Telegram vypuściŭ pieršaje ŭ hetym hodzie abnaŭleńnie. Pahladzieli, što novaha
Telegram vypuściŭ novaje abnaŭleńnie 9.4 — pieršaje ŭ hetym hodzie. Ciapier tut možna aŭtamatyčna pierakładać paviedamleńni na biełaruskuju movu i paŭtorna ŭvachodzić u akaŭnt biez sms-koda. Ale niekatoryja funkcyi — tolki dla tych, chto maje Premium-padpisku.
Fota: telegram.org
Kamanda Telegram vypuściła dla miesiendžara svajo pieršaje ŭ 2023 hodzie abnaŭleńnie pad numaram 9.4.
U im 10 novych funkcyj. Voś jany:
- Uvachod z dapamohaj Apple ID i akaŭnta Google. Z hetaha času pry paŭtornym uvachodzie ŭ svoj telehram-akaŭnt nie abaviazkova kožny raz zapytvać sms-kod. Možna prosta ŭvajści pry dapamozie hatovych Apple i Google ID. Pry hetym parol ad dvuchfaktarnaj aŭtentyfikacyi ŭsio roŭna treba ŭvodzić, kali jon byŭ ustalavany.
- Pierakłady paviedamleńniaŭ. Tyja, chto maje Premium-padpisku ciapier zmohuć chutka i całkam pierakładać paviedamleńni z usich čataŭ, hrup i kanałaŭ na inšyja movy, u tym liku na biełaruskuju. Zvyčajnym karystalnikam budzie dastupny pierakład tolki asobnych skazaŭ.
- Hadavaja padpiska Premium. Źjaviłasia mahčymaść apłacić Premium na hod i pry hetym atrymać skidku ŭ 35-45% na ŭsie premijalnyja funkcyi. Hadavuju padpisku taksama možna padaryć inšamu karystalniku.
- Kanstruktar avatarak. Ciapier lubyja stykiery i animavanyja emodzi možna pieratvaryć u profilnyja avatarki akaŭntaŭ, čataŭ, hrup i kanałaŭ. Hetaja funkcyja dastupnaja absalutna dla ŭsich karystalnikaŭ niezaležna ad najaŭnaści Premium.
- Pošuk pa katehoryjach i novyja nabory emodzi. U mieniu reakcyj i statusaŭ, a taksama ŭ paneli stykieraŭ i emodzi źjaviŭsia zručny pošuk pa katehoryjach. Akramia taho, usie emodzi ciapier možna ŭbačyć u poŭnym pamiery pry doŭhim naciskańni pierad adpraŭleńniem. Dadadzienyja i 10 novych naboraŭ emodzi.
- Interaktyŭnyja emodzi. U Telegram dadali interaktyŭnyja viersii emodzi. Pry asobnym ich adpraŭleńni ŭ čacie, a zatym naciskańni na ich vy razam z surazmoŭcam ubačycie animacyju. Hetyja interaktyŭnyja emodzi taksama dastupnyja ŭ jakaści reakcyj.
- Chutkaje dadavańnie botaŭ. Ciapier u interfiejsach roznych botaŭ źjaviŭsia śpis vašych siabroŭ, hrup i čataŭ, kudy možna chutka ich dadać.
- Dazvoł na adpraŭku miedyja. Z hetaha času administratary čataŭ i hrup mohuć zabaraniać asobnym karystalnikam dasyłać toje ci inšaje miedyja (hałasavyja paviedamleńni, videa i h.d). Taksama možna im prosta adklučyć mahčymaść dasyłać tekstavyja paviedamleńni.
- Aŭtazachavańnie miedyja. Telegram ciapier dazvalaje vybirać čaty, u jakich vašy miedyja buduć aŭtamatyčna zachoŭvacca ŭ pamiać pryłady z mahčymaściu vybaru pamieru i farmatu fajłaŭ, jakija zachoŭvajucca.
- Bolš padrabiaznaja statystyka vykarystańnia interneta. U raździele naładaŭ miesiendžara «vykarystańnie schovišča i sietki» źjavilisia bolš padrabiaznaja infarmacyja i dyjahramy, jakija mohuć dapamahčy skaracić spažyvańnie internet-trafiku.
Abnaŭleńnie dastupnaje dla ŭsich pryład.
Kamientary