Za «ekstremizm» buduć sudzić uładalnika handlovaha centra, jaki zhareŭ u Viciebsku
11.02.2025 / 12:46
Za «raspaŭsiud ekstremizmu» buduć sudzić Viktara Vialuhu — dyrektara HC «Biełaruś», dzie 13 śniežnia minułaha hoda zdaryŭsia vialiki pažar, piša «Viciebskaja Viasna».
Razhlad spravy viadomaha ŭ Viciebsku biznesoŭcy, raspačataj pa č.2 art. 19.11 KaAP, pryznačany na 19 lutaha, jon projdzie ŭ sudzie Čyhunačnaha rajona Viciebska.
Sudździoj pryznačana Kaciaryna Cybulskaja — pieravažna joj u hetym sudzie addajuć palityčnyja «administratyŭki».
Nieŭzabavie paśla pažaru ŭ handlovym centry Viktar Vialuha byŭ zatrymany: aficyjnyja ŚMI pakazali jaho ŭ naručnikach. Pavodle papiaredniaj viersii, pažar u handlovym centry zdaryŭsia praź niajakasnuju pravodku. Ci pryznali adkaznym za parušeńni ŭładalnika HC, nieviadoma. Vyhladaje, što jon na voli.
Paśla pažaru z HC «Biełaruś» u miedustanovy trapili dva dziasiatki paciarpiełych. Budynak centra pryznali nieprydatnym dla dalejšaha vykarystańnia, jaho miarkujuć źnieści.