Džud Łoŭ jak imidžmejkier Biełarusi

A vy ŭžo bačyli karotkametražku ź Mikałajem Chalezinym i Džudam Łoŭ?

Ja liču, što heta vydatnaja i vielmi karysnaja dla Biełarusi reč. Vy ŭjavicie sabie: halivudzkaja zorka pieršaje vieličyni biaspłatna anhažujecca na karyść Biełarusi, a film pra Biełaruś visić na sajcie Guardian, adnaje z najbolš upłyvovych brytanskich hazetaŭ.

Jakaja inšaja ŭschodnieeŭrapiejskaja kraina, jakaja Letuva ci Słavaččyna mohuć takim hanarycca?

Biełaruś — adna z najbolš nieviadomych u śviecie krainaŭ Eŭropy. U adroźnieńnie ad Rasiei, Polščy, Ukrainy, navat krainaŭ Bałtyi,

Biełaruś dahetul nia maje svajho miesca ŭ śviadomaści typovaha zachodnika, svajho miesca ŭ zachodniaj kultury.

Bolšaść ludziej na Zachadzie nia viedajuć i krainy takoj, «Biełaruś»: pra jaje niama filmaŭ, knihaŭ; niama viadomych ludziej, jakija b asacyjavalisia ź joj (bo viadomyja za miažoju biełarusy zbolšaha praciahvajuć asacyjavacca z Rasiejaj abo Polščaj).

Biełaruskaj paślavajennaj dyjaspary, Radzie BNR, za dziesiacihodździ aśvietnickaj raboty atrymałasia zakinuć chacia b samu dumku pra niezaležnuju Biełaruś u hałovy zachodnich polisimejkieraŭ — ale pole dla pracy zastałosia vielmi vialikaje.

I praca hetaja łukašenkaŭskaj uładaj i łukašenkaŭskimi dyplamatami robicca vielmi drenna. Ad niazdolnaści, a častkova, moža, i naŭmyśnie, bo złačyncy lubiać ciemru i cišyniu. Nieviadomaść Biełarusi — heta adna z tych rečaj, jakija režymu byli i zastajucca vyhodnymi: kali pra Biełaruś nia viedajuć, značycca, i cikavaści da jaje prablemaŭ (to bok, da dyktatury) mieniej.

Vy ŭjaŭlajecie sabie, jaki skryhat zuboŭ staić u ambasadzie Biełarusi ŭ Londanie kožny raz, kali źjaŭlajecca taki rolik, ci kali Kievin Spejsi pad bieł-čyrvona-biełym ściaham maršyruje pad budynkam brytanskaha parlamenta?

Razmarozka adnosinaŭ Łukašenki z Zachadam — heta kali Łukašenka i jahonyja słuhi pačynajuć znoŭ niahiehła sprabavać pijaryć Biełaruś jak krainu, dzie nibyta robiać dobryja traktary i dzie nibyta dobry investycyjny klimat. Jakija palitviaźni? Jakoje machlarstva na vybarach?

U 2009 ci 2010 hodzie namahańniami łukašenkaŭskich piarščykaŭ vyjšaŭ ceły razvarot pra Biełaruś u Financial Times — viadoma, pra investycyjnyja mahčymaści, a nie pra pieraśled inšadumcaŭ. Režym potym zładziŭ usim naziralnikam chałodny duš u noč ź 19 na 20 śniežnia 2010 hoda, kali byli žorstka źbityja i aryštavanyja sotni mirnych demanstrantaŭ. Dziaržava prademanstravała, tak by mović, sapraŭdnuju vartaść svajho kłapatliva stvaranaha pierad hetym družalubnaha imidža.

A voś takija roliki, dy ŭvohule dziejnaść Svabodnaha teatra, stvarajuć na Zachadzie vobraz Biełarusi jak krainy, dzie panuje dyktatura, ale dzie jość šmat advažnych ludziej, jakija pierad joj nie skarajucca. I hety vobraz kudy bolš praŭdzivy i kudy bolš pryvabny, čym toj, inšy, z traktarami i «Biełazami».

• 0
• 0
• 0
• 0
• 0
• 0
• 0
• 0