Japoncy patrabujuć admianić hulniu pra čarnaskuraha samuraja
8.07.2024 / 8:55
Pietycyju z patrabavańniem admianić čarhovuju častku papularnaj sieryi Assassin's Creed masava padpisvajuć zachodnija ŭltrapravyja. U dyskusii vakoł hulni adznačyŭsia i Iłan Mask. Ale ŭ samich japoncaŭ pretenzii nie da koleru skury.
Čarnaskury samuraj Jasuke. Kadr z trejlera
Paśla hučnaha anonsu hulni Assassin's Creed Shadows, dziejańnie jakoj budzie adbyvacca ŭ fieadalnaj Japonii XVI stahodździa, hulniavaja supolnaść aktyŭna abmiarkoŭvaje jaje piersanažaŭ i histaryčnuju dakładnaść.
U hulni buduć dva pratahanisty, pamiž jakimi hulec zmoža pieraklučacca: žančyna-nindzia Naoe i čarnaskury samuraj Jasuke.
Pieršy trejler Assassin's Creed Shadows sabraŭ rekordnuju dla sieryi kolkaść dyzłajkaŭ na fonie abvinavačańniaŭ u histaryčnaj niedakładnaści i krytyki vobraza ciemnaskuraha samuraja Jasuke.
Ciapier hrupa japonskich hiejmieraŭ, niezadavolenych tym, jak raspracoŭščyki adlustravali epochu, stvaryła pietycyju z patrabavańniem admianić prajekt.
U pietycyi havorycca, što Ubisoft pavinna admianić Assassin's Creed Shadows praz «surjoznuju abrazu japonskaj kultury», jakuju raspracoŭščyki nanieśli, niapravilna pakazaŭšy vobraz samurajaŭ u hulni.
Jasuke na postary Assassin's Creed Shadows
Aŭtary pietycyi śćviardžajuć, što ŭ hulni skažonaja rola i charaktar samurajaŭ u japonskaj historyi, što moža być źviazana z rasizmam u dačynieńni da azijataŭ.
«Hetaja hulnia pryśviečana japonskim samurajam, i ŭ joj ihnarujecca toj fakt, što samurai musiać być vyšejšaj kastaj voinaŭ, jakija słužać hokeninam abo znaci», — piša aŭtar pietycyi Simidzu Toru.
U tekście taksama zhadvajecca pieršy jeŭrapiejec, jaki atrymaŭ tytuł samuraja — Uiljam Adams (Miura Andzin), jaki słužyŭ Takuhavu Iejasu ŭ jakaści chatamota i atrymlivaŭ vielizarny prybytak u 250 koku.
Niejaponcu z tekstu pietycyi ciažka zrazumieć, što kankretna nie tak pakazvajuć raspracoŭščyki i jakoj sami japonskija hiejmiery chočuć bačyć hulniu. Ale vidavočna, što pretenzij da koleru skury ŭ pietycyi niama.
Ale pretenzii da rasavaj prynaležnaści hałoŭnaha hieroja źjavilisia va ŭltrapravych z zachodnich krain.
«Hulnia nastolki hłyboka prasiaknuta paradkam dnia, što ŭ joj jość ciemnaskury, pakazany jak «sapraŭdny histaryčny samuraj» u Japonii. Abraźliva da niemahčymaści. Nichto nie prasiŭ», — napisaŭ u svaim tvitary papularny ŭltrapravy błohier Jan Majłz Čeonh.
Na jahony dopis adhuknuŭsia Iłan Mask, zajaviŭšy, što «DEI [raznastajnaść, roŭnaść i inkluziŭnaść] zabivaje mastactva».
Na siońnia pietycyju padpisali ŭžo bolš za 50 tysiač čałaviek. Pavodle analityka Danieła Achmada, absalutnaja bolšaść padpisantaŭ — ultrapravyja z zachodnich krain, jakija taksama pakidajuć rasisckija kamientaryi.
Sami ž japoncy krytykujuć histaryčnyja niedakładnaści, źviazanyja z architekturaj, zvyčajami i kulturnymi normami, a nie koler skury adnaho z hierojaŭ. Japoncy byli aburanyja tym, što ichniaj pietycyjaj skarystalisia zachodnija hiejmiery ŭ svaich metach.
Mierkavanaja vyjava Jasuke ŭ sutyčcy sumo. Malunak, stvorany kala 1605 hoda
Niahledziačy na abureńni ŭltrapravych, čarnaskury samuraj Jasuke — realny histaryčny piersanaž. Jak słuha italjanskaha jezuickaha misijaniera Alesandra Valińjana jon prybyŭ u Japoniju ŭ 1579 hodzie.
Kali jaho pradstavili słavutamu mahnatu-dajmio Odu Nabunahu, toj paličyŭ, što skura mužčyny afarbavanaja čarniłami, i zahadaŭ jamu raspranucca da pojasa i pačyścić skuru. Kali dajmio zrazumieŭ, što skura sapraŭdy ad pryrody takaja čornaja, to zacikaviŭsia Jasuke i pryniaŭ jaho na słužbu. U rešcie čarnaskury mužčyna staŭ samurajem i zbrajanoscam dajmio.
Jasuke byŭ śviedkam taho, jak vasał, jaki paŭstaŭ suprać jahonaha haspadara, prymusiŭ Odu Nabunahu ździejśnić charakiry. Samoha Jasuke nie kranuli, paličyŭšy, što čorny čałaviek nie japoniec, a žyvioła. Jaho vysłali ŭ chryścijanskuju carkvu Kijota, paśla čaho śled Jasuke hublajecca.