Deputat Varaniecki zajaviŭ, što salidarny z pratestoŭcami, jakija aburylisia arhanizacyjaj prezidenckich vybaraŭ

Padčas sustrečy z vybarnikami svajoj akruhi 3 vieraśnia deputat Pałaty pradstaŭnikoŭ Valer Varaniecki zajaviŭ, što salidarny z pratestoŭcami, jakija aburylisia arhanizacyjaj sioletnich prezydenckich vybaraŭ, piša Radyjo Svaboda.

Na sustreču z deputatam ad Śvisłackaj akruhi № 94 Valeram Varanieckim pryjšli 150 čałaviek. Sustreča prachodzić u pamiaškańni Mienskaha haradzkoha pałaca kultury.

«Ludzi mieli prava aburycca tym, jak byli arhanizavanyja vybary. I ludzi majuć prava na mirny pratest. My ŭsie pavinny razumieć, što hetaja kraina, hetaja ziamla naležyć narodu. I niekali našyja prodki abaraniali jaje z kroŭju, z potam, kab my žyli na hetaj ziamli budučy haspadarami. Narod — krynica ŭłady — maje prava vyznačać, jak žyć na hetaj ziamli», — skazaŭ Valer Varaniecki padčas sustrečy.

Jon zajaviŭ, što «salidarny z tym, što ludzi aburanyja» i padkreśliŭ, što jany «majuć prava svajo abureńnie pakazać dziaržavie».

«Na žal, zamiest taho, kab z razumieńniem padyjści da hetaha, vyjści na dyloh, ułady pakazali siłu. Byŭ piarojdzieny rubikon. Taja čyrvonaja rysa, za jakuju pierachodzić było nielha. Kanstytucyja harantuje nam pavahu da nas, hramadzian. I kateharyčna nie dapuskaje hvałtu, katavańniaŭ», — dadaŭ deputat.

22 žniŭnia deputat Varaniecki zaklikaŭ raśśledavać fakty hvałtu z boku siłavikoŭ. U svaim Fejsbuku jon prakamentavaŭ zajavu ministra ŭnutranych spraŭ Juryja Karajeva, jaki padčas sustrečy ź mitrapalitam Kandrusievičam skazaŭ, što nie davaŭ «kamandaŭ na žorstkaje abychodžańnie ź ludźmi, što na vulicach, što pa šlachu kanvajavańnia, tym bolš u miescach utrymańnia».

«Mienavita tamu siońnia, nie adkładajučy, naša pravaachoŭnaja systema, dziaržava ŭ cełym pavinny aperatyŭna dać pravavuju acenku tamu, što adbyłosia», — napisaŭ Valery Varaniecki.

Jon padkreśliŭ, što pa kožnym zvarocie paciarpiełych treba pravieści naležnuju i starannuju pravierku ŭ adpaviednaści z patrabavańniami zakonu, i vinavatych pavinny pryciahnuć da adkaznaści. Taksama Varaniecki zajaviŭ, što infarmacyja pra dapuščanyja parušeńni z boku słužbovych asob orhanaŭ unutranych spraŭ pavinna svoječasova aśviatlacca ŭ ŚMI.

• 0
• 0
• 0
• 0
• 0
• 0
• 0
• 0