Płany Trampa pa Ukrainie aznačajuć rachunak na $3 tryljony dla jeŭrapiejskich sajuźnikaŭ
Jakuju b metu ni pastaviŭ pierad saboj prezident ZŠA ŭ dačynieńni da Ukrainy, zrazumieła adno: Jeŭropa nie hatova ŭziać na siabie vialikuju dolu ciažaru.
Jak piša Bloomberg, Donald Tramp pačaŭ dyktavać Jeŭrasajuzu, što jeŭrapiejcam varta rabić dla miru va Ukrainie, pryčym jaho patrabavańni mohuć stać surjoznym vyprabavańniem dla błoka. U sieradu, 12 lutaha, Tramp parazmaŭlaŭ z Uładzimiram Pucinym, raspačaŭšy praces padrychtoŭki da mirnych pieramoŭ.
Adnačasova ministr abarony ZŠA Pit Chiehset zajaviŭ partnioram pa NATA, što nie varta raźličvać na ŭvachodžańnie Ukrainy ŭ aljans abo viartańnie joj usich akupavanych terytoryj. Jon taksama daŭ zrazumieć, što amierykanskija vojski nie buduć udzielničać u miratvorčaj misii.
Jeŭropa sutyknułasia ź ciažkim vybaram: albo ŭziać na siabie adkaznaść za biaśpieku, albo sutyknucca z rasijskaj pahrozaj sam-nasam.
Pavodle padlikaŭ Bloomberg Economics, harantyi biaśpieki Ukrainy i pašyreńnie vajskovaha patencyjału ES mohuć kaštavać błoku dadatkovyja $3,1 tryljona na praciahu nastupnaha dziesiacihodździa.
Tolki na adnaŭleńnie ŭkrainskaj armii paśla ŭrehulavańnia kanfliktu moža spatrebicca kala $175 miljardaŭ za 10 hadoŭ. Akramia taho, na miratvorčuju misiju z 40 000 vajskoŭcaŭ treba budzie kala $30 miljardaŭ.
Bolšaść finansavańnia nakirujecca na pavieličeńnie vajennaha patencyjału jeŭrapiejskich krain, što moža davieści sukupnyja abaronnyja vydatki ES da 3,5% VUP u adpaviednaści z apošnimi abmierkavańniami ŭ NATA.
Dadatkovyja srodki pojduć na finansavańnie artyleryjskich zapasaŭ, sistem SPA i rakietnych sistem. Heta ŭmacuje ŭschodnija miežy ES, padrychtuje ŭzbrojenyja siły błoka da chutkaha razhortvańnia i pasłužyć šturškom da masavaha rostu jeŭrapiejskaj abaronnaj pramysłovaści.
Pa danym Bloomberg Economics, kali hetyja vydatki buduć finansavacca praz zapazyčańni, piać najbujniejšych jeŭrapiejskich krain NATA — Vialikabrytanija, Francyja, Hiermanija, Ispanija i Italija — mohuć nazapasić $2,7 tryljona dadatkovaha doŭha na praciahu nastupnaha dziesiacihodździa.
ES sprabuje znajści bałans pamiž zachavańniem partniorstva z ZŠA i padrychtoŭkaj da mahčymaha supraćstajańnia z Vašynhtonam pa handlovych pytańniach. Tramp padkreślivaje, što kanflikt va Ukrainie bolš važny dla Jeŭropy, čym dla Amieryki, što daje jamu ryčah cisku. Kali pieramovy z Pucinym pravalacca, imidžavyja straty dla Trampa buduć minimalnymi, a Jeŭropa sutykniecca z pahrozaj ad Rasii.
Kab zabiaśpiečyć nieabchodnyja resursy, jeŭrapiejskim uradam daviadziecca pierahledzieć biudžetnuju palityku, naroščvać abaronnuju pramysłovaść i, mahčyma, pajści na sumiesnaje finansavańnie praz vypusk daŭhavych abaviazacielstvaŭ. Adnak niekatoryja krainy, takija jak Hiermanija, Francyja i Italija, nie śpiašajucca navat kanfiskavać $300 miljardaŭ zamarožanych rasijskich aktyvaŭ dla finansavańnia adnaŭleńnia Ukrainy.
Heta stavić ES pierad pryniaćciem stratehičnaha rašeńnia: albo jon stanovicca sapraŭdnaj hieapalityčnaj siłaj, albo praciahvaje dziejničać jak ekanamičny sajuz, dzie nacyjanalnyja intaresy pieravažajuć nad kalektyŭnaj biaśpiekaj.
Na praciahu dziesiacihodździaŭ jeŭrapiejskija lidary adkładali rašeńni pa abaronie, biudžetnych pytańniach i pramysłovaj stratehii, što ciapier pieraškadžaje vypracavać adzinuju palityku. Kali heta budzie praciahvacca, Tramp i Pucin sami vyznačać budučyniu ES.
Palitviaźnia, jaki zapłaciŭ uładam 31 bitkoin kampiensacyi i źniaŭsia ŭ filmie BT, asudzili jašče na 9 hadoŭ10
Kamientary
no.. ni mozhov ni jaic u tupoho levaċja nie chvatiło.