Jon pakazaŭ, što biełaruskaja nacyjanalnaja ideja moža być papularnaj. Čamu Eduard Palčys — kruty
Učora stała viadoma pra źniknieńnie błohiera Eduarda Palčysa. Jahonaja žonka Viktoryja nie viedała, dzie jon znachodzicca. Apošnim časam Palčys chavaŭsia, paśla taho jak u červieni atrymaŭ «sutki» za ŭdzieł u akcyi Śviatłany Cichanoŭskaj. Paźniej stała viadoma, što Palčys adbyvaje 30 sutak na Akreścina. «Naša Niva» ŭspaminaje, chto taki Eduard Palčys, a taksama tłumačyć, u čym jaho kaštoŭnaść dla nacyjanalnaha ruchu.
Niedzie ŭ kancy 2014 hoda ŭ infarmacyjnuju prastoru Biełarusi ŭpeŭniena ŭvarvaŭsia sajt 1863x.com. Sajt adznačaŭsia dobrym padboram ilustracyj, vialikimi tekstami pra historyju Biełarusi i pra niekatoryja biahučyja padziei.
Faktyčna heta byŭ taki svojeasablivy adkaz rasijskamu šavinisckamu sajtu «Sputnik i Pahrom» (va Ukrainie taksama isnuje anałahičny sajt «Piatro i Maziepa»). Tolki tam za sajtam stajać cełyja kalektyvy aŭtaraŭ, a ŭ nas 1863 (adsyłka da paŭstańnia Kalinoŭskaha) stvaraŭ adzin čałaviek, jaki zahadkava padpisvaŭsia «Džon Silvier».
«Pirat» stvaraŭ teksty z pazicyi biełaruskaha nacyjanalista, jaki supraćpastaŭlaje siabie «ruskamu śvietu». Što charakterna — usie teksty pisalisia pa-rusku, bo pierakonvać biełaruskamoŭnych i tak ni ŭ čym nie treba. Što tyčycca ananimnaści, to «Džon Silvier» kazaŭ, što jana daje «bolš svabody i fantazii».
Adnym z samych papularnych artykułaŭ staŭ rozyhryš Viačasłava Dzijanava, jaki ŭ 2011 hodzie arhanizoŭvaŭ «maŭklivuju revalucyju», a potym staŭ na pazicyi «ruskaha śvietu». Silvier zrabiŭ vyhlad, što prapanoŭvaje Dzijanavu pracu na rasijskich prapahandystaŭ. Toj adrazu pahadziŭsia, zaśviedčyŭšy poŭnuju łajalnaść da Pucina.
Sajt 1863 pravakavaŭ. «Kreml pavinien być razburany», — pisałasia na im. Viadoma, što mnohija tezisy, što ahučvaŭ Silvier, strašna nie padabalisia samym strakatym pradstaŭnikam «ruskaha śvietu». Na jaho pisali skarhi, adpraŭlali artykuły na ekśpiertyzu.
U mai 2015 hoda «Džon Silvier» źnik upieršyniu. Tolki ŭ listapadzie jon apavioŭ, što byŭ pad aryštam i na sudova-psichičnaj ekśpiertyzie, a na jaho zaviali dźvie kryminalnyja spravy — za raspalvańnie mižnacyjanalnaj varožaści i raspaŭsiud parnahrafii. Pra heta jon paviedamiŭ užo z Ukrainy, kudy pierajechaŭ z žonkaj. Mnohim toj apovied padaŭsia prydumanym. Maŭlaŭ, čałaviek šukaje nahodaŭ pryciahnuć da siabie ŭvahu, ale vielmi chutka ŭsio napisanaje paćvierdziłasia.
U studzieni 2016 hoda «Džon Silvier» byŭ zatrymany supracoŭnikami FSB pa Branskaj vobłaści pry pierasiačeńni ŭkrainska-rasijskaj miažy. Błohier chacieŭ viarnucca praz Rasiju ŭ Biełaruś. Paźniej jon kazaŭ, što praściej adsiedzieć u Biełarusi, čym usio žyćcio pravieści ŭ emihracyi. Vielmi chutka sajt «Sputnik i Pahrom» vykłaŭ zdymak zatrymanaha i nazvaŭ jaho proźvišča — 25-hadovy ŭradženiec Lidy Eduard Palčys.
