Rasijskaje kamandavańnie nakiroŭvaje na front asłoŭ, bo techniki nie chapaje. Heta nie žart
«Prosta prymi heta jak danaść. Nie pytajsia. Fakt u tym, što nam vydali voślika».
Šerah rasijskich telehram-kanałaŭ paviedamili ab tym, što rasijskaja armija ŭ jakaści novaha transpartu dla pieravozki bojekamplektaŭ na pieradavuju vyrašyła vykarystoŭvać asłoŭ. Jak pišuć sami vajennyja, hetych žyvioł im vydali zamiest aŭtatranspartu, jakoha nie chapaje.
«Ja prosta pačuŭ. Potym sam ubačyŭ, ach**ŭ. Prosta prymi heta jak danaść. Nie pytajsia, adkul, čamu, chto, navošta, jak. Ja nie ja*u. Ale fakt u tym, što nam vydali voślika. Jon va ŭzvodzie zabieśpiačeńnia pryparkavany. Havorać: «Voś voślik. U nas ža ch***a z transpartam? Ch***a. «Urały» harać? Harać. Voś voślik. Vazicie na im bojekamplekt na pieradavuju». Voślik. Sapraŭdny žyvy voślik. Heta nie humka (humanitarnaja dapamoha — NN) pryviezła. Heta aboznaja mašyna «Urał» pajechała na atrymańnie majomaści, i jamu vydali tam asła», — kaža aŭtar videa.
Inšy vajennasłužačy paviedamlaje, što jany atrymali adrazu čatyroch žyvioł.
Ahulnaviadoma, što asły ŭ jakaści hužavoha transpartu aktyŭna vykarystoŭvalisia na vojnach minułaha. U kamientaryjach niechta zhadaŭ: «U Čačni ŭ nas dva išaki byli. Lohka pa 120 kiłahramaŭ nasili. Byli jany pavažanymi i niezamiennymi».
U 2004 hodzie paviedamlałasia ab płanach pastavić na ŭzbrajeńnie čaściej rasijskaj armii, raźmieščanych na Paŭnočnym Kaŭkazie, 150 asłoŭ i mułaŭ. Ich pavinny byli vykarystać pry praviadzieńni pošukavych apieracyj va ŭmovach vysakahorja.
Nieviadoma, nakolki hužavy transpart pašyrany va ŭkrainskaj armii, ale niekalki tydniaŭ nazad paviedamlałasia ab evakuacyi z zony bajavych dziejańniaŭ bajavoha asła pa mianušcy Chajmars. Ukrainskija ŚMI pisali, što jon znachodziŭsia ŭ Danieckaj vobłaści i vaziŭ snarady na pieradavoj. Ale ź ciaham času ŭ vajennych źjaviŭsia aŭtamabil, i žyviolina stała niepatrebnaj.
U rasijskim vojsku situacyja advarotnaja — raniej byli mašyny, a ciapier zamiest ich žyvioły. U adnym z kanałaŭ z paviedamleńniem ab nakiravańni asłoŭ na front zaŭvažajecca, što zhodna z zahadam Minabarony ab pieraliku techniki, hužavoha i ŭjučnaha transpartu, u jakaści srodku ciahi mohuć vykarystoŭvacca žyvioły, u tym liku asły. Hety pieralik, zaćvierdžany ŭ 1999 hodzie, uklučaje taksama koniej, viarbludaŭ i jezdavych aleniaŭ.
Telehram-kanał «Dva majory» žartuje, što rasijskaje vojska «niepieramožnaje praz svaju kiemlivaść, umieńnie dziejničać niečakana nie tolki dla sapiernika, ale i dla siabie samoha».
Praŭda, u asła źjavilisia i prychilniki. Adzin z Z-błohieraŭ napisaŭ, što jaho padraździaleńnie taksama zadumvałasia ab nabyćci asła, tamu što heta žyvioła biasšumna pieramiaščajecca.
Inšyja pišuć, što śmiešnaha ŭ vykarystańni asłoŭ ničoha niama. «Zastałosia jašče kavaleryju adradzić, pakul vorah masava naładžvaje vytvorčaść bieśpiłotnikaŭ».
U jaki dzień u 2020-m mahli zdarycca pieramieny? Polski dypłamat vydaŭ knihu ab pracy ŭ Biełarusi i daŭ adkaz na heta pytańnie9
Kamientary