Arhiencinski cud. Jak Milej utajmavaŭ inflacyju mienš čym za hod

«Hrošaj niama»

Na adnym ź pieradvybarčych mitynhaŭ Milej źjaviŭsia ź bienzapiłoj, što pavinna było simvalizavać nieabchodnaść skaračeńnia dziaržaŭnych vydatkaŭ. U 2023 hodzie jon vyjhraŭ prezidenckija vybary, a kiravańnie krainaj raspačaŭ słovami «Hrošaj niama» i anansavaŭ radykalnyja reformy skiravanyja na ŭtajmavańnie inflacyi i derehulacyju ekanomiki.

Milej viadomy taksama nieprymirymaj pazicyjaj da vieniesuelskaha dyktatara Nikałasa Madury i niežadańniem udzielničać u miždziaržaŭnym błoku BRICS, u jakim viadučuju rolu adyhryvajuć Kitaj i Rasieja. Adzin z najbolš viadomych jaho łozunhaŭ hučyć: «¡Viva la libertad, carajo!», što možna pieradać jak «Žyvie svaboda, čort vaźmi!».

«Kali Chaŭjer Milej u śniežni 2023 hoda zaniaŭ pasadu prezidenta, ceny raśli na 25% štomiesiac. Milej pryniaŭ rašeńnie zrabić toje, na što nie advažvalisia papulisckija levyja ŭrady dziesiacihodździami: rezka skaracić dziaržaŭnyja vydatki i pravieści zvalnieńni ŭ dziaržaŭnym siektary», — zaŭvažaje Jacek Frončyk, redaktar Business Insider Polska.

Bienzapiła pracuje, a piłavińnie lacić

Jašče ŭ červieni ekśpierty sa skiepsisam padychodzili da ekanamičnych reformaŭ novaha prezidenta Arhienciny, ale apošnim časam skiepsis pačynaje mianiacca na pazityŭnaje ździŭleńnie.

Pavodle dadzienych Nacyjanalnaha instytuta statystyki i pierapisaŭ nasielnictva (INDEC) miesiačnaja inflacyja ŭ Arhiencinie źniziłasia ŭ kastryčniku da 2,7% z 3,5% u vieraśni, što źjaŭlajecca najnižejšym pakaźnikam ź listapada 2021 hoda.

Pavialičyć

Hadavaja inflacyja ŭsio jašče vysokaja, ale jana ŭpieršyniu za niapoŭny hod źniziłasia nižej za 200%, dasiahnuŭšy 193% u kastryčniku. Pry takich tendencyjach uzrovień inflacyi vyšej za 100% chutka stanie minuŭščynaj.

U žniŭni zarpłaty ŭ Arhiencinie pavialičylisia na 4,7%, što pry inflacyi 4,2% aznačaje realny rost. Adnak u hadavym paraŭnańni zarpłaty vyraśli na 181,9% pry inflacyi 237%, što śviedčyć ab značnym źnižeńni pakupnickaj zdolnaści.

Niaciažka zdahadacca, što reformy Mileja zajmieli pabočnyja efiekty. Uzrovień biespracoŭja pavialičyŭsia da 7,6% u druhim kvartale hetaha hoda z 6,2% hod tamu.

«Bolš za pałovu nasielnictva krainy apynułasia ŭ biednaści. U minułym hodzie 41,7% z 46 miljonaŭ arhiencincaŭ žyli ŭ biednaści, a ŭ pieršaj pałovie hetaha hoda hety pakaźnik pavialičyŭsia da 52,9%», — adznačaje Frončak sa spasyłkaj na dadzienyja Reuters i BBC.

Aŭtar pry hetym nahadvaje, što ŭ 2017 hodzie ŭ biednaści žyło 25% nasielnictva, a heta aznačaje, što niehatyŭnaja tendencyja pačałasia zadoŭha da Mileja.

Šokavaja terapija akupicca ŭžo ŭ nastupnym hodzie — ličać u MVF

Paśla dziesiacihodździaŭ sacyjalistyčnaj palityki Arhiencina pieražyvaje najbolš surjoznuju ekanamičnuju karekcyju z časoŭ kryzisu 2001 hoda. Milej zrabiŭ hałoŭnym pryjarytetam abaronu prava ŭłasnaści, kab pryciahnuć inviestycyi ŭ ekanomiku.

U chutkim tempie jon zakryŭ 13 ministerstvaŭ i zvolniŭ bolš za 30 tysiač čynoŭnikaŭ, što składaje kala 10% fiederalnych rabotnikaŭ. U vyniku dziaržava ŭpieršyniu za 12 hadoŭ pačała atrymlivać biudžetnyja praficyty. Źmieny adrazu ž adbilisia na źnižeńni vydatkaŭ pa absłuhoŭvańni dziaržaŭnaha doŭhu, a inviestary pačali vieryć u adnaŭleńnie płaciežazdolnaści krainy.

Pavodle prahnozaŭ MVF, VUP Arhienciny paśla źnižeńnia ŭ 2023 (-1,6%) i 2024 hadach (-3,5%) vyraście na 5% u nastupnym hodzie. Heta dazvolić kampiensavać straty i vyvieści ekanomiku na šlach ustojlivaha rostu.

• 72
• 1
• 2
• 0
• 2
• 1
• 0
• 1