Chočacie słuchać knihi pa-biełarusku? My adšukali siem resursaŭ, dzie heta možna zrabić.
«Knižny voz»
Utulny resurs ź biełaruskimi knihami stvaryła Kryścina Drobyš, byłaja aktrysa Kupałaŭskaha teatra i niezaležnaj trupy «Kupałaŭcy», a ciapier televiadučaja «Biełsata». Pačynali ź dziciačych knih, bo, jak tłumačyła Kryścina, heta vielmi treba małym.
A potym vyjaviłasia, što šmatlikija ź nibyta dziciačych tvoraŭ nasamreč cikavyja i darosłym: uziać taho ž Šerłaka Chołmsa, jakoha Drobyš nazyvaje «litaraturaj pa-za hadami». Darečy, niadaŭna naroŭni z «Pryhodami Šerłaka Chołmsa», jakija całkam źjavilisia na «Knižnym vozie» vosieńniu minułaha hoda, tudy dadali jašče i pieršuju častku apovieści «Šerłak Chołms: eciud u punsovym».
Na «Knižnym vozie» jość nie tolki biełaruskaja kłasika nakštałt «Ładździ rospačy», ale i zamiežnyja słavutyja tvory («Maŭhli», «Tom Sojer», «Chroniki Narnii»), i heta tak kaštoŭna, što možna znajomicca z suśvietnymi dziciačymi skarbami pa-biełarusku. Časam stvaralniki servisu papaŭniajuć jaho dziciačymi pieśniami — naprykład, tam jość ceły kaladny albom! I adznačym niesumnienny plus resursu: jon maje ŭłasny mabilny dadatak.
Jašče adna razynka «Knižnaha vozu» — dušeŭnyja videa pra toje, jak stvarajucca aŭdyjaknihi ad prajekta. Hladzicie sami:
Sajt / Instahram / dadatak dla Android / dadatak dla Apple
«Biełaruskaja palička»
Heta stareńkaja elektronnaja biblijateka, jakaja, akramia knih u zvykłym tekstavym farmacie, źmiaščaje i aŭdyjaknihi. Ich možna słuchać na samim sajcie, a možna i spampavać.
Tvory tut jość unikalnyja i časam niečakanyja: uziać, naprykład, «Moj kapitał» ad Stanisłava Bahdankieviča, biełaruskamoŭnyja aŭdyjaśpiektakli pa Hohalu pačatku 1950-ch hadoŭ ci čatyry Jevanhielli ŭ ahučvańni «dyletanta» Juryja Žyhamonta. Chapaje na «Paličcy» tvoraŭ suśvietna viadomych aŭtaraŭ (Džordž Orueł, Šata Rustavieli, Uiljam Fołknier i inšyja) i vialikich biełarusaŭ (Ivan Šamiakin, Ivan Mielež, Jakub Kołas i inšyja). Zanyrvajcie!
Audiobooks.by
Hety resurs nie źmiaščaje sami knihi, a padkazvaje, na jakich placoŭkach ich možna adšukać. Ciapier, raskazvajuć stvaralniki audiobooks.by, na ich resursie jość spasyłki na 497 knih, i heta cudoŭnaja mahčymaść nie šukać patrebnuju knižku pa ŭsich kutkach internetu, a znajści ŭsio, čaho duša prosić (i pra što vy nie zdahadvalisia), u adnym miescy.
Paru tydniaŭ tamu audiobooks.by razam z prajektam «Knižny voz» prezientavali premjeru, stvoranuju z udziełam sotni biełarusaŭ i biełarusak. Heta kniha «Mova 404», u jakoj aktyvistka Alina Nahornaja sabrała historyi dyskryminacyi biełarusaŭ u rodnaj krainie za toje, što jany hutarać pa-biełarusku. Epizody z knihi zapisvali nie vopytnyja akciory ahučvańnia, a prostyja biełarusy biez prafiesijnaha techničnaha abstalavańnia ŭ bytavych umovach. «Kali ja rablu ahučvańnie, to maje dva sabaki sadziacca pobač i ŭvažliva słuchajuć», «Zapisy rabiła, pakul pobač śpić čatyrochmiesiačnaja dačuška» — tak udzielniki prajekta raskazvali pra svaju pracu.
