Vučonyja adkryli amaładžalny efiekt raspaŭsiudžanaha preparatu ad dyjabietu
Ekśpierymienty nad małpami pakazali, što preparat moža źnizić bijałahičny ŭzrost małpaŭ na 6 hadoŭ, što adpaviadaje 18 hadam čałavieka.
Jak piša Daily Mail, vučonyja ź Piekinskaha ŭniviersiteta vyjavili, što taki šyroka raspaŭsiudžany preparat ad dyjabietu, jak mietfarmin, prykmietna zapavoliŭ stareńnie ŭ małpaŭ.
U daśledavańni vykarystoŭvalisia małpy vidu makak-krabajedaŭ (Cynomolgus monkeys). Hety vid prymataŭ ličycca fizijałahična i funkcyjanalna blizkim da čałavieka, što robić ich idealnymi madelami dla daśledavańniaŭ.
Padčas daśledavańnia małpy va ŭzroście ad 13 da 16 hadoŭ, što adpaviadaje 40-50 hadam čałavieka, atrymlivali mietfarmin u daziroŭcy, anałahičnaj čałaviečaj.
Ekśpierymient praciahvaŭsia try z pałovaj hady, što ekvivalentna 10 hadam žyćcia čałavieka.
Kožnyja try miesiacy kamanda vučonych pravodziła šyrokija daśledavańni małpaŭ, uklučajučy analizy kryvi i ahlady fizičnaha stanu, a taksama analiz tkanak i kletak. Z žyviołami taksama pravodzili kahnityŭnyja testy, jakija aceńvali pamiać i navyki navučańnia.
Vyniki, apublikavanyja ŭ časopisie Cell, pakazali zapavoleńnie stareńnia mozhu na 6 hadoŭ (ekvivalentna 18 čałaviečym hadam), palapšeńnie pamiaci i zdolnaści da navučańnia.
Małpy, jakija atrymlivali mietfarmin, lepš spraŭlalisia z zadačami na pamiać i demanstravali lepšyja zdolnaści da navučańnia ŭ paraŭnańni z prymatami, jakija nie atrymlivali preparat. Daśledavańnie taksama pakazała palapšeńnie pracy piačonki, serca, lohkich, kišečnika i myšačnaj tkanki.
Samyja prykmietnyja palapšeńni adbylisia ŭ łobnaj doli mozhu, adkaznaj za pamiać, maŭleńnie i rašeńnie zadač. Tam taŭščynia tkanak navat pavialičyłasia, što moža śviedčyć pra palapšeńnie kahnityŭnych funkcyj.
Daśledčyki śćviardžajuć, što achoŭny efiekt mietfarminu suprać stareńnia moža być całkam asobnym ad upłyvu, jaki jon akazvaje na ŭzrovień cukru ŭ kryvi, pakolki preparat uździejničaje niepasredna na niejrony. U małpaŭ, jakija prymali mietfarmin, byli zafiksavanyja minimalnyja źmieny ŭzroŭniu cukru ŭ kryvi.
Aŭtary zaŭvažajuć, što, niahledziačy na toje, što ŭ adnoj z małpaŭ padčas ekśpierymientu raźviłasia chvaroba nyrak, surjoznych pabočnych efiektaŭ u bolšaści nie było.
Preparat aktyvuje peŭny hien, jaki ŭpłyvaje na niekalki važnych funkcyj arhanizma: reahavańnie na stres, pracesy zapaleńnia, abmien rečyvaŭ, a taksama na padtrymku hamieastazu — zdolnaści arhanizma samarehulavacca i padtrymlivać bałans dla narmalnaha funkcyjanavańnia.
Aŭtary adznačajuć, što ich daśledavańnie źjaŭlajecca važnym krokam napierad u sprobach zapavolić stareńnie čałavieka. Jany padkreślivajuć, što ciapier uvaha hieryjatryčnaj miedycyny pastupova pieramiaščajecca ź lačeńnia asobnych chraničnych chvarob na bolš šyrokija sistemnyja padychody, nakiravanyja na supraćdziejańnie stareńniu ŭ cełym.
Adkryćcio moža stać značnym praryvam na fonie pavieličeńnia kolkaści pažyłoha nasielnictva i rostu zachvorvańniaŭ, źviazanych sa stareńniem, takich jak chvaroba Alchiejmiera.
U jaki dzień u 2020-m mahli zdarycca pieramieny? Polski dypłamat vydaŭ knihu ab pracy ŭ Biełarusi i daŭ adkaz na heta pytańnie9
Kamientary