Ukrainski komik trapna vyśmiejaŭ Azaronka i «vybary» Łukašenki 

Ukrainski komik i rezident «Studyi Kvartał 95» Juryj Vialiki viadomy svaimi parodyjami na pieršych asob i viadomych palitykaŭ. Siarod ich i Pucin z Łukašenkam. 

Naprykład, u žniŭni 2024 hoda jon zapisaŭ parodyju, u jakoj Pucin skardzicca Łukašenku, što ŭkrainskim vojskam udałosia zajści na terytoryju Kurskaj vobłaści.

«Ryhoryč, jany ŭžo zajšli. Na 40 kiłamietraŭ, ale baluča», — skardzicca Pucin.

«U pieršy raz — heta zaŭsiody baluča, asabliva kali tak hłyboka. Adnak heta tolki spačatku, potym pryvykniecie», — adkazvaje Łukašenka.

Ciapier Vialiki zapisaŭ novuju parodyju na Łukašenku, vyśmiejaŭšy «vybary» ŭ Biełarusi, jakija bolš nahadvali dobra zładžany śpiektakl, čym demakratyčnuju praceduru. U roliku jon uvasobiŭsia ŭ vobraz Łukašenki, jaki razmaŭlaje ź viadučym navin — Ryhoryjem Žopurvionkam.

Pavialičyć

— Vy adziny ŭpeŭniena atrymali pieramohu ŭ hetaj nialohkaj upartaj baraćbie, možna skazać. (…) I nie prosta pieramahli, a ŭ litaralnym sensie razhramili svaich apanientaŭ, — adznačaje viadučy navin.

— Tak, stop, što značyć razhramili? Na hety raz abyšłosia biez pahromaŭ, bo ŭsie, chto jašče moh choć niečym hrymieć, užo daŭno, tak by mović, zahrymieli, — papraviŭ «Łukašenka».

— Vy nabrali ažno 86,82 pracenta hałasoŭ. Heta absalutny rekord za ŭsie hady, — praciahvaje Žopurvionak.

— Tak, nu ty taksama za ŭsie hady nie kažy. Ja ž jašče nie sychodžu, ci toje jašče budzie.

— I ŭsio ž mianie cikavić, chto hetyja amal 13 pracentaŭ zdradnikaŭ i adščapiencaŭ, jakija prahałasavali suprać baćki.

— Hryš, nie zavodźsia, kamu kažu. Usie za mianie prahałasavali, usie 100 pracentaŭ. Ale ty ž razumieješ, što ja nie mahu sabie namalavać ličbu bolš, čym u Pucina. (…) Za mianie stolki prahałasavała, što daviałosia potym biuleteni dadrukoŭvać, kab usie ŭleźli.

— A chto vas, dazvolcie spytać, pieršym pavinšavaŭ z hetaj upeŭnienaj pieramohaj?

— Umka, špic moj, z samaj ranicy pavinšavaŭ, tak skazać, na radaściach. Prosta ŭ tufli. U adzin tufiel prosta źlohku pavinšavaŭ, a ŭ druhi pavinšavaŭ dyk pavinšavaŭ. Na pośpiech, jak toj kazaŭ. Chacia mnohija kažuć, što heta da hrošaj.

Heta nie ŭsio žarty, jakija ŭtrymlivaje rolik. Jość tam i zhadki pra toje, jak padbiralisia kandydaty na vybary («chočaš toŭścieńkaha, ci chudzieńkuju, ci vysokaha, ci nizkaha»), adsutnaść niezaležnaha nazirańnia («Ja ž zaprašaŭ zachodnich naziralnikaŭ panazirać za našymi vybarami. Prosta da našaha płota na miažy») i abiacańnie što na nastupnych «vybarach» prava hołasu atrymajuć navat dzieci.

Hledačy acanili hetuju parodyju Vialikaha. Videa ŭžo nabrała 410 tysiač prahladaŭ.

• 2
• 0
• 2
• 0
• 0
• 0
• 0
• 0