Nie chočacie słuchać pra dyskryminacyju movy? Pasprabujcie śvietły i humarny tvor «Aŭtaspynam pa hałaktycy», hłyboki raman «Praces» ad Kafki ŭ vykanańni Aleha Harbuza ci vytančany zbornik ese palitźniavolenaha fiłosafa Uładzimira Mackieviča «Svaboda i myśleńnie» i šmat inšych knih, znajści jakija dapamahaje resurs.
«Čytanka: aŭdyjaknihi Biełarusi»
Sam pa sabie resurs «Čytanka» duža zručny: zapampoŭvajecie sabie mabilny dadatak i słuchajecie, tym bolš što vybar knih u dadatku niebłahi. Dyzajn prahramy minimalistyčny i pryhožy, karystacca takim dadatkam pryjemna.
Ale voś niaŭdača: siarod tvoraŭ na hetym resursie niadaŭna źjavilisia knihi Andreja Mukavozčyka i Mikałaja Čarhinca. Kali nie chočacie lišni raz sutykacca ź ich litaraturnaj tvorčaściu, napeŭna, lepš vybrać inšy resurs.
«Kupałaŭcy»
Samaja biełaruskaja z usich biełaruskich teatralnych kamandaŭ vypuskaje jašče i aŭdyjaśpiektakli z aŭdyjaknihami. Kupałaŭcy vykładajuć ich na ŭłasnym jutub-kanale.
Na siońnia heta tolki try tvory, ale jakija — «Orden Biełaj Myšy» Uładzimira Arłova, «1984» Džordža Orueła i «Radziva «Prudok» Andrusia Horvata. Jakaść harantavanaja, jak heta zaŭsiody i byvaje ŭ kupałaŭcaŭ.
«Kamunikat»
Słavutaja biełaruskaja internet-biblijateka «Kamunikat» taksama źmiaščaje aŭdyjaknihi. Adrazu adznačym vidavočny minus resursu: niama ni admysłovaha mabilnaha dadatku, ni mahčymaści słuchać knihi anłajn, možna tolki pampavać ich na svaju pryładu i słuchać takim čynam.
Ale kali heta pieraškadžała amataram dobraj knihi? Tym bolš što takija tvory tut sapraŭdy jość. Adznačym, naprykład, «Damavikamieron» Adama Hłobusa, «Fiermu» Džordža Orueła, «Sabak Jeŭropy» Alhierda Bachareviča dy inšyja, bolš zvykłyja i kłasičnyja vydańni.
Biełaruski PEN
Na sajcie hetaj arhanizacyi majecca vydatnaja aŭdyjateka sa šmat jakimi tvorami, jakich vy nie znojdziecie bolš nidzie. Vybitnaja jana, pierš za ŭsio, praz mahčymaść prasłuchać tvory sučasnych aŭtaraŭ: tut i Nasta Kudasava, i Nadzieja Jaśminska, i šmat-šmat inšych. Jość i zusim redkija rečy: jak vam, naprykład, «U revalucyi žanočaje abličča?» ad Volhi Šparahi? Na žal, niama zručnaha mabilnaha dadatku i/ci mahčymaści spampavać knihi, ale dziakuj i prosta za mahčymaść pasłuchać takija kaštoŭnaści.
«Naša Niva» — bastyjon biełaruščyny
PADTRYMAĆ«Vy pavinny skazać, jaki drenny Sańnikaŭ». Šarenda-Panasiuk — pra toje, jak prapahandysty z BT zapisvali film pra jaje16
Kamientary