Kudy mohuć departavać 323 biełarusaŭ z ZŠA paśla ŭkaza Trampa? I chto hetyja ludzi?
Sa Złučanych Štataŭ źbirajucca departavać 323 biełarusaŭ, uklučanych u čorny śpis Imihracyjnaj i mytnaj palicyi. «Naša Niva» zapytałasia ŭ advakata, śpiecyjalista pa mižnarodnym pravavym supracoŭnictvie pa kryminalnych spravach Alesia Michaleviča, adkul uziałasia heta fiksavanaja kolkaść ludziej i kudy ich mohuć adpravić.
Biełarusy ŭ hetym śpisie — heta ludzi, pa jakich mihracyjnyja orhany ŭžo pryniali pravavyja rašeńni ab departacyi, kaža Aleś Michalevič. «Kali čałaviek nielehał i jaho nie złavili, nichto departavać nie budzie», — tłumačyć jon.
Hetyja 323 biełarusy mohuć znachodzicca jak u departacyjnym centry, tak i doma — u zaležnaści ad taho, na jakoj stadyi jany znachodziacca, što vykonvali i jak siabie pavodzili.
«Čałaviek pryjechaŭ u krainu pa vizie, jana potym skončyłasia, jon zastaŭsia tam nielehalna abo paprasiŭ status uciekača, atrymaŭ usie admovy. Jon bolš nie maje prava lehalna znachodzicca. Paśla adbyvajecca departacyja albo dobraachvotny vyjezd. Na kožnym etapie čałavieku prapanoŭvajecca apošniaje, navat kvitki apłačvajuć.
Kali na starcie ludzi prafukali svaje mahčymaści dyskutavać pra mahčymaść vyjezdu, pra krainu, maršrut, zusim nie fakt, što na finalnaj stadyi (jakaja ciapier) chtości pra heta stanie zapytvacca.
Ź vialikaj dolaj vierahodnaści hetyja 323 čałavieki išli na pryncyp, kazali, što im niama kudy jechać, i čakali, što ź imi zrobiać. Pryjšoŭ Tramp — i ciapier voś zrobiać. Zrazumieła, što zvyčajna takija ludzi lubymi šlachami chočuć zastacca, bo byvała, abjaŭlali amnistyju tym, chto nielehalna znachodzicca, i jany paśla hetaha atrymlivali lehalny status», — raskazvaje Aleś Michalevič.
Advakat adznačaje, što vysyłka z ZŠA vyhladaje vielmi padobna da vysyłki siarednieazijataŭ z Rasii.
«Centr zabity ludźmi z rečami, vakoł jakich supracoŭniki palicyi. Ničoha supierpravavoha tam nie budzie», — kaža jon.
Vysłać čałavieka razam ź siamjoj mohuć u vypadku, kali jana znachodzicca na tym ža statusie. Ale pa zakonach ZŠA dzicia, narodžanaje tam, źjaŭlajecca hramadzianinam krainy.
«Raniej usio vyrašałasia na karyść dziciaci, to-bok baćkoŭ, — raskazvaje Aleś Michalevič. — Ciapier Tramp taksama heta vielmi mocna abmiažoŭvaje».
Kožnamu z tych, kamu pahražaje departacyja, navat pry adsutnaści pašparta, pasolstva Biełarusi vydaść daviedku na viartańnie. Taksama taki dakumient mohuć vydać sami Štaty.
Chutčej za ŭsio, kraina, kudy patencyjna mohuć departavać biełarusaŭ, — Turcyja, bo pramych rejsaŭ u Biełaruś niama, ličyć advakat.
«Tyja, chto tudy [u Turcyju] pajedzie pa departacyi, nie zmohuć tam zastacca, dla ich heta budzie tranzitnaja kraina, adtul — u Biełaruś.
Ale heta jak prykład, bo taksama budzie zaležać, adkul prylacieli hetyja ludzi. Dla vyznačeńnia krainy dla departacyi ich stanuć dzialić na niejkija katehoryi i adpraŭlać roznymi šlachami.
Tut vielmi šmat pytańniaŭ: jak čałaviek zajechaŭ, nakolki ŭ jaho lehalny ŭjezd, ź jakoj krainy i hetak dalej. Turcyja — heta prykład bieźvizavaj krainy. Ich prymie Turcyja, jany majuć prava tudy pryjechać», — tłumačyć Aleś Michalevič.
Ale kali ŭ čałavieka jość biełaruski pašpart, i jamu budzie pastaŭlena šenhienskaja viza jašče ŭ ZŠA, jon zmoža lacieć u Jeŭropu.
«Pobač, darečy, znachodzicca Mieksika, tam vielmi lohka budzie padacca na status biežanca. Albo taksama tam možna budzie padacca na jeŭrapiejskuju vizu», — raić advakat.
U jaki dzień u 2020-m mahli zdarycca pieramieny? Polski dypłamat vydaŭ knihu ab pracy ŭ Biełarusi i daŭ adkaz na heta pytańnie6
Kamientary