Biełyja dy čyrvonyja kvietki i mora śloz. Jak u Vilni sustrakali Palinu Šarendu-Panasiuk
Paśla čatyroch hadoŭ rastańnia eks-palitźniavolenaja aktyvistka Palina Šarenda-Panasiuk uźjadnałasia ź siamjoj. Na kranalnaj sustrečy na vilenskim vakzale prysutničali karespandenty «Našaj Nivy».
Zdajecca, čyhunačny vakzał u Vilni daŭno nie bačyŭ takoha natoŭpu. U budynku, što ŭ centry horada, sabralisia dziasiatki nieabyjakavych biełarusaŭ ź bieł-čyrvonymi kvietkami ŭ rukach. Pryjšli i byłyja palitźniavolenyja — niechta ź ich bačyŭ Palinu za kratami, a niechta prosta pryjšoŭ padtrymać žančynu. Z saboj biełarusy prynieśli ściahi i vialikuju raściažku «Łukašenku — u Haahu».
Za dziesiać chvilin da pryjezdu ciahnika ŭ zale źjaviŭsia Andrej Šarenda z małodšym synam — starejšy pabačyć maci tolki zaŭtra. Zaŭvažna ščaślivy mužčyna paprasiŭ žurnalistaŭ nie zakidvać pytańniami žonku, stomlenuju paśla doŭhaha padarožža, ale adznačyŭ — dla jaje baraćba praciahvajecca:
«Na žal, tak atrymałasia, što Palina vyjšła pa zakančeńni termina, navat nie adnaho, a troch. Toje, praz što prajšła Palina — heta piekła i žach. I zaraz hałoŭnaje — zrabić usio, kab usie astatnija [palitviaźni] jak maha chutčej vyjšli na volu».
Praź niekalki chvilin Palina vyjšła ź ciahnika. Žančyna pryvitała ŭsich słovami «Žyvie Biełaruś» i praź ślozy pačała raskazvać:
«Ja ŭjaŭlała hety momant usie tyja hady, što była za kratami. Dziakuj i nizki pakłon usim tym ludziam, jakija ŭ Biełarusi i za miežami Biełarusi dumali pra mianie, kłapacilisia i arhanizoŭvali ŭsiu hetuju dapamohu.
Ale ja chaču skazać, što my musim pamiatać pra tych ludziej, jakija zastalisia ŭ hetaj žyvadziorni, bo kałonija №24 — heta samaja sapraŭdnaja žyvadziornia. Tam zastałasia Volha Majorava, tam zastałasia Alena Hnaŭk, tam zastałasia Viktoryja Kulša. Situacyja ŭ hetych ludziej vielmi katastrafičnaja, jany ŭsie ŭ ŠIZA i PKT, amal usim im buduć fabrykavać 411 artykuł».
Asabliva Palina chvalujecca za Viktoryju Kulšu — miarkuje, što ŭ toj užo mahli admović nyrki. Kulša trymała haładoŭki miesiacami, admaŭlałasia ad ježy i pićcia, dapamohi lekaraŭ, uskryvała sabie vieny.
«Ź listapada 2024 hoda ŠIZA — heta ŭžo nie 10 dzion, a 15 dzion. Tam zrabili strašenny ramont, prosta zrabili padvał, i ŭjavicie sabie, jak tam čałaviek siadzić 15 dzion. Nas bieśpierapynna trymali ŭ hetych umovach katavańnia z vosieni 2021 hoda, kali nas pieršy raz kinuli ŭ ŠIZA i PKT.
U takoj situacyi čałaviek faktyčna nie byvaje na vulicy. Padličyła, što ŭ 2023 hodzie, naprykład, ja była na vulicy tolki 8 dzion, uvieś astatni čas — heta ŠIZA i PKT», — raskazvaje Palina.
Spytali ŭ žančyny i pra videa, jakoje ź joj zapisali padčas źniavoleńnia prapahandysty i pakazali na dziaržaŭnym telebačańni.
Pavodle słoŭ Paliny, toje intervju rabiłasia «z nažom la horła, ź pistaletam la patylicy».
Aktyvistka padkreślivaje, što dla jaje ŭsio jašče doŭžycca žnivień 2020 hoda, i ciapier biełarusy musiać praciahvać spravu, što nie darabili tady.
Svaje adčuvańni Palina apisvaje słovami «ŭvaskrašeńnie ź miortvych»:
«U peŭny momant dumała, što ja ŭžo nikoli nie vyjdu. Jość vialikaja niebiaśpieka, što moža nie vyjści Viktoryja Kulša. Ja bačyła jaje za dzień da taho, jak mianie vypuścili z hetaha pałonu, jana vyhladała vielmi žudasna.
Kali łaska, nie zabyvajciesia na hetych ludziej. Usimi siłami, usimi srodkami hrukacca va ŭsie dźviery, treba damahacca vyzvaleńnia hetych ludziej. Jany vielmi čakajuć vas».
«Naša Niva» — bastyjon biełaruščyny
PADTRYMAĆU jaki dzień u 2020-m mahli zdarycca pieramieny? Polski dypłamat vydaŭ knihu ab pracy ŭ Biełarusi i daŭ adkaz na heta pytańnie6
Kamientary