Vajna

Kitaj sprabuje vystupić u roli miratvorcy va Ukrainie. Voś jak vyhladaje heta prapanova

Pakul ZŠA i Rasija rychtujucca da pieramoŭ pa ŭrehulavańni vajny va Ukrainie, Kitaj sprabuje zaniać rolu pasrednika. Što jon prapanuje i što za hetym staić?

Donald Tramp i Si Czińpin padčas samita G20 u Osacy ŭ červieni 2019 hoda. Fota: Susan Walsh / AP

Jak piša The Wall Street Journal sa spasyłkaj na krynicy ŭ Piekinie i Vašynhtonie, kitajskija čynoŭniki nieaficyjna prapanavali kamandzie Trampa pravieści amierykana-rasijski samit dla abmierkavańnia ŭrehulavańnia vajny. U płanach Kitaja taksama zhadvajecca mahčymaść udziełu ŭ miratvorčych namahańniach paśla mahčymaha pieramirja.

Adnak hetaja inicyjatyva vyklikała skiepsis u ZŠA i Jeŭropie. Hałoŭnaja pryčyna — blizkaje partniorstva Kitaja i Rasii, jakoje ŭzmacniłasia paśla pačatku vajny. Zachad razhladaje Kitaj nie jak pasiarednika, a jak sajuźnika Pucina, jaki moža vykarystoŭvać situacyju dla pašyreńnia svajho ŭpłyvu.

Zhodna ź infarmacyjaj krynic u Piekinie i Vašynhtonie, kitajskaja prapanova praduhledžvaje amierykana-rasijski samit biez udziełu Ukrainy. Heta vyklikała rezkuju reakcyju ŭ Jeŭropie, bo supiarečyć pryncypu, što budučynia Ukrainy pavinna vyrašacca ź jaje ŭdziełam.

Fota: AP

Miesiac tamu, vystupajučy na Suśvietnym ekanamičnym forumie ŭ Davosie, Tramp zajaviŭ: «Spadziajusia, što Kitaj dapamoža nam spynić vajnu pamiž Rasijaj i Ukrainaj».

Niekatoryja ekśpierty pa Kitai ŭ Vašynhtonie miarkujuć, što Tramp moža vykarystoŭvać pahrozu handlovych taryfaŭ na kitajski impart, kab prymusić Si Czińpina dapamahčy ŭrehulavać kanflikt.

Kitajskaja prapanova adlustroŭvaje žadańnie Piekina paźbiehnuć ekanamičnaha supraćstajańnia z Vašynhtonam. ZŠA ŭžo ŭviali 10% dadatkovyja taryfy na kitajskija tavary i pahražajuć ich pavysić da 60%.

Kitajskaja ekanomika pieražyvaje najhoršy spad za apošnija dziesiacihodździ, tamu Si Czińpin zacikaŭleny ŭ tym, kab pierakanać Trampa nie ŭzmacniać ekanamičny cisk.

Adnak Si nie choča, kab dapamoha ŭ spynieńni kanfliktu pastaviła pad pahrozu ciesnyja adnosiny Kitaja z Rasijaj, kažuć ludzi, znajomyja z chodam dumak u Piekinie. Tamu kitajskaja prapanova nie ŭklučaje ŭ siabie nijakich abaviazacielstvaŭ Piekina pa skaračeńni svajoj vializnaj ekanamičnaj padtrymki Maskvy.

Pavodle Ryka Uotersa (Rick Waters), kiraŭnika kitajskaha adździeła Eurasia Group i byłoha vysokapastaŭlenaha čynoŭnika Dziarždepartamienta ZŠA, Kitaj hatovy prapanavać Trampu taktyčnyja sastupki, takija jak arhanizacyja samitu z Pucinym abo ŭdzieł u paślavajennych stabilizacyjnych misijach. Adnak, adznačaje ekśpiert, Piekin nie budzie cisnuć na Pucina, kab dabicca spynieńnia ahniu.

Admova Piekina dystancyjavacca ad Maskvy padryvaje davier da jaho ŭ zachodnich krainach i moža abmiežavać jaho mahčymaści pa ŭpłyvie na Rasiju. U Jeŭropie aścierahajucca, što Kitaj zacikaŭleny ŭ zaciahvańni vajny, bo heta asłablaje jak ZŠA, tak i ES, robić Rasiju bolš zaležnaj ad Piekina.

Tym nie mienš, niekatoryja ŭpłyvovyja čynoŭniki ŭ Bierlinie i Paryžy ŭ rozny čas zajaŭlali, što Kitaj moža stać važnym elemientam ustojlivaha mirnaha pahadnieńnia, bo vałodaje mahutnymi ryčahami ŭpłyvu na Maskvu. Tamu Jeŭropa nie adkidaje poŭnaściu kitajski ŭdzieł u mirnych pieramovach i navat prysutnaść u zabieśpiačeńni jaho zachavańnia.

Pa słovach ludziej, znajomych ź situacyjaj, Kitaj u ramkach svajoj inicyjatyvy prapanuje vystupić u roli «haranta» miru, adpraŭlajučy miratvorčyja vojski ŭ rehijon.

Uładzimir Pucin i Donald Tramp na samicie ŭ Osacy (Japonija) u 2019 hodzie. Fota: Susan Walsh / AP

Adnak u Jeŭropie ŭzrastaje tryvoha nakont mahčymaha pahadnieńnia pamiž bujnymi dziaržavami, jakoje ihnaruje patrabavańni Kijeva. Luby trochbakovy samit pad kiraŭnictvam Kitaja z udziełam Pucina i Trampa, vierahodna, uzmocnić hetyja aściarohi, bo mnohija jeŭrapiejskija čynoŭniki ličać, što Tramp moža adsunuć jeŭrapiejskija intaresy ŭ bok u ramkach «vialikaj ździełki» ź Piekinam.

Kamientary da artykuła