Жыхары Валенсіі пасля паводкі выйшлі на пратэст з патрабаваннем адстаўкі кіраўніцтва рэгіёна
10.11.2024 / 9:53
У іспанскай Валенсіі больш за 100 тысяч чалавек выйшлі на акцыі пратэсту з патрабаваннем адстаўкі кіраўніка рэгіёна Карласа Мазона. Падчас паводкі ў кастрычніку ў правінцыі загінулі больш за 200 чалавек. Пратэстоўцы абвінавачваюць улады ў запозненым інфармаванні аб стыхійным бедстве.
Пратэсты суправаджаліся сутычкамі з паліцыяй. Мэр горада Марыя Хасэ Каталья апублікавала фота разбітых вокнаў і агню, які разводзілі пратэстоўцы, дадаўшы, што «вандалізм гэта не рашэнне», піша ВВС.
На мінулым тыдні раз'юшаныя пратэстоўцы закідалі брудам караля і каралеву Іспаніі, калі тыя наведвалі адзін з найбольш пацярпелых ад стыхіі гарадоў. З такім жа стаўленнем натоўпу сутыкнуўся і прэм'ер-міністр Педра Санчэз, якога пасля гэтага тэрмінова эвакуіравалі.
Карлас Мазон, які ўзначальвае адміністрацыю правінцыі, з кансерватыўнай «Народнай партыі» настойвае на тым, што дзейнічаў адэкватна. Ён сцвярджае, што ўлады правінцыі не атрымалі адпаведных папярэджанняў ад урада краіны, а такі маштаб бедства немагчыма было прадбачыць.
У Іспаніі за дзеянні пры стыхійных бедствах адказваюць улады рэгіёнаў, але яны могуць запытваць дапамогу ў Мадрыда. Іспанскае метэаралагічнае агенцтва выпусціла папярэджанне аб урагане 25 кастрычніка, але ўлады Валенсіі разаслалі трывожныя паведамленні на мабільныя тэлефоны жыхароў толькі за лічаныя гадзіны да паводкі 29 кастрычніка.