CHAMAS abvinavaciŭ Izrail u parušeńni pahadnieńnia i adkłaŭ dalejšaje vyzvaleńnie zakładnikaŭ
10.02.2025 / 20:18
Pradstaŭnik paleścinskaha ruchu CHAMAS 10 lutaha abvinavaciŭ Izrail u parušeńni pahadnieńnia ab spynieńni ahniu, u tym liku ŭ naniasieńni avijaŭdaraŭ pa paleścincam u siektary Haza. Jon zajaviŭ, što čarhovaje vyzvaleńnie zakładnikaŭ, pryznačanaje na nastupnuju subotu, budzie adkładzienaje, piša Euronews.
Fota: AP Photo/Abdel Kareem Hana
«Na praciahu apošnich troch tydniaŭ my nazirali pastajannyja parušeńni ŭmoŭ pahadnieńnia z boku praciŭnika, — napisaŭ u svaim telehram-kanale pradstaŭnik vajskovaha kryła CHAMASa — hrupoŭki «Bryhady Izedzina al-Kasama» Abu Ubajda. — U suviazi z hetym my vyrašyli adkłaści vyzvaleńnie pałonnych, jakija pavinny byli być adpuščanyja 15 lutaha, da dalejšaha paviedamleńnia. Izrail pavinien prytrymlivacca normaŭ pahadnieńnia i kampiensavać škodu, pryčynienuju im za apošnija tydni».
Izrail i CHAMAS znachodziacca ŭ režymie šaścitydniovaha spynieńnia ahniu, padčas jakoha paleścinskaja hrupoŭka vyzvalaje dziasiatki zakładnikaŭ, zachoplenych padčas napadu 7 kastryčnika 2023 hoda, u abmien na amal 2 000 paleścinskich źniavolenych.
Z momantu ŭstupleńnia ŭ siłu pieramirja ŭ minułym miesiacy baki praviali piać abmienaŭ. Za hety čas byŭ vyzvaleny 21 zakładnik i bolš za 730 źniavolenych. Nastupny abmien byŭ zapłanavany na subotu: vyzvaleńnie troch izrailskich zakładnikaŭ u abmien na sotni paleścinskich źniavolenych.
Abu Ubajda, jaki abvinavaciŭ Izrail u sistematyčnych parušeńniach pahadnieńnia, zaśviedčyŭ, što jany
«ŭklučajuć u siabie zatrymki z dazvołam pieramieščanym paleścincam viarnucca ŭ paŭnočnuju častku Hazy, avijaŭdary i abstreły roznych rajonaŭ siektara, a taksama niazdolnaść sadziejničać dastaŭcy humanitarnaj dapamohi ŭ adpaviednaści z damoŭlenaściami».