Хто вышуквае ў крамах і бібліятэках «экстрэмісцкую» літаратуру?
22.10.2024 / 10:26
Па словах міністра інфармацыі Марата Маркава, кніжныя магазіны і бібліятэкі з мэтай выяўлення «экстрэмісцкай» літаратуры манітораць некалькі структур — сярод іх Міністэрства інфармацыі, Саюз пісьменнікаў Беларусі, сілавыя органы.
Міністр інфармацыі Беларусі Марат Маркаў. Фота: БелТА
«Мы падключаем рэгіянальныя арганізацыі [Саюза пісьменнікаў]. Яны з задавальненнем ідуць нам насустрач у гэтым пытанні. І непасрэдна кіраўнік Аляксандр Мікалаевіч Карлюкевіч аказвае вялікую дапамогу Міністэрству сёння ў гэтым пытанні», — сказаў Маркаў у інтэрв'ю Першаму інфармацыйнаму каналу.
У 2024 годзе Міністэрства інфармацыі прасіла праверыць 284 віды прадукцыі. У 269 выпадках дадзеныя матэрыялы суд прызначыў «экстрэмісцкімі».
Як расказаў Маркаў, літаратура, прызнаная экстрэмісцкай, не спальваецца, а забіраецца з крам і бібліятэк:
«Ёсць пэўны механізм. Я не буду хаваць, што гэты механізм цяпер дапрацоўваецца. Мяркуецца ўнясенне змен у Закон аб супрацьдзеянні экстрэмізму. Гэтыя змены ініцыяваныя, зразумела, сумесна з Міністэрствам унутраных справаў, Міністэрствам культуры. І Міністэрства інфармацыі ўнесла свае прапановы. Гэты механізм, алгарытм, будзе ўдасканалены, дапрацаваны і [будзе] дакладна прапісана, хто і якім чынам павінен дзейнічаць».
Міністр дадаў, што яны прапануюць такую «навацыю» — каб выдавец, калі яму паступіла сумнеўная замова, на працягу сутак інфармаваў адпаведныя органы з перадачай самога бланка замовы.