Hety chłopiec vučyŭsia na histfaku BDU, ale pierad samym dypłomam vyrašyŭ kinuć vučobu, kab nie adpracoŭvać raźmierkavańnie. Potym pracavaŭ repietytaram historyi i śpiecyjalistam pa sacyjalnych sietkach. Svoj sajt jon stvaryŭ paśla padziej va Ukrainie ŭ 2014 hodzie z žadańniem, kab takoje nie paŭtaryłasia ŭ nas.
U chutkim časie Palčysa ekstradziravali z Rasii ŭ Biełaruś, suda jon čakaŭ u izalatary ŭ Žodzinie. Sud prachodziŭ pry zakrytych dźviarach. Palčysa sudzili za jahonyja publikacyi: u dzieviaci sud znajšoŭ ekstremizm, a ŭ adnoj — raspaŭsiud parnahrafii (abraźlivyja karykatury na biełarusaŭ, jakija malavali ŭ rasijskim internecie). Prakuror prasiŭ 3,5 hady kałonii. Ale sudździa abmiežavaŭsia 1 hodam i 8 miesiacami chatniaj chimii. Pakolki ŭ SIZA dzień idzie za dva, to Palčysa adrazu adpuścili na volu, a chimii jamu zastavałasia adbyć dva miesiacy.
«Ja byŭ maleńkim błohieram, ale siłaviki prapijaryli moj sajt», — heta była pieršaja reakcyja na voli Palčysa. Potym błohier raskazvaŭ, što śledčyja sprabavali jaho złamać, kali raskazvali, što jahonaja žonka była ciažarnaj, ale zrabiła abort. Heta była chłuśnia, viadoma. «Ja «rusafob» tolki praz toje, što nie zhodny z Pucinym», — kazaŭ jon.
Paśla vychadu na volu Palčys praciahnuŭ zajmacca sajtam, pryčym zrabiŭ heta svaim asnoŭnym zaniatkam. Na praciah pracy prasiŭ hrošaj u ludziej, tyja pieraličvali. Vychodziła niedzie 500 dalaraŭ na miesiac. Kazaŭ, što za takija hrošy kvateru i mašynu nie kupiš, ale žyć možna. Cikava, što kali Palčys abviaściŭ pra pačatak kampanii ź pieravodam hrošaj, to zajavu na jaho ŭ padatkovuju napisaŭ Kanstancin Prydybajła, toj samy, jaki ciapier aktyŭničaje pry aśviatleńni biełaruskich padziej na Russia Today.
U 2018 hodzie Palčys staŭ adnym z arhanizataraŭ śviatkavańnia 100-hodździa BNR. Razam z Paŭłam Biełavusam i Antonam Matolkam jany zładzili maštabnaje mierapryjemstva na placoŭcy la Opiernaha teatra. Upieršyniu za šmat hadoŭ centr Minska patanaŭ u bieł-čyrvona-biełych ściahach, na śviatkavańnie pryjšli dziasiatki tysiač čałaviek. Sam Palčys kazaŭ, što arhanizacyja zabrała ŭ jaho šmat siłaŭ i niervaŭ, ale atrymany vynik byŭ varty taho.
Praz hod hetaja ž kamanda zmahła zładzić 101-ja ŭhodki BNR u Hrodnie.
Eduard Palčys — chryścijanski viernik. Jon aktyŭna ŭdzielničaŭ u abaronie Kurapataŭ, siabruje sa Źmitrom Daškievičam. U jaho tradycyjnyja kansiervatyŭnyja kaštoŭnaści, što časta nie padabajecca libierałam i levym aktyvistam.
Palčys na svaim prykładzie pakazaŭ, što biełaruski nacyjanalizm moža być papularnym. Błohier zaachvočvaŭ tysiačy ludziej spaznavać historyju Biełarusi, pieraasensoŭvać našu spadčynu i sučasnaść. U hetym była i zastajecca kaštoŭnaść Palčysa.
Palitviaźnia, jaki zapłaciŭ uładam 31 bitkoin kampiensacyi i źniaŭsia ŭ filmie BT, asudzili jašče na 9 hadoŭ6
Kamientary