Ukraina pavinna pasłać Trampa za rasijskim vajskovym karablom — krynica The Times u Minabarony Brytanii

Jak piša The Times, pakul čynoŭniki NATA i ES sprabavali asensavać źmieny ŭ pryjarytetach amierykanskaj palityki paśla zajavy novaha kiraŭnika Pientahona Pita Chiehseta pra toje, što «surovyja stratehičnyja realii nie dazvalajuć Złučanym Štatam Amieryki skancentravacca ŭ pieršuju čarhu na biaśpiecy Jeŭropy», acency płanaŭ viartańnia Ukrainy da miežaŭ 2014 hoda jak «nierealistyčnych», a pierśpiektyŭ jaje dałučeńnia da NATA jak małaimaviernych, stała viadoma, što Tramp pravioŭ pieramovy z Pucinym.

Razmova z Rasijaj da kansultacyj z Ukrainaj stała istotnym adychodam ad palityki jahonaha papiarednika, Džo Bajdena, jaki nastojvaŭ na pryncypie «ničoha pra Ukrainu biez Ukrainy».

Apošniaja navina vyklikała sapraŭdny šok u čynoŭnikaŭ NATA, jakija terminova sabralisia ŭ kułuarach dla abmierkavańnia mahčymych nastupstvaŭ i vypracoŭki adpaviednaj reakcyi.

Pa słovach krynicy va USU, Ukraina była ŭ šoku. «Situacyja niadobraja. Pieramovy pra Ukrainu biez Ukrainy i pra jeŭrapiejskuju biaśpieku bieź Jeŭropy», — cytuje jaje słovy vydańnie.

Zaniepakojenaść vykazvali i čynoŭniki ŭ brytanskim Ministerstvie zamiežnych spraŭ. «Zdymicie harantyi biaśpieki i pierśpiektyvu siabroŭstva ŭ NATA — i Pucin, zdajecca, hatovy da pieramoŭ», — prakamientavała The Times adna z krynic va ŭradzie.

U Ministerstvie abarony Vialikabrytanii, što znachodzicca na supraćlehłym baku vulicy, panavała razhublenaść.

«Niekatoryja z nas kazali: ukraincy try hady vajavali, hublali svaich synoŭ i dačok nie dla taho, kab ich adchilili ad abmierkavańnia ich budučyni. Na ich miescy ja b adkazaŭ Trampu hetak ža, jak abaroncy vostrava Źmiainy», — zajaviŭ surazmoŭca vydańnia, majučy na ​​ŭvazie viadomy adkaz ukrainskich pamiežnikaŭ rasijskamu vajskovamu karablu ŭ pieršyja dni vajny.

Ministr abarony Vialikabrytanii Džon Chili i brytanskaja delehacyja ŭ Bruseli pracavali da poźniaj nočy ŭ rezidencyi Vialikabrytanii, kaardynujučy reakcyju na situacyju.

Strymana vykazvajučysia ŭ čaćvier ranicaj, Chili zajaviŭ presie: «Nijakich pieramoŭ pra Ukrainu biez Ukrainy być nie moža. My chočam tryvałaha miru i niedapuščeńnia novaha kanfliktu i ahresii. I nie varta zabyvać, što Rasija zastajecca pahrozaj daloka za miežami Ukrainy».

Ministr abarony ZŠA Pit Chehsiet u svaju čarhu adznačyŭ, što pieramovy Trampa z Pucinym «biezumoŭna, heta nie zdrada».

Vydańnie adznačaje, što Ukraina choča, kab Vialikabrytanija i Jeŭropa zaniali bolš ćviorduju pazicyju ŭ adnosinach da ZŠA, bo niekatoryja jeŭrapiejskija dypłamaty pabojvajucca, što kali Łondan nie vykažacca, to i nichto nie vykažacca. Jeŭrapiejcy bajacca, što Tramp i Pucin mohuć damovicca nad hałovami jeŭrapiejskich uradaŭ.

Mnohija ŭ Jeŭropie, asabliva va ŭschodniaj jaje častcy, pravodziać paraleli ź Miunchienskim pahadnieńniem 1938 hoda. Łatvijski jeŭradeputat Rychards Kołs u svajoj publikacyi ŭ sacsietcy X napisaŭ: «Miunchien-2… Jeŭropa, rychtujsia».

Niekatoryja vysokapastaŭlenyja jeŭrapiejskija dypłamaty abvinavacili administracyju Trampa ŭ tym, što jana «kinuła Ukrainu pad aŭtobus» (achviaravała Ukrainaj u svaich intaresach, pakinuła jaje biez padtrymki dziela ŭłasnaj vyhady. — NN).

Adzin ź ich adznačyŭ: «Klučavyja sastupki byli zroblenyja zahadzia», inšy nazvaŭ heta katastrofaj: «Čamu asłablać našu pazicyju jašče da pačatku pieramoŭ? Ukraina prapanavała redkaziamielnyja minierały ŭzamien. A što paabiacała Rasija? Ničoha! Jany zachoŭvajuć svaje impierskija ambicyi».

Vydańnie źviartaje ŭvahu, što administracyja ZŠA nie papiaredziła svaich partnioraŭ u Jeŭropie pra pieramovy z Pucinym. Tak, kiraŭnica zamiežnapalityčnaha viedamstva ES Kaja Kałas praviała pieramovy ź vice-prezidentam ZŠA Džejmsam Vensam na samicie pa štučnym intelekcie ŭ Paryžy, u toj čas jak Tramp u hety momant razmaŭlaŭ z Pucinym.

Paśla zakančeńnia sustrečy Kałas apublikavała fota sa staršynioj Jeŭrakamisii Ursułaj fon der Lajen i Vensam u raskošnym paryžskim pałacy XVII stahodździa, dadaŭšy podpis: «Dobraja sustreča».

Zhadaŭšy supracoŭnictva Pucina z Paŭnočnaj Karejaj, Kitajem i Iranam, Kałas padkreśliła: «Pakolki našy praciŭniki kaardynujuć svaje dziejańni, my pavinny rabić toje samaje».

Praz hadzinu Tramp paviedamiŭ u sacsietkach pra svaje pieramovy z Pucinym, ale Vens ničoha nie kazaŭ pra ich ni Kałas, ni fon der Lajen.

Adzin z vysokapastaŭlenych čynoŭnikaŭ brytanskaha ŭrada adznačyŭ vydańniu: «Ukraina pavinna być za stałom pieramoŭ i zastavacca ŭ centry luboj damoŭlenaści. Ujavicie sabie, što Hiermanija i ZŠA zaklučajuć pahadnieńnie ab pieradačy Uelsa padčas Druhoj suśvietnaj vajny biez udziełu Brytanii».

• 8
• 2
• 4
• 4
• 0
• 0
• 6
• 0