Čamu ludziej źbivajuć na piešachodnych pierachodach? Daśviedčany kiroŭca zadumaŭsia paśla taho, jak źbili jaho žonku

Čytač Onliner.by, kiroŭca sa stažam, padzialiŭsia svaim bačańniem situacyi — paśla taho, jak na piešachodnym pierachodzie źbili jaho žonku, jakaja pierachodziła darohu na dazvalalny sihnał śviatłafora.

U pačatku śniežnia ŭviečary na piešachodnym pierachodzie na vulicy Mścisłaŭca ŭ Minsku, nasuprać Doma miłasernaści, u DTZ paciarpieła žonka čytača.

— Jaje adkinuŭ na asfalt aŭtamabil, kiroŭca jakoha nie zaŭvažyŭ piešachoda, jaki spakojna išoŭ praz darohu na 14-j siekundzie zialonaha piešachodnaha śviatłafora, — raskazaŭ jon Onliner. — U žonki stres, siniaki na ściahnie, štany nie prydatnyja da vykarystańnia.

Kiroŭca ŭ panicy pasadziŭ jaje ŭ aŭto i pavioz u balnicu, ale pa darozie źmianiŭ maršrut i advioz dadomu, da muža. Prabačeńni i kampiensacyja byli pryniatyja.

Kiroŭca byŭ apytany nakont usich abstavin, ja prymusiŭ jaho «padźmuć» i pakazać usie dakumienty. Nijakich prykmiet lichactva, nachabstva ci apjanieńnia. Usie apraŭdańni źvialisia da adnaho: nie zaŭvažyŭ. My razyšlisia miram.

Pytańnie ŭ inšym: čytač, sam kiroŭca z 15-hadovym stažam, zadumaŭsia, čamu adbyvajucca takija najezdy na piešachodnych pierachodach.

— Ja pavieryŭ hetamu kiroŭcu, pavieryŭ na 100 pracentaŭ. Biaśśniežnaja zima, pastajannyja pryciemki, aślapleńnie lichtarami i farami ŭ hetaj ciemry i darožnym chaosie — heta sapraŭdnaje vyprabavańnie dla vačej i reakcyi kiroŭcy. Nie zaŭvažyŭ, kiepska vidać, kiepska aśvietlena — heta niebiaśpieka, DTZ, niepapraŭnyja nastupstvy.

Časam, nabližajučysia da piešachodnaha pierachodu, razumieješ, što nie možaš pierakanacca ŭ adsutnaści piešachoda, pakul całkam nie spynišsia — nastolki ciomna. A jak być, kali šeść pałos pierasiakajuć niekalki piešachodnych pierachodaŭ (jak na vulicy Filimonava ad «Akvamaryna» da vulicy Franciška Skaryny), i ŭsie jany ciomnyja i nierehulujemyja? — zadajecca pytańniem surazmoŭca.

U aktualnaj redakcyi PDR, darečy, farmuloŭka nastupnaja (p. 116): pry padjeździe da nierehulujemaha piešachodnaha pierachodu i (abo) viełasipiednaha pierajezdu kiroŭca pavinien dać pieravahu piešachodu i sastupić darohu viełasipiedystu. A raniej hety ž punkt praviłaŭ hučaŭ inakš: pry padjeździe da nierehulujemaha piešachodnaha pierachodu kiroŭca pavinien ruchacca z chutkaściu, jakaja dazvolić pry nieabchodnaści sastupić darohu piešachodam.

— Nienaležnaja aśvietlenaść piešachodnych pierachodaŭ Minska — adna z hałoŭnych umoŭ, jakija spryjajuć uźniknieńniu DTZ na ich, — praciahvaje čytač. — Pra aśvietlenaść pierachodaŭ na zaharadnych darohach, jakija prachodziać praź vioski i ahraharadki, možna navat nie havaryć. Heta łatareja, dzie staŭka — žyćcio i svaboda. Uzhadajcie ŭčastak darohi ad Biahomla da Dokšyc, na Brasłaŭ: pasiołkaŭ na darozie šmat, pierachodaŭ šmat. Ale aśviatleńnia niama.

Prava piešachod maje, ale biaśpieka realizacyi hetaha prava nie praduhledžanaja. Dumajecie, u Minsku inakš? Pajedziem pa vulicy Padlesnaj u viačerni ci ranišni čas pik. Pamiž hastranomam (Padlesnaja, 36) z adnaho boku i piešachodnym mastom nad čyhunkaj z druhoha boku jość piešachodny pierachod i aŭtobusny prypynak. Hrupami i paasobku ludzi vypraboŭvajuć los na piešachodnym pierachodzie, jaki nie aśvietleny lichtarami zusim. Źjeździcie tudy ŭ zmroku i vyprabujcie los.

Na «ziebru» ź jaje simvaličnymi čorna-biełymi pałosami žyćcia treba nakiravać śviatło, jakoje pieramoža niebiaśpieku, — zaklučyŭ kiroŭca.

«Absalutna zhodny z tym, što «nienaležnaja aśvietlenaść piešachodnych pierachodaŭ Minska — adna z hałoŭnych umoŭ, jakija spryjajuć uźniknieńniu DTZ na ich». U nas z hetym žachliva. Na zaharadnych trasach časam robiacca sproby padśviacić pierachod, ale ŭ lepšym vypadku heta tolki sam pierachod. A varta było b padśviatlać padychod da jaho, bo kiroŭca hladzić tudy, i tam tolki možna zahadzia ŭbačyć piešachoda, — adznačyŭ adzin z čytačoŭ. — Kali piešachody pačnuć vykonvać p. 17.1 PDR, kiroŭcy buduć bolš aściarožnymi pierad pierachodami, a na «ziebrach» źjaviacca dobryja lampy, mahčyma, usio zrušycca ŭ lepšy bok», — napisaŭ jašče adzin čytač.

• 36
• 1
• 0
• 0
• 1
• 4
• 1
• 1