«Raspalvajuć mižkanfiesijnuju varožaść». U Lachavičach uhledzieli voraha ŭ zvanach na kaściole
Troje žycharoŭ Lachavičaŭ inicyjavali kampaniju suprać hučańnia zvanoŭ miascovaha kaścioła — pad kalektyŭnaj skarhaj prymušajuć stavić podpisy. Niekatoryja navat abvinavačvajuć parafiju ŭ «raspalvańni mižkanfiesijnaj varožaści» bojem zvanoŭ — u toj čas jak u bok samich viernikaŭ kirujuć abrazy, piša Katolik.life.
U niadaŭna adrodžanaj u Lachavičach katalickaj parafii śviatoha Juzafa ŭźnikli niečakanyja kłopaty: trom žycharam rajcentra nie spadabałasia hučańnie ŭstalavanaj u kaściole sistemy elektronnych zvanoŭ, i jany inicyjavali kampaniju suprać pracy sistemy.
«Pačalisia pastajannyja skarhi ŭ roznyja instancyi, paklopy, padman, što viadzie da napružańnia ŭ hramadstvie», — havorać Katolik.life parafijanie. Ciapier im davodzicca zajmacca pierapiskami ź dziaržorhanami, kab adstajać zvany, a probašča pieryjadyčna vyklikajuć u rajvykankam.
Raniej zvany ŭ chramie nie hučali, ale paśla taho, jak pinski biskup źviarnuŭsia z pastyrskim listom, u jakim padkreśliŭ važnuju rolu kaścielnych zvanoŭ i zaachvociŭ parafii da ich adnaŭleńnia, vierniki Lachavičaŭ vyrašyli ŭstalavać u kaściole elektronnuju sistemu, bo na kłasičnyja zvany nie chapała srodkaŭ.
Sistemu nabyli i ŭstalavali. Pavodle rašeńnia, pryniataha na ahulnym schodzie parafii, i kaścielnaj tradycyi, a 8-j hadzinie stała hučać miełodyja, jakaja ŭvodzić u kurs liturhičnaha dnia (1-2 chviliny), a 12-j hadzinie — boj zvanoŭ, jaki zaklikaje da malitvy za pamierłych «Anioł Panski» (da 3 chvilin), a 21-j hadzinie — miełodyja z zaklikam da malitvy praz zastupnictva Božaj Maci (da 2 chvilin). Taksama boj zvanoŭ hučyć za paŭhadziny da śviatoj Imšy (kala 3 chvilin).
Takim čynam, za ceły dzień sistema zvanoŭ pracuje maksimum 10 chvilin.
Adnak heta nie spadabałasia trom žycharam rajcentra, raskazali ŭ parafii. Jany pačali pisać skarhi, u tym liku ŭ miascovuju prakuraturu. Adnym sa skaržnikaŭ akazaŭsia rabotnik administracyi rajonnaj lakarni. Pavodle parafijan, jon prymušaŭ padnačalenych padpisvacca pad kalektyŭnym zvarotam pra toje, što kaścielnyja zvany byccam by pieraškadžajuć pracy miedykaŭ.
«Siarod piersanału lakarni niamała katolikaŭ, i kali jany kazali, što zvany im nie zaminajuć i admaŭlalisia padpisvać skarhu, načalnik abzyvaŭ ich «pšečkami» [abraźlivaje słova ŭ dačynieńni da palakaŭ]. U adnoj sa skarhaŭ parafiju vinavaciać u tym, što bojem zvanoŭ jana byccam by «raspalvaje mižkanfiesijnuju varožaść». A chiba nie naadvarot — takija abrazy i łajanki ŭ bok katolikaŭ ci nie raspalvajuć tuju samuju mižkanfiesijnuju varožaść?» — zadajucca pytańniem u parafii.
U śniežni 2023 hoda rajonny centr hihijeny i epidemijałohii vykanaŭ zamiery ŭzroŭniu šumu ad hukavoj sistemy kaścioła i paviedamiŭ parafii pra toje, što ŭ niekatorych kabinietach i pałatach lakarni ŭzrovień niaznačna pieravyšaje ŭstalavanyja zakonam normy. Ad parafii zapatrabavali panizić huk sistemy.
Adnak u parafii źviartajuć uvahu na niepravamiernaść takoha patrabavańnia, bo pavodle zakonu hihijeničny narmatyŭ nie raspaŭsiudžvajecca na šum, abumoŭleny praviadzieńniem nabaženstvaŭ i inšych relihijnych abradaŭ dy cyrymonij u ramkach kananičnych patrabavańniaŭ kanfiesij.
U suviazi z hetym patrabavańnie Centra hihijeny i epidemijałohii ŭ parafii ličać parušeńniem Kanstytucyi i abmiežavańniem pravoŭ viernikaŭ. Tamu parafija taksama padrychtavała zvarot u rajonnuju prakuraturu z prośbaj adnavić zakonnaść i abaranić pravy miascovych viernikaŭ.
«Navat niahledziačy na niezakonnaść patrabavańniaŭ, huk sistemy rabili mienšym užo trojčy. Adnak skaržnikaŭ heta nie zadavalniaje. Niekatoryja patrabujuć zrabić jašče cišej, chtości — uvohule vyklučyć. Kali jašče bolej panizić huk, to zvany ŭvohule hublajuć sens», — tłumačać u parafii.
Vierniki padkreślivajuć, što adna z funkcyj kaścielnaha zvona — ekzarcyzm, vyhnańnie złoha ducha. Tamu miarkujuć, što vystupleńnie suprać zvanoŭ mahło stać nastupstvam takoha ekzarcyzmu:
«Zamiest taho, kab uzradavacca, što źniščany savietami kaścioł adrestaŭravany i narešcie atrymaŭ «hołas», niekatoryja ludzi paddajucca namaŭleńniu djabła. Zaraz pytańniem zajmajecca prakuratura. My niekalki razoŭ prasili probašča dazvolić nam napisać kalektyŭny zvarot da ŭpaŭnavažanaha pa spravach relihij, ale jon nie zhadžaŭsia, kažučy, što nie treba raździmać z hetaha kanflikt, a nazirać, jak zło jeść samo siabie».
Taksama parafijanie pradstavili šerah stanoŭčych vodhukaŭ, naprykład:
«Ja pracuju ŭ paliklinicy, što pobač z kaściołam. Pieršy čas było niazvykła, zatoje ciapier, jak tolki čujem u 8 hadzin ranicy zvany, pačynajem pryjom pacyjentaŭ. Pačatak pracoŭnaha dnia».
«Niekatoryja našy chvoryja, jak tolki čujuć zvany ci huk miełodyi, jakaja danosicca z boku kaścioła, adrazu padychodziać da akna, kab pamalicca. Navat niekatoryja pracedury dla ich pieranosim na paźniej».
«Ja lačyłasia ŭ stacyjanary. Kožny raz, kali čuła huk zvanoŭ, pačynała malicca. Ja sama pravasłaŭnaja, ale Boh adzin».
Čytajcie taksama:
Ź dźviarej Čyrvonaha kaścioła źnik dakumient ab apiačatvańni. Restaŭracyja ŭžo pačałasia?
Palitviaźnia, jaki zapłaciŭ uładam 31 bitkoin kampiensacyi i źniaŭsia ŭ filmie BT, asudzili jašče na 9 hadoŭ3
Kamientary