U Minsku likvidujuć dva kłuby bajavych mastactvaŭ
8.02.2025 / 17:28
U Minskim haradskim sudzie 12 lutaha buduć razhledžanyja pazovy ab likvidacyi dvuch kłubaŭ bajavych mastactvaŭ, vynikaje z raskładu na partale elektronnaha sudavodstva. Praces u dačynieńni da hramadskaha abjadnańnia «Siobuajki», inicyjavany hałoŭnym upraŭleńniem justycyi (HUJU) Minharvykankama, praviadzie sudździa Darja Marhajlik, piša «Pozirk».
Ilustracyjnaje fota: Makunin / pixabay.com
Zhodna ź infarmacyjaj z adkrytych krynic, zhadanaje abjadnańnie — kłub ajkido (sučasnaje japonskaje bajavoje mastactva). Pavodle źviestak z Adzinaha dziaržaŭnaha rehistra jurydyčnych asob i indyvidualnych pradprymalnikaŭ (ADR), arhanizacyja zarehistravanaja 6 žniŭnia 2000 hoda.
Kiraŭnictva «Siobuajki» nakiroŭvała ŭ HUJU Minharvykankama spravazdaču, pavodle jakoj na 1 studzienia 2024 hoda ŭ abjadnańni nie było nivodnaha člena, anijakich mierapryjemstvaŭ u 2023-m jano nie pravodziła, dachodaŭ i vydatkaŭ nie mieła.
Druhaja arhanizacyja, jakuju majuć namier likvidavać ułady, — spartovaje hramadskaje abjadnańnie «Bajcoŭski kłub «Baraćbicki styl». Adpaviedny isk staličnaha ŭpraŭleńnia justycyi razhledzić sudździa Alena Kruk.
Pavodle źviestak z ADR, hety kłub zarehistravany 7 vieraśnia 2012 hoda, adnak 14 listapada 2024-ha jahonaja dziejnaść była prypynienaja — na padstavie rašeńnia Minharsuda. Vierahodna, z hetaj pryčyny arhanizacyja nie spravazdačyłasia pierad rehistracyjnym orhanam pra hadavuju dziejnaść. Zhodna z archiŭnym dakumientam, na 1 studzienia 2023 hoda ŭ abjadnańni było 15 členaŭ.
U 2022 hodzie «Baraćbicki styl» pravioŭ try mierapryjemstvy: turnir pa MMA (źmiešanyja bajavyja mastactva) «TFC» z udziełam dvuch čałaviek, a taksama dva čempijanaty Biełarusi pa MMA — ź piaćciu i tryma ŭdzielnikami adpaviedna. Pry hetym ni dachodaŭ, ani vydatkaŭ abjadnańnie ŭ spravazdačnym hodzie nie mieła.
Pavodle źviestak z rejestra Ministerstva pa padatkach i zborach pra daŭžnikoŭ, u «Baraćbickaha stylu» na 1 studzienia 2025 hoda była zapazyčanaść.