pryčynieńnie škody nacyjanalnaj biaśpiecy»), art. 357 («Zmova z metaj zachopu ŭłady niekanstytucyjnym šlacham), art. 361-1 («Stvareńnie ekstremisckaha farmavańnia abo ŭdzieł u im») Kryminalnaha kodeksu. Jaho sudzili razam z Maryjaj Kaleśnikavaj u Mienskim abłasnym sudzie, prysud vynies sudździa Siarhiej Jepichaŭ.
21 traŭnia 2022 hodu pracoŭnaja hrupa pa advolnych zatrymańniach AAN nakiravała biełaruskim uładam apaviaščeńnie ab pryznańni niepravamiernym pazbaŭleńnie voli Znaka.
Maksim Znak adbyvaje pakarańnie ŭ viciebskaj kalonii № 3 (Vićba). Viadoma, što administracyja viciebskaj kalonii niekalki razoŭ źmiaščała jaho ŭ štrafny izalatar i PKT. Pavodle infarmacyi, atrymanaj u krasaviku 2023 hodu, palitviazień ź lutaha amal nie vychodzić z ŠYZA.
24 traŭnia 2022 hodu KDB unios jaho ŭ śpis asobaŭ, «datyčnych da terarystyčnaj dziejnaści».
U źniavoleńni Maksim Znak napisaŭ užo try knihi. Pierakład jaho knihi «Zekameron» na anhielskuju trapiŭ u lik 15 knih, uhanaravanych premijaj Anhielskaha PENu PEN Translates za najlepšy pierakład hodu.
Pa stanie na 9 lutaha, u Biełarusi sama mieniej 1229 palitviaźniaŭ, pryznanych takimi pravaabarončaj supolnaściu. Realnaja kolkaść źniavolenych pavodle palityčnych matyvaŭ moža być bolšaj. Pravaabaroncam viadoma pra šerah palitviaźniaŭ, jakich ŭtrymlivajuć ad niekalkich miesiacaŭ da niekalkich hadoŭ u režymie inkamunikada — to-bok bieź jakoj-niebudź suviazi ź siamjoj i źniešnim śvietam.
Tak, akramia Maksima Znaka i Mikałaja Statkieviča, u režymie inkamunikada znachodziacca Ihar Łosik (z 20 lutaha 2023 hodu), Siarhiej Cichanoŭski (z 9 sakavika 2023 hodu), Uładzimier Kniha (z 5 vieraśnia 2023 hodu), Mikałaj Bańkoŭ (sa śniežnia 2023 hodu), Andrej Navicki (z krasavika 2024 hodu), Alaksandar Aranovič (z 6 červienia 2024 hodu), Alaksandar Franckievič (z kastryčnika 2024 hodu). U siamji Dzianisa Salmanoviča na praciahu dvuch miesiacaŭ niama suviazi z palitviaźniem i infarmacyi pra jaho stan i miescaznachodžańnie.
Taksama ŭ režymie inkamunikada doŭhi čas znachodzilisia Maryja Kaleśnikava (15 lutaha 2023 hodu, ale ŭ listapadzie 2024 hodu joj dali sustrecca z baćkam)i Viktar Babaryka (z 26 krasavika 2023 hodu, ale 8 studzień 2025 hodu jamu dali mahčymaść zapisać videazvarot da rodnych).
Šarenda-Panasiuk: Patrebnaja žorstkaja ekanamičnaja błakada režymu Łukašenki. Tolki cisk i sankcyi38
Kamientary