Śviet

U PARIE adnahałosna pryniali rezalucyju pa Biełarusi

Parłamienckaja asambleja Rady Jeŭropy (PARIE) 30 studzienia adnahałosna pryniała rezalucyju ab Biełarusi, pryśviečanuju vynikam «pieraabrańnia» Łukašenki 26 studzienia. 

«Asambleja […] ličyć, što tak zvanyja vybary, arhanizavanyja ŭ Biełarusi 26 studzienia 2025 hoda, nie adpaviadajuć minimalnym mižnarodnym standartam demakratyčnych vybaraŭ i nie majuć nijakaha demakratyčnaha davieru… Niama padstaŭ dla pryznańnia lehitymnaści Alaksandra Łukašenki jak prezidenta», — havorycca ŭ rezalucyi.

PARIE zaklikała dziaržavy — členy Rady Jeŭropy vyrazna zajavić ab niepryznańni abrańnia Łukašenki na pasadu prezidenta Biełarusi, a taksama «pryniać rašučyja miery dla pašyreńnia i ŭzmacnieńnia metavych sankcyj suprać režymu i tych, chto padtrymlivaje jaho niezakonnuju dziejnaść».

Asambleja prapanuje praciahnuć i ŭzmacnić padtrymku struktur biełaruskich demakratyčnych sił na čale sa Śviatłanaj Cichanoŭskaj. Delehaty PARIE taksama prapanujuć uvieści dadatkovyja miery dla palahčeńnia ŭjezdu ŭ dziaržavy — členy Rady Jeŭropy i znachodžańnia ŭ biaśpiečnych i hodnych umovach dla biełaruskich hramadzian, jakija biahuć ad režymu Łukašenki.

PARIE padkreśliła, što dla pryviadzieńnia ŭ adpaviednaść z kaštoŭnaściami Rady Jeŭropy i zachavańnia svajho suvierenitetu i niezaležnaści aficyjnaja Biełaruś pavinna spynić represii suprać svaich hramadzian, vyzvalić usich palityčnych źniavolenych, «zabiaśpiečyć arhanizacyju svabodnych i sumlennych vybaraŭ i… zrabić mahčymaj mirnuju pieradaču ŭłady».

Taksama ad uładaŭ Biełarusi patrabujuć «nieadkładna ŭvieści maratoryj na śmiarotnaje pakarańnie i pryniać miery dla jaho kančatkovaha skasavańnia». 

Kamientary da artykuła