«У імя перамогі міру і гуманістычных ідэалаў». Уладзімір Канаплёў просіць дазволіць беларускім гандбалістам гуляць хоць з Азіяй і Афрыкай
Старшыня Беларускай федэрацыі гандбола, колішні блізкі паплечнік Лукашэнкі Уладзімір Канаплёў накіраваў ліст кіраўніку Міжнароднай федэрацыі гандбола (ІГФ) Хасану Мустафе з просьбай дазволіць зборным і клубам Беларусі браць удзел у міжнародных таварыскіх турнірах і матчах з камандамі Афрыкі, Азіі і Блізкага Усходу.
Канаплёва, як ён піша, засмучае тая акалічнасць, што калі ў некаторых іншых міжнародных спартыўных федэрацыях беларусаў да спаборніцтваў дапускаюць, то ў гандболе не так з-за дзейнай забароны, якую наклала ІГФ.
«Сваім рашэннем ад 4 сакавіка 2022 года ІГФ фактычна забараніла камандам з іншых краін гуляць з нашымі клубамі і зборнымі, хоць самі спартсмены з гэтых краін гатовыя і хочуць гуляць з намі», — смуткуе Канаплёў.
Між тым, на ягоную думку, «акрамя негатыўных наступстваў для беларускага гандбола, гэта ні да чаго не прывяло». А негатыўныя наступствы такія, што моладзь ідзе займацца не гандболам, а іншымі відамі спорту, у якіх міжнародныя федэрацыі не такія прынцыповыя. А адхіленне беларускіх гандбалістаў ад міжнародных спаборніцтваў прывяло да таго, што
«мы не толькі засталіся без асноўнага інструмента папулярызацыі, але і без істотнай крыніцы прыцягнення фінансавых актываў з боку спонсараў і камерцыйных партнёраў, што на сёння паставіла нас практычна на мяжу выжывання».
Усё гэта, як кажа беларускі спартыўны чыноўнік міжнароднаму, «парушае не толькі ўсе базавыя прынцыпы Міжнароднага алімпійскага руху, але і нашы даўнія, сяброўскія стасункі».
«Асабіста я ніколі і ні пры якіх абставінах так не зрабіў бы. Ніколі не паступіўся б прынцыпамі прыстойнасці і адказнасці, нават калі б мне гэта пагражала адстаўкай або звальненнем з пасады», — маральна цісне на Хасана Мустафу Канаплёў.
У сувязі з гэтым ён просіць вывучыць практыку працы менш прынцыповых федэрацый і «не рабіць нас ізгоямі ва ўсёй спартыўнай супольнасці, калі мы гэтага абсалютна не заслугоўваем».
Ніводны беларускі гандбаліст, маўляў, ні ў якіх ваенных дзеяннях удзелу не прымае, і «ўсе мы вельмі шкадуем пра тое, што адбываецца, па-чалавечы перажываем і зычым усім народам толькі міру і росквіту».
Дзеля таго «ў імя перамогі міру і гуманістычных ідэалаў, для нашай агульнай будучыні» і з надзеяй «на ваш аўтарытэт, мудрасць, каласальны прафесійны досвед і чалавечае разуменне» Канаплёў просіць кіраўніка ІГФ «адклікаць або зняць існыя забароны, дазволіўшы камандам з Афрыкі, Азіі і Блізкага Усходу гуляць з намі хоць бы ў міжнародных таварыскіх матчах і турнірах».
Беларусаў дапусцілі да Азіяцкіх гульняў, на якіх яны пройдуць кваліфікацыю да Алімпіяды-2024. Але ёсць дзве ўмовы
Беларусы возьмуць удзел у чэмпіянаце Еўропы яшчэ па адным цікавым відзе спорту. Сярод удзельнікаў Нігерыя, Танзанія і нават Нямеччына
У Беларусі правялі чэмпіянат Еўропы па вельмі дзіўным відзе спорту
Палітвязня, які заплаціў уладам $775 тысяч кампенсацыі і зняўся ў фільме БТ, асудзілі яшчэ на 9 гадоў11
Каментары