CHAMAS adchiliŭ prapanovu Izraila ab pieramirji ŭ abmien na vyzvaleńnie zakładnikaŭ
Dla Izraila ŭmovy CHAMAS kateharyčna nieprymalnyja.
Hrupoŭka CHAMAS, jakaja kantraluje siektar Haza, adkinuła prapanovu Izraila ab tydniovym pieramirji ŭ Hazie ŭ abmien na vyzvaleńnie kala 40 zakładnikaŭ, uklučajučy ŭsich žančyn i dziaciej, jakija ŭsio jašče zastajucca ŭ rukach isłamistaŭ, piša Bi-bi-si.
U sieradu lidar hrupoŭki, pryznanaj terarystyčnaj šeraham krain, Ismaił Chanija pravioŭ u Kairy pieramovy z pradstaŭnikami jehipieckich uładaŭ ab mahčymaści novaj humanitarnaj paŭzy ŭ vajnie CHAMAS suprać Izraila, ale pa paviedamleńniach znajomych z chodam sustrečy krynic, hutarka była biezvynikovaj.
Jehipiet, razam z Kataram, vystupaje adnym ź viadučych miedyjataraŭ u pieramovach pamiž Izrailem i CHAMAS.
Členy ŭznačalenaj Chanijaj delehacyi zajavili jehipieckim pasiarednikam, što Izrail pavinien spačatku spynić nastup u siektary i vyvieści adtul svaje vojski, pierš čym abmiarkoŭvać lubuju patencyjnuju ŭhodu.
Sa słoŭ pradstaŭnikoŭ hrupoŭki, navat u hetym vypadku Izrailu daviadziecca vyzvalić z turmaŭ usich paleścinskich źniavolenych, pierš čym CHAMAS pahodzicca adpuścić pakinutych zakładnikaŭ.
Dla Izraila takija ŭmovy kateharyčna nieprymalnyja.
Jak raspavioŭ Bi-bi-si vysokapastaŭleny paleścinski funkcyjanier, znajomy z chodam praviedzienych u Kairy pieramovaŭ, sustreča «skončyłasia biezvynikova».
Pa słovach krynicy, Jehipiet prapanavaŭ jašče adno humanitarnaje pieramirje, ale ideja «časovaha rašeńnia» vajny była advierhnutaja delehacyjaj CHAMAS.
Paleścinskaja isłamisckaja hrupoŭka zajaviła jehipcianam, što jaje pazicyja zastajecca niaźmiennaj.
«Da kančatkovaha spynieńnia ahniu nijakich abmienaŭ nie adbudziecca», — skazała krynica.
Kamientary