За «экстрэмізм» будуць судзіць уладальніка гандлёвага цэнтра, які згарэў у Віцебску
11.02.2025 / 12:46
За «распаўсюд экстрэмізму» будуць судзіць Віктара Вялюгу — дырэктара ГЦ «Беларусь», дзе 13 снежня мінулага года здарыўся вялікі пажар, піша «Віцебская Вясна».
Разгляд справы вядомага ў Віцебску бізнэсоўцы, распачатай па ч.2 арт. 19.11 КаАП, прызначаны на 19 лютага, ён пройдзе ў судзе Чыгуначнага раёна Віцебска.
Суддзёй прызначана Кацярына Цыбульская — пераважна ёй у гэтым судзе аддаюць палітычныя «адміністратыўкі».
Неўзабаве пасля пажару ў гандлёвым цэнтры Віктар Вялюга быў затрыманы: афіцыйныя СМІ паказалі яго ў наручніках. Паводле папярэдняй версіі, пажар у гандлёвым цэнтры здарыўся праз няякасную праводку. Ці прызналі адказным за парушэнні ўладальніка ГЦ, невядома. Выглядае, што ён на волі.
Пасля пажару з ГЦ «Беларусь» у медустановы трапілі два дзясяткі пацярпелых. Будынак цэнтра прызналі непрыдатным для далейшага выкарыстання, яго мяркуюць знесці.