Сёння зборная Беларусі бярэ старт у досыць экзатычным для нашых краёў відзе спорту
Пляжны футбол — адзін з нямногіх відаў спорту, дзе засталіся беларусы пасля міжнароднага бану. Украіна адмовілася ад удзелу, бо арганізатары дапусцілі туды беларусаў.
У Дубаі (ААЭ) стартаваў чэмпіянат свету па пляжным футболе. 16 камандаў разбітыя на чатыры групы.
Мужчынская зборная Беларусі трапіла ў групу С з Сенегалам, Калумбіяй і Японіяй. Першы матч з Сенегалам ужо сёння ў 18:30.
У плэй-оф выходзяць дзве каманды з групы.
Зборная Украіны адмовілася ўдзельнічаць у спаборніцтвах менавіта таму, што арганізатары дапусцілі беларусаў.
Пляжны футбол з'явіўся на пляжах Рыа-дэ-Жанейра, а чэмпіянаты свету праводзяцца з 1995 года. Спачатку яны праходзілі штогод пад эгідай Beach Soccer Worldwide, а з 2005 года праводзяцца пад апекай ФІФА (Міжнароднай федэрацыі футбола).
Прычым з 2009 года — раз на два гады. Бразілія 14 разоў станавілася пераможцам, Партугалія і Расія па тры разы, Францыя адзін раз.
Зборная Беларусі брала ўдзел у чэмпіянатах двойчы: у 2019 і 2021 гадах. Тады яна займала трэцяе месца ў групе, і, натуральна, не прабівалася ў плэй-оф.
Цікава, што мундыялі часам праводзяцца ў экзатычных для нас месцах. Спачатку яны праводзіліся выключна ў Бразіліі (ажно 13 разоў), але таксама на Багамах і Таіці, а наступны чэмпіянат пройдзе на Сэйшэлах.
Асноўныя правілы:
Па стане на 2023 год у сусветным рэйтынгу пляжнага футбола ўдзельнічаюць 103 мужчынскія команды (у звычайным вялікім футболе — 210 зборных), а таксама 218 мужчынскіх клубаў (у вялікім футболе — камандаў процьма).
Гульня павінна праходзіць выключна на пяску, глыбіня якога павінна складаць не менш за 40 сантыметраў. Поле павінна быць памерам 35-37 метраў у даўжыню і 26-28 метраў у шырыню.
Гульнявая зона пазначаецца 10-сантыметровай лініяй. Сама пляцоўка складаецца з дзввюх роўных зон для кожнай каманды. Вышыня варот павінна складаць 2,2 метра пры шырыні 5,5 метра.
У гульні ўдзельнічаюць дзве каманды па пяць чалавек: аднаго варатара і чатырох палявых гульцоў. У каманд ёсць не больш за сем запасных гульцоў. Абмежаванняў па колькасці замен няма: іх можна ажыццяўляць у любы час без чакання спынення гульні.
Матч складаецца з трох перыядаў па 12 хвілін, паміж якімі ёсць троххвілінныя тайм-аўты. Гульнявы час спыняецца пасля забітага гола, прызначэння пенальці, прабіцця штрафнога ўдару або траўмы гульца.
Нічыйны вынік пасля асноўнага часу не дапускаецца. Калі лік застаецца роўным, прадугледжаны дадатковы троххвілінны перыяд. Калі і пасля гэтага няма пераможцы, лёс сустрэчы высвятляецца ў серыі пенальці. Кожная каманда мае тры спробы. Калі пасля гэтага лік роўны, то пенальці працягваюцца да так званага «залатога гола».
Пасля аўту мяч у гульню можна ўводзіць як рукамі так і нагамі.
Выйшаўшы за межы зоны з мячом, галкіпер не можа ў яе вяртацца і забіраць мяч у рукі.
Забаронена перашкаджаць гульцу, які выконвае ўдар «нажніцы» або ўдар праз сябе.
Матчы зборнай Беларусі можна будзе глядзець на сайце Беларускай федэрацыі футбола.
Каментары