Staršyniu BKDP Alaksandra Jarašuka pieravodziać u krytuju turmu
Staršyniu Biełaruskaha kanhresa demakratyčnych prafsajuzaŭ Alaksandra Jarašuka pieravodziać sa škłoŭskaj kałonii ŭ krytuju turmu ŭ Mahilovie. Pra heta «Svabodzie» paviedamiŭ aktyvist niezaležnaha prafsajuznaha ruchu Maksim Paźniakoŭ sa spasyłkaj na źviestki, atrymanyja ad samoha Jarašuka.
«Viedajem, što jamu dastajecca, na jaho ad pačatku mocna cisnuli i ciapier nie adčapilisia. Za što kidajuć u «krytku« (krytuju turmu. — RS), pakul nam nieviadoma. Ale zrazumieła, što padstavu znojduć, kali jość zahad. Pieravod u krytuju turmu dla jaho, čałavieka ŭžo piensijnaha ŭzrostu, aznačaje novyja vyprabavańni. Razumiejem, što ŭ maralnym i ŭ fizičnym sensie krytaja turma — heta značna ciažej, čym kałonija. Ale dachodziać źviestki, što jon trymajecca mužna», — raskazaŭ aktyvist.
Alaksandr Jarašuk naradziŭsia ŭ 1951 hodzie. Lidara BKDP aryštavali ŭ krasaviku 2022 hoda i asudzili na 4 hady źniavoleńnia pavodle 342 i 361 artykułaŭ Kryminalnaha kodeksa — za «arhanizacyju dziejańniaŭ, jakija hruba parušajuć hramadski paradak», i «zakliki da dziejańniaŭ, jakija nanosiać škodu nacyjanalnym intaresam krainy». Svajoj viny Alaksandr Jarašuk nie pryznaŭ, pravaabaroncy Biełarusi pryznali jaho palitviaźniem.
Z prablemami sa zdaroŭjem sutyknulisia ŭ niavoli inšyja lidary niezaležnaha prafsajuznaha ruchu, paviedamiŭ Maksim Paźniakoŭ.
«Viedajem, što ŭ Hienadzia Fiadyniča, jakoha trymajuć u babrujskaj kałonii № 2, pačalisia prablemy z nyrkami, a ŭ jaho jašče i cukrovy dyjabiet. U Vasila Bieraśnieva, jaki ŭ 15-j kałonii pad Mahilovam, taksama chvoryja nyrki.
Tam ža adbyvaje termin ažno ŭ 8 hadoŭ Vacłaŭ Areška.
U jaho vielmi składanaje stanovišča sa zrokam, adnym vokam zusim nie bačyć».
Usiaho ŭ viaźnicach ciapier znachodzicca 51 aktyvist niezaležnaha prafsajuznaha ruchu Biełarusi. Pavodle Maksima Paźniakova, jaki za miažoj časova vykonvaje abaviazki staršyni BKDP, pra ŭsich źniavolenych paplečnikaŭ u kanhresie starajucca sabrać źviestki, pa mahčymaści padtrymlivajuć kantakty ź imi praz svajakoŭ. Praŭda, heta nie zaŭsiody ŭdajecca.
«Bolšaść našych palitviaźniaŭ — hetyja tyja, kaho ŭžo asudzili i jany znachodziacca ŭ kałonijach. Ad niekatorych prychodziać listy, byvajuć zvanki na volu. Ale nie ad usich. Voś u Alaksandra Jarašuka navat zvanki abmiažoŭvali. Časam byvaje i tak, što svajaki viaźniaŭ prosiać pra ich ničoha nie paviedamlać u miedyja, aścierahajucca. Nieŭzabavie adzin aktyvist musić vyjści na volu, dyk pra jaho prosiać maŭčać. Heta što tyčycca kałonij.
Ale jość i tyja kalehi, kaho adnosna niadaŭna zatrymali i jany jašče pad śledstvam, jak aktyvisty z «Naftana» Volha Brycikava, Alaksandar Bałonkin i Alaksandr Kucharonak. Viedajem pra ich, što jany ŭ viciebskim SIZA. Umovy tam składanyja, ale jany trymajucca».
Pavodle Maksima Paźniakova, sioleta varta čakać bolš rašučych dziejańniaŭ, nacelenych na vyzvaleńnie biełaruskich prafsajuznych aktyvistaŭ, z boku Mižnarodnaj arhanizacyi pracy (MAP).
«Sioleta MAP pryniała rezalucyju ab Biełarusi, u jakoj razmova idzie pra ŭžyvańnie adnosna biełaruskaha ŭrada 33-ha punkta statuta MAP. Hetym punktam prafsajuznym arhanizacyjam, jakija ŭvachodziać u MAP, u adkaz na parušeńnie ŭ peŭnaj krainie prava na prafsajuznyja abjadnańni rekamiendavana akazvać na jaje cisk praz sankcyi, bajkoty, kampanii salidarnaści pracoŭnych. Hetaja pazicyja daviedzienaja da roznych krain, i my čakajem, što nieŭzabavie jana pačnie davać plon», — skazaŭ Maksim Paźniakoŭ.
Palitviaźnia, jaki zapłaciŭ uładam 31 bitkoin kampiensacyi i źniaŭsia ŭ filmie BT, asudzili jašče na 9 hadoŭ10
Kamientary